Wo Tete Wahonekelwa Ova Kolindu
1 Paulu, ou Kilisitu Sesusi aihana kokwahanda kwa Huku, alinge omutumwa,+ na Sositene, mukwetu tuna-e, 2 omukanda ou wenda kewaneno lya Huku mo Kolindu,+ kwoonwe vokwakohwa mulinge va Kilisitu Sesusi,+ vokwaihanwa mulinge ovanthu vakola, amuho naava vakalavandya enyina lya Tatekulu Sesusi Kilisitu+ movilongo aviho, Tatekulu yetu atuho:
3 Okankhenda okanene kakale noonwe, nombembwa itunda ku Huku ikale noonwe, Huku Tate yetu, Tate ya Tatekulu Sesusi Kilisitu.
4 Ame apeho ndyipandula Huku yange tyina ndyisoka kwoonwe, na tyina ndyisoka okankhenda okanene ka Huku mwapelwa mu Kilisitu Sesusi; 5 mokonda movipuka aviho, onwe mwapewa ouhona mumonene mwe, oe mwapelwa etyi tyokupopia nawa, mwapewa enoñgonoko liaoya,+ 6 mokonda onwe pahe mwapamena umwe moumbangi wapopiwa wayemba ku Kilisitu,+ 7 pahe onwe mutupu vali etyi mwakamba, mukevela vala okuhololoka kwa Tatekulu yetu Sesusi Kilisitu.+ 8 Ngwe nae memupameka amukala tyitai atee konthyulilo opo tyina tyiti monthiki ya Tatekulu yetu Sesusi Kilisitu,+ mwahahungwe natyike. 9 Huku uyumbwa onthumbi,+ ou wemwiihana muye mulipake kumwe* Nomona wae, Sesusi Kilisitu Tatekulu yetu.
10 Pahe vanthu vetu ame ndyimuti, amuho kalei nolusoko lwike menyina lya Tatekulu yetu Sesusi Kilisitu, pokati kenyi+ pahakale omaliyapauko, mahi likwatei-po umwe amuliiki kumwe omitwe, amusokela kokulike.+ 11 Vamwe veumbo lya Koloe vakola etyi mwakala oko vanthu vetu, vati kamuli nokulivila. 12 Etyi ndyili nokupopia otyetyi, pwoonwe opo tyiti ou uti: “Ame ndyiwa Paulu,” ou uti “Ame ndyiwa Apolu,”+ ou uti “Ame ndyiwa Sefa,”* ou vali umwe uti “Ame ndyiwa Kilisitu.” 13 Okuti Kilisitu weliyapauka? Paulu nae wapapelelwe momuti ayovole onwe? Ine onwe mwambatisalwa menyina lya Paulu? 14 Ame ndyipandula Huku mokonda pwoonwe hambatisalele-po nawike, ovo Kilisipu+ vala na Ngayu,+ 15 nawike mati onwe mwambatisalwa menyina liange. 16 Otyili, ava tupu nambatisala ovo meumbo lya Sitefana.+ Mahi ovakwavo ava, hityii ine ndyina vali ou nambatisalele. 17 Kilisitu wanthuma, mahi kanthumine ndyimbatisale, wanthuma ndyipopie oviwa ovipe;+ mahi hanonondaka ononene* opo omuti wemone* wa Kilisitu wahalinge ngoti utupu etyi wakalela-ko.
18 Mokonda ondaka ipopia omuti wemone,* ilinga yowova ko vokuli mondyila yehanyauno,+ mahi kwoonthwe vokuli nokuyovolwa, ondaka oyo yalinga ononkhono mba Huku.+ 19 Tyahonekwa-le tyatiwa: “Ounongo wovanthu mandyikeumana-ko, okwalunguka kwo vokwatanga mandyikekwaanya.”*+ 20 Pahe pounongo wovanthu pelipei? Pahe tyilipei tya ava vei ovitumino?* Ulipei pahe wokutovolondya evi viouye uno?* Okwatonkhoka kwouye ou, Huku kekutwaile umwe no koundamba? 21 Mokonda mounongo wa Huku, ouye kawanoñgonokele Huku+ kounongo wao,+ Huku wahambukilwa umwe mwene tyoundamba+ weetyi tyipopiwa, ayovole ava vetavela.
22 Ova Sundaa vaita ovilekesa,+ ava ova Ngeleku vafweva tyounongo; 23 mahi onthwe tupopia Kilisitu waipaelwa momuti, ngwe kova Sundaa otyo tyivetokesa, ko vomihoko omikwavo otyo oundamba.+ 24 Ngwe ku ava vokwaihanwa, tyati umwe nova Sundaa nova Ngeleku, Kilisitu oe ononkhono mba Huku, oe ounongo wa Huku.+ 25 Tya Huku tyouhima ounongo watyo upona wovanthu, etyi tya Huku tyayengenga, ononkhono mbatyo mbupona mbovanthu.+
26 Onwe ngeetyi mutyilweete vanthu vetu, pwoonwe aihana, kovanthu kamuvanyingi-ale ovanongo,*+ kamuvanyingi vononkhono, kamuvanyingi vatuka momanene atyo,*+ 27 mahi Huku waholovona ovipuka viatopa viouye opo akundise ovanongo vatyo; Huku waholovona ovipuka viayengenga viouye opo akundise ovipuka viokwapama;+ 28 Huku waholovona ovipuka viahasilivila viouye, ovipuka viatombuwa, ovipuka viahatiwa-le ovievi, opo apole omafa ovipuka vitiwa-vo matiwa ovio,+ 29 pahamone ou ulimphandela* komaiho a Huku. 30 Omu Huku tyatunda tyo onwe okuhonya na Kilisitu Sesusi, ou wahololola umwe nounongo wa Huku, nokuviukisa+ kwatyo, tupu oe ovanthu vatilwa ovasukuki,+ o motyilikutila vayovokela,+ 31 tyeende umwe ngeetyi tyahonekwa tyatiwa: “Ou ulimphanda, elimphandele mu Siovaa.”*+