Selemiya
15 Pahe Siovaa amphopila ati: “Nga tyilingi vala ovo Mwisesi na Samuwele vatalama kotyipala tyange,+ ame hifweve ovanthu ava.* Vetaata ponthele yange. Vatunde apa. 2 Ine vekuti: ‘Matwende napi?’ ove vekumbulula uti: ‘Siovaa wati:
“Ou mankhi konkhano, ankhie konkhano!
Ou mankhi komutunga, ankhie komutunga!+
Ou mankhi kondyala, ankhie kondyala!
Ou matwalwa koukonde, atwalwe koukonde!”’+
3 “‘Mandyivetumu ovihuna vikwana,’*+ o Siovaa wetyipopia, ‘mandyivetumu omutunga uveipaa, novimbwa vikoke-ko omalutu avo, noviila novinyama vyo pohi vivelie avivehanye-ko.+ 4 Mandyikevelinga etyi tyitilisa owoma onohamba ambuho mbo pohi,+ kombanda ya Manasesi omona wa Isekiya, ohamba yo Sundaa, mweetyi alinga mo Selusalei.+
5 Olie malingi okankhenda ove Selusalei?
Olie mekulingi okankhenda,
Olie matalama, mekupulu oñgeni uli?’
6 ‘Ove wandyeka-po,’ o Siovaa wetyipopia.+
Otyo mandyikutandavekela okuvoko kwange, mandyikunyimi-ko.+
Nepwila nokukulinga okankhenda.*
7 Mandyiveyandyanesa ngeyungu lienda nomphepo ponombundi mbotyilongo.
Mandyivesi tyehena ovana.+
Mandyihanye-ko ovanthu vange,
Mokonda kavahande okuyeka-po onondyila mbavo.+
8 Ovahepe vavo mandyivelingi ovanyingi vali tyipona eheke lyo konthele kelunga.
Mandyiveetela omuhanyauni, mevehanyauna, no voina yovana novakwendye.
Mandyiveuhulula avahuka-huka, matyivetumphulukisa unene.
9 Omukai wapululukwa ovana epandu-vali wasosoloka;
Ututumba* afime.
Ekumbi liae linyingila omutenya,
Tyemweteela olukundo, nomupenyo.’*
‘Ava vehehi vahupa-po puvo,
Mandyikevepakula komutunga wonondyale mbavo,’ o Siovaa wetyipopia.”+
10 Tatiei, ndyenda napi mee yange, wandyetela-tyi kouye?+
Ovanthu votyilongo atyiho vakalela vala okundwisa, okunthañgunisa.
Halevalesile, nii halevalele,
Mahi soka ovanthu aveho vanthela onkhano.
11 Siovaa wati: “Ame mwene tyili mandyikukwatesako.*
Tyili mandyilipake-po mandyikwaamena mononthiki mbemone,
Ononthiki momoneswa ononkhumbi nondyale.
12 Okuti pena omunthu upondola okwoma-oma otyivela,
Otyivela, hamwe aomo otyitasu tyatunda kombanda?
13 Matyiti no tyove, nolumono lwove mandyityipakula, movipundwa,+
Kamavikumanwa notyipuka natyike, mokonda yononkhali ambuho mwalinga movilongo vienyi aviho.
14 Mandyikapakula ovipuka ovio konondyale mbenyi,
Opo vende navio avevitwala kotyilongo ove wehei.+
Mokonda onyengo yange yatema otupia.
Maimutokotesa.”+
15 Ove utyii, Ove Siovaa.
Nthyinangele-vo, tala-vo kwaame.
Lwisa-vo ava vandyeva.+
Wahandyeke ndyinkhie* otyo wapwa vala elundo.*
Tala ame nakondya tupu nokupopiwa omapita ove.+
16 Onondaka mbove nembuvasa, nembulia-po.+
Ondaka yove yalinga ondolo yange, ehambu enene komutima wange,
Mokonda ndyitumbulwa enyina liove, ove Siovaa Huku yovita.
17 Hipumphama no vokunyana, hiyolo navo.+
18 Oityi onongembia mbange mbahapwila, otyipute tyange tyahavelukila?
Katyihande okuveluka.
Mondingi ngondyivi-ndyivi yomeva ikemba,
Oyo yahayumbwa onthumbi?
19 Etyi otyo tyapopia Siovaa wati:
“Ine ukondoka, ame mandyikupindula-po,
Ove mokakala tyitai komutwe wange.
Ine upunga etyi tyaviuka kweetyi tyahasilivila,
Ove mokalinga omulungu wange.*
Ngwe mavakaleuka kwoove,
Mahi ove kumekaleuka kuvo.”
20 “Ndyikulinga otyimato tyapama tyotyitasu tyikwaamena kovanthu ava;+
Tyili mavekekulwisa,
Mokonda ame ndyina ove ndyikuhupisa, ndyikuyovola,” o Siovaa wetyipopia.
21 “Mandyikuyovola kokuvoko kwonondingavivi,
Mandyikuyovola peke liovalume ovakalavi.”