Ovakoyesi
8 Ovalume vomuhoko wa Efalaii avemupulu okuti: “Omokonda yatyi walingila ñgaa? Oityi wehetwihanenene etyi wakalwisa ova Mindiyaa?”+ Avemutañgunisa unene.+ 2 Mahi ngwe eveti: “Oityi ame nalinga tyelifwa neetyi onwe mwalinga? Onouva mbesalaile komiti mbanyangwa na Efalaii,+ kambukahi vali nawa tyipona mbuna mbanyangwa na Ambiyeseli+ pomuvo watyo? 3 Ha pomavoko enyi Huku apakulile Olembe na Seembe+ ovakwatesiko vohamba yo Mindiyaa, oityi ame nalinga tyelifwa neetyi onwe mwalinga?” Etyi apopia ngootyo,* avati filuu.*
4 Sindeyau ehiki mo Solondau ayauka nthele-ina. Pahe vaponwa, nae novalume 300 vemulandula, mahi avatwalako okulandula onondyale mbavo. 5 Apopila ovalume vo ko Sukote okuti: “Mbambavo avelei-vo ovalume vandandula onombolo, mokonda vepwila, ame ndyikahi nokuyeva ovo Semba na Salumuna, onohamba mbova Mindiyaa.” 6 Mahi ovakwatesiko vonohamba mbo ko Sukote avati: “Twaavela ombolo omafwalali ove tyehena okuti ovo Semba na Salumuna, vekahi-ale* pomavoko ove?” 7 Ou Sindeyau eveti: “Etyi mwaanya, tyina Siovaa amapakula ovo Semba na Salumuna pomavoko ange, mandyimulwakula nomakete, nomankhwenya omoluhandya.”+ 8 Etyi atunda opo aende ko Penweli, ngatyo ñgoo aita, ovalume vo ko Penweli, avemukumbulula ngeetyi ovalume vo ko Sukote vemukumbululile. 9 Pahe apopila ovalume vo ko Penweli okuti: “Tyina ame namakondoka nombembwa, mandyiya okuteya-po etala eli.”+
10 Ovo Semba na Salumuna ngwe opo veli ko Kalekole novita viavo, ovalume 15.000. Ovio ovita aviho viahupile povita vyo koutundilo,+ mokonda ovalume aveho 120.000 vokwamanekele omitunga vankhile. 11 Sindeyau otyo enda nondyila ikwata komakaka, koutundilo wo Nomba, no Songumbeya,+ alwisa onthanda yovita viatalukwa vala. 12 Etyi Semba, na Salumuna vaya-nkholo evelandula akwata onohamba ombo ambuho onombali mbova Mindiyaa, Semba na Salumuna, omafwalali aeho monthanda aelivomba-vomba.
13 Pahe Sindeyau omona wa Sowasi atundu kovilwa akwate ko Helesi. 14 Akwata omukwendye umwe wo ko Sukote avasa mondyila emupulu. Omukwendye oo, emwavela omukanda womanyina ovakwatesiko vonohamba novakulu vomo Sukote, ovalume 77. 15 Pahe aende kovalume vo ko Sukote, evepopila okuti: “Ovo Semba na Salumuna ovava, ovalume onwe mwandingila omukwele amuti: ‘Twavela ombolo omafwalali ove tyehena okuti o Semba na Salumuna, vekahi-ale* pomavoko ove?’”+ 16 Akwata ovakulu vomepunda-umbo lyo Sukote, evelongo onondunge,+ nomakete, nomankhwenya akala moluhandya. 17 Tupu ahanye-po etala liomo Penweli,+ aipaa ovalume vomepunda-umbo.
18 Apulu ovo Semba na Salumuna okuti: “Ovalume mwaipaa ko Tambole vekahi ñgeni?” Avemukumbulula avati: “Vekahi ngoove. Aveho tyina uvetala ngoti ovana vonohamba.” 19 Pahe eveti: “Ovo tulilandula navo, ovana va mee. Na Siovaa umwe una omwenyo, ine kamweveipaele naame ñgeno hemwipaele.” 20 Apopila Setele otyiveli tyae okuti: “Katuka veipaa!” Omukwendye ahanane-mo omutunga; watila owoma mokonda nkhele omona. 21 O Semba na Salumuna, avemupopila okuti: “Twipae vala ove, mokonda omulume utalelwa kononkhono ena-mbo.”* Sindeyau aipaa Semba na Salumuna,+ apolo ovipuka oviwa viokulifiviswa, vikahi ngohanyi yaviala, vikahi pomunyino womakamelu avo.
22 Ovalume vo Isilayeli avapopila Sindeyau okuti: “Kala omutumini wetu ove nomona wove, nomutekula wove, mokonda wetuyovola pomavoko ova Mindiyaa.”+ 23 Mahi, Sindeyau ati: “Ame himakala omutumini wenyi nii omona wange kamakala omutumini wenyi. Makala omutumini wenyi o Siovaa.”+ 24 Sindeyau apopi vali okuti: “Mandyimwiiti otyipuka tyike: amuho-amuho mpholelei ombilingu ike yo keyulu povipuka vienyi mwapunda.” (Mokonda ova Isimayeli ankho vakala nonombilingu mboolu keyulu.)+ 25 Avati: “Tyotyili matukwavela-mbo.” Avayale otyikutu pohi, ovalume aveho avayumbu-po ombilingu ike-ike yo komayulu vapola kovipuka vapunda. 26 Onombilingu mbo komayulu mboolu ambuho aitile ambuleme onosikulu* 1.700 mboolu, tyahavalula ovipuka oviwa vikahi ngohanyi yaviala, nonombilingu mbo komakutwi, novikutu viomainya viotyivala otyinkhuhu vivala onohamba mbo ko Mindiyaa novilanda viomakamelu.+
27 Sindeyau alingi otyikutu tyovanakwa+ noolu oyo, etyipake mepunda-umbo lyo Ofala,+ ova Isilayeli aveho avalingi natyo oumbalehi,+ atyikala eliva ku Sindeyau no kovanthu aveho vomeumbo liae.+
28 Ova Mindiyaa+ avatuminwa nova Isilayeli, kavevehongaile vali; otyilongo atyifimi-po* omanima 40 pononthiki mba Sindeyau.+
29 Selumbaale+ omona wa Sowasi, akondoka keumbo liae ngako akakala.
30 Sindeyau wakalele novana 70,* mokonda wali novakai ovanyingi. 31 Onthawa yae yo ko Sikei nae avakala nae nomona, emuluku okuti, Ambimeleke.+ 32 Sindeyau omona wa Sowasi etyi akulupa unene anyimi, akapakwa pelangalo lya he Sowasi, ko Ofala liova Ambiyeseli.+
33 Konyima yononkhia mba Sindeyau, ova Isilayeli avawane vali okulinga oumbalehi novika-huku ovi Mbaale,+ avakoyo-po Mbaale-Mbelite akala huku yavo.+ 34 Ova Isilayeli avalimbwa Siovaa Huku yavo+ una weveyovolele pomavoko onondyale mbavo ambuho mbeliseta navo,+ 35 nii kavalingile olwembia olunene veumbo lya Selumbaale ou utiwa o Sindeyau, okumupa ondyambi yovipuka aviho oviwa alingilile ova Isilayeli.+