Omukanda wa Vali Onohamba

15 Menima 27 Selombowau* ohamba yo Isilayeli eli kovipundi, Asaliya*+ omona wa Amasiya+ ohamba yo Sundaa, akala ohamba.+ 2 Wali nomanima 16 etyi akala ohamba, atumina omanima 52 mo Selusalei. Ina o Sekoliya, omu Selusalei. 3 Walingile etyi tyaviuka komaiho a Siovaa, ngeetyi tate yae Amasiya alingile.+ 4 Mahi onomphangu mbukola mbaya peulu nkhele kambahanyenwe-po,+ ovanthu opo nkhele vaavela ovilikutila, tupu valingila-po ovilikutila viokutunda omwihi.+ 5 Siovaa ohamba eiyumbu otyilunda, aivele umwe otyilunda+ atee monthiki yankhia. Ankho ikala vala mondywo aike,+ ou Sotau+ omona wohamba ngae usala meumbo,* otyo ateta onomphela mbovanthu motyilongo.+ 6 Ovipuka ovikwavo vipopia Asaliya,+ ovipuka aviho alinga, kaviahonekelwe momukanda womahipululo o pononthiki mbonohamba mbo Sundaa? 7 Asaliya akapululukwa-po nonombwale mbavo,+ akapakwa komaendo onombwale mbavo Kepunda-umbo lya Ndaviti; Sotau omona wae emupingi kovipundi.

8 Menima 38 Asaliya+ ohamba yo Sundaa atumina, Sakaliya+ omona wa Selombowau akala ohamba yo Isilayeli ko Samaliya, atumina onohanyi epandu. 9 Walingile etyi tyapenga komaiho a Siovaa, ngeetyi onombwale mbae valingile. Katundile mononkhali mba Selombowau omona wa Nembate, mbuna alingisisile+ ova Isilayeli. 10 Saluu omona wa Sambesi, emutyitukila-po, emuvangela+ ko Imbeleyau.+ Etyi emwipaa, emupingi kovipundi. 11 Ovipuka ovikwavo viehipululo lya Sakaliya, viahonekwa momukanda womahipululo o pononthiki mbonohamba mbo Isilayeli. 12 Ondaka Siovaa apopilile Seuu yalinga umwe otyili, yati: “Mombunga yove mamutundu ovanthu+ mavekelipinga kotyipundi tyoutumini wo Isilayeli tukwana.”+ Ngootyo umwe tyeenda.

13 Saluu omona wa Sambesi akala ohamba menima 39 Usiya+ ohamba yo Sundaa eli kovipundi, atumina ohanyi ko Samaliya. 14 Pahe Menaee omona wa Ngandii atundu ko Tilisa+ aende atee ko Samaliya, aipaa Saluu+ omona wa Sambesi ko Samaliya. Etyi emwipaa, emupingi kovipundi. 15 Ovipuka ovikwavo viehipululo lya Saluu, neetyi atyitukililepo ohamba, viahonekwa momukanda womahipululo o pononthiki mbonohamba mbo Isilayeli. 16 Etyi Menaee atunda ko Tilisa, alwisa o Tifisa, aipaa ovanthu aveho veli motyilongo otyo no monohika mbatyo mokonda kavaikulile kombundi opo akwateko. Ahanyuna epunda-umbo aliho atoma-toma omaimo ovalemi.

17 Menima 39 Asaliya ohamba yo Sundaa atumina, Menaee omona wa Ngandii alingi ohamba yo Isilayeli, atumina omanima 10 ko Samaliya. 18 Walingile etyi tyapenga komaiho a Siovaa. Ononthiki ambuho mbomwenyo wae, katundile mononkhali mba Selombowau omona wa Nembate, mbuna alingisisile+ ova Isilayeli. 19 Puli+ ohamba yo Asilia anyingila motyilongo, Menaee aavela Puli onotalendu* 1.000 mbopalata opo emukwateseko okupameka ouhamba wae.+ 20 Menaee atambula opalata kova Isilayeli, wiipola kovalume vokwamona,+ omalombe atyo. Mulume na mulume aavele onosikulu* 50 mbopalata, eyaavela ohamba yo Asilia. Ohamba yo Asilia aikondoka, aihakala vali motyilongo. 21 Ovipuka ovikwavo viehipululo lya Menaee,+ ovipuka aviho alinga, kaviahonekelwe momukanda womahipululo o pononthiki mbonohamba mbo Isilayeli? 22 Pahe Menaee akapululukwa-po nonombwale mbae; Pekaya omona wae emupingi ngae ulinga ohamba.

