Omukanda wa Vali Ehipululo
24 Seowasi wakala ohamba etyi ena omanima epandu-vali,+ watuminine mo Selusalei omanima 40. Ina utiwa o Simbia omu Mbelesemba.+ 2 Seowasi walingile etyi tyaviuka komaiho a Siovaa ononthiki ambuho omunakwa Seoyanda emulongesile.+ 3 Seoyanda waovolelele Seowasi ovakai vevali. Seowasi atyiti ovana ovakwendye, novafikwena.
4 Mokweenda kwononthiki, Seowasi etyihande umwe momutima tyokupindula-po ondywo ya Siovaa.+ 5 Aongiya ovanakwa, no vomuhoko wa Levii, evepopila okuti: “Endei momapunda-umbo o Sundaa, amwiiti onombongo kova Isilayeli aveho, opo nima-na-nima tuviukise ondywo ya Huku yenyi.+ Onwe muna okulinga liwa otyilinga otyo.” Mahi vomuhoko wa Levii, avehetyilingi liwa.+ 6 Mokonda yotyo, ohamba aiihana Seoyanda onkhalamutwe, aimupulu okuti:+ “Omokonda yatyi vomuhoko wa Levii vahakuluminyine okukapola ko Sundaa no ko Selusalei elilimu likola, eli Mwisesi+ omuundapi wa Siovaa atumine? Okukapola elilimu likola liewaneno lyo Isilayeli, liomekaka Lioumbangi?+ 7 Ovana va Ataliya,+ omukai una ondingavivi, vatembele ondywo ya Huku yotyotyili,+ ovipuka aviho vikola vyo mondywo ya Siovaa, avevipake mefendelo lya Mbaale.” 8 Avalingi otyikasa,+ ngeetyi ohamba yatuma, avetyipake kondye, pombundi yondywo ya Siovaa.+ 9 Pahe, avatumu ondaka mo Sundaa aiho nomo Selusalei, opo vaetele Siovaa elilimu likola,+ eli Mwisesi omuundapi wa Huku yotyotyili atumine ova Isilayeli moluhandya. 10 Ovakwatesiko aveho vohamba, novanthu aveho, avahambukwa.+ Ngwe vaeta oviawa, otyo vapaka motyikasa, atee tyiyula.*
11 Apeho tyina vomuhoko wa Levii vaeta otyikasa kohamba, avamono-mo muna onombongo ononyingi, omuhoneki wohamba, no wokukwatesako onkhalamutwe yovanakwa, veya, avembupolo-mo ambuho,+ avetyikondola vali pomphangu yatyo. Vetyilinga nthiki-na-nthiki, vaongiya umwe onombongo ononyingi. 12 Ohamba na Seoyanda, onombongo ombo ankho vembupa ononkhalamutwe mbovilinga viondywo ya Siovaa. Ononkhalamutwe ombo, avaovola vokuhonga nawa omamanya, novanongo, opo vaviukise ondywo ya Siovaa.+ Tupu vaovola vokunthila ovivela novitasu opo vaviukise ondywo ya Siovaa. 13 Vokwakalela komutwe otyilinga, avahimbika okuundapa, otyilinga tyokuviukisa ondywo atyiende no komutwe otyo vetyihongolela. Avaviukisa ondywo ya Huku yotyotyili, aveipameka aikala ngeetyi yali potete. 14 Etyi yapwa, onombongo mbahupa-po avembutwala ku Seoyanda, no kohamba. Avapolo onombongo ombo, avalingi nambo ovityuma viondywo ya Siovaa, ovityuma viovilinga viondywo ya Huku, no viokulingila oviawa. Tupu avalingi omalufo, novityuma ovikwavo vioolu nopalata.+ Vaavele ovilikutila viokuyokwa+ mondywo ya Siovaa pononthiki ambuho mba Seoyanda.
15 Etyi Seoyanda akulupa, pahe walia-ko umwe omanima omanyingi, anyimi. Pweetyi anyima, una omanima 130. 16 Avekemupaka Mepunda-umbo lya Ndaviti, ponthele yonohamba,+ mokonda walingilile Huku yotyotyili, nondywo Yae ovipuka oviwa mo Isilayeli.+
17 Etyi Seoyanda anyima, ovakwatesiko vohamba mo Sundaa, aveya, avelipetamena-po kohamba, ngwe aivetavela. 18 Avayeke-po ondywo ya Siovaa, Huku yovakwaukulu vavo. Avahimbika okufenda ovipandyi vikola,* novika-huku. Huku anumanena o Sundaa no Selusalei* mokonda yonkhali yavo. 19 Siovaa watumaine ovauli pokati kavo vevekondole kwe. Ovauli vevelondaulile umwe,* mahi ngwe kavevetavela.+
20 Omphepo ya Huku aiya mu* Sakaliya, omona womunakwa Seoyanda,+ atalamena pomphangu yaya vali peulu tyipona apa ovanthu veli, evepopila okuti: “Huku yotyotyili wati: ‘Oityi muhalandulila ovitumino vya Siovaa? Onwe kamamuviuku! Mokonda onwe mwayeka-po Siovaa, nae memuyeke-po.’”+ 21 Mahi, avatyitukila-po+ Sakaliya. Ohamba aitumu vemuvete nomamanya, avemuvetela mepata liondywo ya Siovaa.+ 22 Soka Ohamba Seowasi kahinangelele olwembia olunene Seoyanda tate yae* emulingile, aipaa omona wae, una pokunkhia wapopile okuti: “Siovaa etyimone, mwene ekulinge etyi uhiwa okulingwa.”+
23 Konthyimbi yenima,* ovita vyo Silia aviya okulwisa Seowasi, avaululila mo Sundaa nomo Selusalei.+ Avahanye-mo ovanene vatyo votyilongo aveho,+ avatumu kohamba yo Ndamasiku evi vapunda. 24 Ovita vyo Silia viokweya okulwisa otyilongo ankho kavehi, mahi no ngootyo, Siovaa apakula pomavoko avo ovita ovinyingi,+ mokonda vayeka-po Siovaa, Huku yovakwaukulu vavo. Ngootyo, avakoyesa* Seowasi. 25 Etyi ova Silia vapita (vemusa enthuvia*), ovaundapi vae avemutyitukila-po, mokonda wamomesa ohonde yovana* vomunakwa Seoyanda.+ Avemwipaela koula wae,+ avekemupaka Mepunda-umbo lya Ndaviti,+ mahi avehemupake momaendo onohamba.+
26 Vokwemutyitukilile-po+ tyati: O Sambande omona wa Simeate omu Amoo, na Seosambande omona wa Sinilite omu Moambe. 27 Konthele yovana vae, nonondaka ononyingi mbokumukoyesa,+ notyilinga tyokupindula-po* ondywo ya Huku yotyotyili,+ viahonekwa* Momukanda Wonohamba. Omona wae Amasiya, emupingi kouhamba.