Ovakoyesi
16 Nthiki imwe Sasau aende ko Ngasa, amono-ko omukai umwe ekunga anyingila mondywo yae. 2 Ovanthu avakapopila ova Ngasa okuti: “Sasau uli kuno.” Tyiivee vala aveya, avaselekala apa ekahi, avemuyolamena kombundi yepunda-umbo kounthiki. Kounthiki oko, avahalingi natyike, vasokele okuti: “Nga kwatya matumwipaa.”
3 Sasau alangala-po vala atee mokati kovinthiki, apinduka-po akwata omapito epunda-umbo eetukula-po novikulilo viatyo vyo pombundi nomakumba atyo. Eepake potyipepe eetwala keulu liomphunda ikala komutwe wo Hemboloo.
4 Pahe ahande-ko omukai umwe avasa melola* ko Soleke utiwa o Ndalila.+ 5 Ovatumini vova Filisitiya aveliyombeleka komukai oo avati: “Yondya* Sasau+ opo utale oityi tyimupa ononkhono ononene, oñgeni tupondola okumukwata atumukutu. Ine ulinga ngootyo, onthwe atuho matyiti ou wekwavela ou wekwavela onopalata 1.100.”
6 Ou Ndalila apopila Sasau ati: “Ove nkhele mphopile opi kutunda ononkhono mbove, omunthu ukukuta opo ekuvile ukukuta natyi.” 7 Sasau ati: “Ine umwe unkhuta nomaluhipa* epandu-vali omape, nkhele ehenekukute mandyisala tyehena ononkhono andyikala ngovanthu vakwetu.” 8 Ovatumini vova Filisitiya avemwetela omaluhipa epandu-vali omape nkhele ehenekukute, ngao Ndalila emukuta nao. 9 Ovalume avaholama mondywo imwe, ou omukai ai mokuliululisa onkhwo ati: “Sasau ova Filisitiya veya!” Ngwe atipaula omaluhipa ngeetyi omulinya utipuka tyina uyama kotupia.+ Ngootyo, avahamono oku kutunda ononkhono mbae.
10 Ndalila apopila Sasau ati: “Ove wankhemba,* kwapoile otyili. Popia vala otyili, opo omunthu ekuvile, ukukuta natyi.” 11 Emupopila okuti: “Ine unkhuta nomapanda omape ehenekute natyike, mandyisala tyehena ononkhono ngovanthu vakwetu.” 12 Ndalila akwata omapanda evali omape emukutu nao, aulula onkhwo ati: “Sasau ova Filisitiya veya!” (Ngwe vayolamene mondywo imwe.) Atipaula omapanda akutwa nao komavoko ngatyina ongoi vala.+
13 Ndalila apopila Sasau ati: “Ove ukahi vala nokunkhemba, ukahi vala nokunthyoleka.+ Mphopile oityi omunthu ena okukukuta natyo.” Emupopila okuti: “Tyahanda okukuta ononthombi mbange ambuho epandu-vali nongoi yokutunga.” 14 Omukai akutu ononthombi mbae nongoi, embupondingiya nomuholo, aulula onkhwo ati: “Sasau ova Filisitiya veya!” Apahuka, elipolo omuholo ongoi yokunyika elitipula-yo.
15 Ndalila ati: “Oñgeni ove uti: ‘Unthyole,’+ ngwe unthyoleka etyi tyili momutima wove? Wankhemba tutatu, kukahi nokupopia opi ononkhono mbove ononyingi mbutunda.”+ 16 Etyi Sasau atala, utyiita vala ononthiki ambuho, otyo emukuluminya epwila* umwe, nokukala nomwenyo ahahande vali.+ 17 Pahe emupopila umwe etyi tyili momutima wae ati: “Onohuki mbange nkhele natyitilwe hinembukululwe mokonda ndyimu Nasileu wa Huku.*+ Ine ndyikululwa himamono vali nononkhono, mandyisosoloka andyikala nga valume vakwetu.”
18 Etyi Ndalila amona okuti wapopia umwe otyili, liwa-liwa atumu ondaka kovatumini vova Filisitiya+ ati: “Endywei, hono wapopia umwe otyili.” Ovatumini vova Filisitiya avaende-ko avemutyindila onombongo. 19 Emulangeka konongolo mbae. Aihana omulume umwe emutete ononthombi mbae epandu-vali. Pahe emuvili mokonda utupu vali ononkhono. 20 Aulula ati: “Sasau ova Filisitiya veya!” Pahukee asoko etyi ehole okulinga. Ati: “Mandyilingi etyi ndyilinga-linga-le,+ mandyiyovoka.” Nokuti vala Siovaa wemuyeka-po ketyii. 21 Ova Filisitiya avemukwata, avemutiula omaiho. Avemutwala no kombwelo ko Ngasa, avemukutu nomaelienge evali otyitasu akala omukunkhi wo mokaleya. 22 Mahi onohuki mbae mbokwakululilwe ambuhimbika vali okukula.+
23 Ovatumini vova Filisitiya aveliongiya valingile Ndangoo+ o huku yavo otyilikutila otyinene avalingi otyipito, vasokele okuti: “Huku yetu wapakula ondyale yetu Sasau pomavoko etu!” 24 Etyi ovanthu vemumona, avahivilika huku yavo otyo vati: “Huku yetu wapakula ondyale yetu pomavoko etu yamonesa ononkhumbi otyilongo tyetu,+ yaipaa ovanthu vetu ovanyingi.”+
25 Mokonda vahambukwa unene avati: “Ihanei Sasau tunyanene kwe.” Avaihana Sasau mokaleya opo eveyolese, avemutalameka pokati konomphandyi. 26 Sasau apopila okamukwendye kemukwata mokuvoko ati: “Nthwale-vo ponomphandyi mbakwata ondywo ei ndyiliyeke-mo.” 27 (Mondywo mwali ovalume novakai ovanyingi. Ovatumini aveho vova Filisitiya omo vekahi, kondywo yo keulu kwali ovanthu 3.000 ovalume novakai vatala Sasau uveyolesa.)
28 Sasau+ eliyave ku Siovaa ati: “Tatekulu Hamba Onene Siovaa, mbambavo nthyinangele-vo, mphameke+ vali like vala mbambavo Huku yange, yeka ndyilinge ova Filisitiya etyi tyata meiho liange like vala mokonda vamphola omaiho ange.”+
29 Sasau akwatelela monomphandyi onombali mbo pokati mbakwata ondywo, akwatelela mu ike nokulio akwatelela vali monkhwavo nokumbili. 30 Sasau eliyavela ati: “Ndyinkhile* kumwe nova Filisitiya!” Atahula onomphandyi nononkhono mbae ambuho, ondywo aitokela kovatumini no kovanthu aveho veli-mo.+ Ngootyo pokunkhia, waipaa vali ovanthu ovanyingi tyipona ava aipaele pweetyi ena omwenyo.+
31 Vana elilandula navo nombunga ya he avaende-ko avekemupola-ko. Avemutyindi-po avekemupaka pokati ko Solaa+ no Esitaole melangalo lya Manowaa+ tate yae. Sasau wakala omukoyesi wova Isilayeli omanima 20.+