23 Menima 50 Asaliya ohamba yo Sundaa atumina, omona wa Menaee Pekaya akala ohamba yo Isilayeli ko Samaliya, atumina omanima evali. 24 Walingile etyi tyapenga komaiho a Siovaa. Kayekelepo ononkhali mba Selombowau omona wa Nembate, mbuna alingisisile+ ova Isilayeli. 25 Omukwatesiko wae Peka+ omona wa Lemaliya emutyitukila-po. Kumwe novalume 50 vo ko Sileyande, avange Pekaya, na Alungombe na Aliyee* veli ko Samaliya, mondywo* yohamba yetala liomulavi yokwapama. Etyi emwipaa, emupingi ngae ulinga ohamba. 26 Ovipuka ovikwavo viehipululo lya Pekaya, ovipuka aviho alinga, viahonekwa momukanda womahipululo o pononthiki mbonohamba mbo Isilayeli.

27 Menima 52 Asaliya ohamba yo Sundaa eli kovipundi, Peka+ omona wa Lemaliya, akala ohamba yo Isilayeli ko Samaliya, atumina omanima 20. 28 Walingile etyi tyapenga komaiho a Siovaa, kayekele-po ononkhali mba Selombowau omona wa Nembate, mbuna alingisisile+ ova Isilayeli. 29 Pononthiki mba Peka ohamba yo Isilayeli, Tingilate-Pilesele+ ohamba yo Asilia alwisa o Isoo, no Ambele-Mbete-Maakaa,+ no Sanoa, no Kendesi,+ no Hasole, no Sileyande,+ no Ngalileya, otyilongo atyiho tya Nafitalii+ etyitambula-ko, ovanthu vatyo evetwala koupika mo Asilia.+ 30 Oseya+ omona wa Elaa atyitukila-po Peka omona wa Lemaliya; emuvange, emwipaa, ngae ulinga ohamba menima 20 Sotau+ omona wa Usiya. 31 Ovipuka ovikwavo viehipululo lya Peka, ovipuka aviho alinga, viahonekwa momukanda womahipululo o pononthiki mbonohamba mbo Isilayeli.

32 Menima lya vali Peka omona wa Lemaliya ohamba yo Isilayeli eli kovipundi, Sotau+ omona wa Usiya+ ohamba yo Sundaa alingi ohamba. 33 Wali nomanima 25 etyi alinga ohamba, atumina omanima 16 ko Selusalei. Ina o Selusa, omona wa Sandoke.+ 34 Walingaile etyi tyaviuka komaiho a Siovaa, ngeetyi tate yae Usiya alingile.+ 35 Mahi onomphangu mbukola mbaya peulu nkhele kambahanyenwe-po, ovanthu nkhele valingila-po ovilikutila, tupu valingila-po+ ovilikutila viokutunda omwihi. Oe watungile ombundi yaya peulu yondywo ya Siovaa.+ 36 Ovipuka ovikwavo viehipululo lya Sotau, ovipuka alinga, kaviahonekelwe momukanda wonohamba mbo Sundaa? 37 Pononthiki ombo, Siovaa atumu Lesii ohamba yo Silia na Peka+ omona wa Lemaliya vakalwise o Sundaa.+ 38 Pahe Sotau akapululukwa-po nonombwale mbavo, akapakwa komaendo onombwale mbavo Kepunda-umbo lya Ndaviti he-mbwale yavo. Akasi omona wae emupingi kovipundi.