Omukanda wo Tete wa Samuwele
18 Konyima yetompho olio ovo Ndaviti na Saulu vakala nalio, ovo Sonataa+ na Ndaviti avakala omapanga omanene,* Sonataa ahimbika okuhumba Ndaviti, ngeetyi mwene elihole.*+ 2 Okutuka monthiki oyo, Saulu akala na Ndaviti, ehemuyeke akondoke keumbo lya tate yae.+ 3 Sonataa na Ndaviti avalingi omphango,+ mokonda Sonataa ankho umuhole ngeetyi mwene elihole.*+ 4 Sonataa elipolo otyikapote tyae tyehena omankhanya etyiavela Ndaviti, emwavela novikutu viae viovilwa, nomutunga wae, nonkhondyi yae, nepoha liae. 5 Ndaviti ahimbika okwenda movilwa, oku amatumwa na Saulu ankho ufinda ovilwa.*+ Mokonda yotyo, Saulu emulingi onkhalamutwe yomafwalali ovita, otyo atyihambukiswa ovanthu aveho,+ novaundapi va Saulu.
6 Putyina Ndaviti nomafwalali omakwavo vamaipaa ova Filisitiya, ovakai vomapunda-umbo aeho ova Isilayeli valupuka-mo nehambu enene opo vakahonyene Nohamba Saulu otyo vaimba,+ nokunyana otyo vahika ono pandelu+ novihumba. 7 Ovakai ovo valinga otyipito avaimbi okuti:
“Saulu waipaa ovityita novityita,
Mahi Ndaviti waipaa omakwii nomakwii ovityita.”+
8 Saulu anumana unene,+ otyiimbo otyo ehetyihande, ati: “Ndaviti vati waipaa ovityita omakwii nomakwii ovityita, mahi ame vati naipaa vala ovityita novityita. Otyipuka vakamba vala okumupa ouhamba!”+ 9 Okutuka monthiki oyo, Saulu ankho ulungila vala Ndaviti.
10 Onthiki yalandula-ko, Huku ayeke omalusoke omavi a Saulu+ emumonese ononkhumbi, ahimbika okulinga ovipuka ngotyova* mokati kondywo yae, Ndaviti otyo ahika otyisandyi+ ngeetyi alinga-le. Saulu ankho una eonga peke;+ 11 ayumbu eonga,+ elipopila okuti: ‘Mandyipapelela Ndaviti motyimato!’ Wetyilingile tuvali mahi Ndaviti ayepe. 12 Pahe Saulu akala nowoma na Ndaviti, mokonda Siovaa ukwatesako Ndaviti,+ wayeka-po Saulu.+ 13 Saulu emupolo ponthele yae, emunake alinge onkhalamutwe yovityita ekwii, Ndaviti ahongolela ovita movilwa.*+ 14 Ndaviti ovipuka aviho ankho alinga vienda nawa,*+ Siovaa umukwatesako.+ 15 Etyi Saulu amona okuti evi Ndaviti alinga vienda nawa, pahe emutili owoma. 16 Mahi ova Isilayeli aveho nova Sundaa ngwe vehole Ndaviti, mokonda oe uvehongolela movilwa.
17 Konyima Saulu apopila Ndaviti okuti: “Omona wange omukulu watyo Melambe oyou.+ Mandyikwavela-e, akale omukai wove.+ Mahi twalako okulekesa okuti wakola omutima, otwalako okulwa movilwa vya Siovaa.”+ Wapopia ngootyo mokonda Saulu ulipopila okuti: ‘Ahankhie kokuvoko kwange, akaipawe nova Filisitiya.’+ 18 Ndaviti apopila Saulu ati: “Pahe ame ame-lie, tyina utala tate wandyeta, otale mombunga natunda mo Isilayeli, ame ame-lie ndyikalinga he-ivi yohamba?”+ 19 Mahi tyina tyiti monthiki Saulu mayeke omona wae Melambe velinepe na Ndaviti, uvasa wapewa-le Andiliyeli,+ omu Meolaa alinge omukai wae.
20 Ngwe Mikale omona wa Saulu+ wahanda Ndaviti, avetyipopila Saulu, Saulu ahambukwa. 21 Ngootyo, Saulu asoko okuti: “Mandyimwavela-e opo akale eliva liae, opo ova Filisitiya vemwipae.”+ Saulu apopila vali Ndaviti lya vali ati: “Hono monepe omona wange okala tate-ivi.”* 22 Tyihe-otyo vala, Saulu atumu ovaundapi vae okuti: “Tompholei na Ndaviti pokamphengi, mupopilei okuti: ‘Ohamba yekupanda, ovaundapi vayo aveho vekuhole. Tavela okukala he-ivi yohamba.’”* 23 Etyi ovaundapi va Saulu vetyipopila Ndaviti, ngwe ati: “Onwe mwati hamwe tyapepuka omunthu wahepa, uyelwe ngaame okukala he-ivi yohamba?”*+ 24 Ovaundapi va Saulu avemupopila etyi Ndaviti apopia.
25 Saulu ati: “Popilei Ndaviti okuti: ‘Ngokufeta, ohamba maihande vala okupewa ovikova+ 100 vyo komapita+ ova Filisitiya opo ohamba ikondolele otyivi notyivi onondyale mbayo.’” Saulu wahandele Ndaviti aipawe nova Filisitiya. 26 Ovaundapi vae avakapopila Ndaviti onondaka ombo, otyo atyihambukiswa Ndaviti okukala he-ivi yohamba.+ Tyina nkhele ononthiki apewa mbwehenepwe, 27 Ndaviti aende nomafwalali ae, aipaa ova Filisitiya 200, atwala ovikova vyo komapita ova Filisitiya aveho aipaa kohamba, opo akale he-ivi yohamba. Ngootyo Saulu emwavela omona wae Mikale akale omukai wae.+ 28 Saulu anoñgonoka okuti Siovaa ukahi nokukwatesako Ndaviti,+ Mikale omona wae uhole unene Ndaviti.+ 29 Mokonda yotyo, Saulu akala vali nowoma na Ndaviti, akala ondyale ya Ndaviti omwenyo wae auho.+
30 Ovatumini vova Filisitiya venda kovilwa, mahi apeho tyina vamalu, Ndaviti oe utyivila vali okulwa* kovaundapi ovakwavo va Saulu,+ enyina liae alilingwa onthilo.+