Sona
3 Siovaa apopila vali Sona lya vali ati:+ 2 “Katuka, enda ko Ninive+ kepunda-umbo enene, kevepopile onondaka ame mandyikupopila.”
3 Sona etavela ondaka ya Siovaa,+ aende ko Ninive.+ Epunda-umbo lyo Ninive ankho enene unene* — okulieenda aliho lipwa vala mononthiki ononthatu. 4 Pahe Sona anyingila mepunda-umbo aende otyikambo tyonthiki ike, otyo apopia okuti: “Kwakamba vala ononthiki 40, o Ninive maihanywa-po.”
5 Ovanthu vomo Ninive, okuhimbikila kovakulu atee kovana, avayumbu onthumbi mu Huku,+ avelipopila vakale ononthiki mbumwe tyahali, avavale onosaku mbonongosa. 6 Etyi ondaka yehika kohamba yo Ninive, aikatuka kotyipundi tyayo, ailipolo otyikutu tyayo tyoutumini ailihiki onosaku mbonongosa, aipumphama metwe. 7 Tupu, aitumu okupopila ovanthu aveho mo Ninive okuti:
“Ngeetyi tyatuma ohamba nomanene atyo petupu nawike upondola okulia, tyilinge omunthu tyilinge onongombe, tyilinge onongi, tyilinge ovinyama ovikwavo. Natyike tyipondola okulia nii okunwa omaande. 8 Velihike onosaku mbonongosa, tyilinge omunthu tyilinge otyinyama. Veliyave unene ku Huku, avayeke-po onondyila mbavo onombi novivi valinga. 9 Katutyii hamwe Huku yotyotyili mapilulula etyi ahanda okulinga, ehetwetela vali ononkhumbi ankho ahanda okweeta, ahakala vali nonyengo onene, atuhupu.”
10 Etyi Huku yotyotyili amona okuti vayeka-po ovivi viavo,+ apilulula etyi ankho ahanda okulinga, ehevehanye-ko vali ngeetyi apopile.+