Wo Tete Wahonekelwa Ova Tesalonika
3 Etyi pahe twehetyivilile-ale vali, atuti hahe nkhele tukale vala atwike mo Atena;+ 2 atutumu Timotiu,+ omunthu wetu, omuundapi wa* Huku moviwa ovipe viayemba ku Kilisitu, emupameke* mupameke monthumbi yenyi, 3 opo pahamone ou uhiñginywa* nononkhumbi ombo. Ngwe onwe mutyii okuti onthwe katutyivili-ale okuyepa ovipuka ovio vitumonesa onkhumbi.*+ 4 Etyi twali noonwe, ankho tumupopila-le okuti matumono ononkhumbi, pahe otyo, otyo umwe tuhole okumona, noonwe mwene mutyii.+ 5 Otyo natila etyi pahe ame nehetyivilile vali, ngae ndyituma eye emutale etyi muyumba umwe onthumbi mu Huku,+ ankho nalinga otyiho nati hamwe Omuyondyi+ memulolo, ovilinga twatutumbile navio avipeseka.
6 Mahi o pehepano umwe Timotiu eya atunda oko,+ wetupopila oviwa ovinyingi onwe muli nokulinga mokwayumba-ko onthumbi, no monthyole munayo, tupu wetuti onwe na hono mutuhinangela, mwahanda tulimonepo, ngwe noonthwe otyo umwe twahanda. 7 Otyo onthwe vanthu vetu tutila movitateka* aviho tukondya navio, nononkhumbi tumona, tupamena umwe vala onwe, onwe mwayumba umwe onthumbi mu Huku.+ 8 Mokonda noonthwe tumona omafa* tyina onwe mukala tyitai mu Tatekulu. 9 Oñgeni pahe matupandula-vo Huku, tupandulile umwe onwe mehambu eli enene tuna-lio kotyipala tya Huku yetu lituka umwe mwoonwe? 10 Na tyinthiki na tyitenya, onthwe tulivondela vala, tyokulivondela umwe hamwe tuya tumutale-vo vala motyipala, apa pakamba meyumba-nthumbi lienyi tupate-po.+
11 Pahe Huku yetu, Tate yetu, na Tatekulu yetu Sesusi, vetwikulile-vo ondyila tuye oko. 12 Tupu Tatekulu emukulise, otyo umwe, olwembia lwenyi po yenyi luhamphiauke,+ mulinge olwembia ovanthu aveho, ngeetyi noonthwe tumuhole, 13 opo omitima vienyi mevipameka, evisukula viahakale notyinthembia komaiho a Huku yetu,+ Tate yetu, pokweya kwa Tatekulu yetu Sesusi,+ tyina pahe ena ovasukuki vae aveho.