Okutunda
32 Etyi ovanthu vamona okuti Mwisesi ukahi nokuseta okutuluka komphunda,+ aveliongiya pu Alau avati: “Tulingile-ko otyika-huku matyituhongolela,+ mokonda katutyii oityi tyamoneka na Mwisesi, omulume wokwetupola kotyilongo tyo Isitu.” 2 Alau evetolela okuti: “Polei onombilingu mboolu komakutwi+ ovakai venyi no ovana venyi ovakwendye novakainthu, amumbweta kwaame.” 3 Ovanthu aveho avelipolo onombilingu mboolu komakutwi, avembutwala ku Alau. 4 Akwata oolu aiho vaeta, einthili otyilolo tyikahi ngonthane avati:+ “Onwe va Isilayeli, ou o Huku yetu wokwetupola kotyilongo tyo Isitu.”+
5 Etyi Alau etyimona, atungu omutala wovilikutila komutwe wonthane. Alau akalavandya ati: “Muhuka matulingila otyipito Siovaa.” 6 Muhuka tyee avapinduka-po, avalingi oviawa viokuyokwa novilikutila viombembwa. Etyi vamana, ovanthu aveho avapumphama valie, vanwe. Pahe avakatuka avai mokunyana.+
7 Siovaa apopila Mwisesi okuti: “Tuluka, mokonda ovanthu ove wapola kotyilongo tyo Isitu valinga otyipuka otyivi.+ 8 Vayapuka liwa mondyila nevetuma okwendela.+ Velilingila* otyilolo tyikahi ngonthane, oko vekahi nokulipetamena nokwava ovilikutila, otyo vati: ‘Onwe va Isilayeli, ou o Huku yetu wokwetupola kotyilongo tyo Isitu.’” 9 Siovaa apopila vali Mwisesi okuti: “Namona okuti ovanthu ava onomphwililiki.*+ 10 Onyengo yange yankhinduka, wahanthyilike ndyivenyime-ko. Puvo mandyipingiya-po ove, mwoove amukatuka ovanthu ovanyingi.”+
11 Mwisesi aiti ku* Siovaa Huku yae,+ ati: “Siovaa ove wapola ovanthu vove kotyilongo tyo Isitu nononkhono ononene, nokuvoko kwapama. Omokonda yatyi monkhindulila onyengo yove?+ 12 Ova Isitu vapondola okupopia okuti: ‘Wevepola kuno motyilongo tyo Isitu opo evelinge etyi tyapenga; wahanda okuveipaela konomphunda, evenyimi kouye.’+ Yeka-po onyengo yove, likondola, ohaetela vali ovanthu vove ononkhumbi. 13 Hinangela ovaundapi vove Ambalayau, na Isake, na Isilayeli, vana waanene menyina liove, oti: ‘Vana mavakatuka mwoove* mavekelityita unene, avakakala ovanyingi ngononthungululu mbo meulu,+ otyilongo etyi atyiho nekulekesa mandyiketyiavela vana vakatuka mwoove, atyikakala tyavo atee-tee.’”+
14 Siovaa elikondola, ahaeta vali ononkhumbi maa aetela ovanthu vae.+
15 Mwisesi akondoka, atuluka komphunda nomamanya evali omapapi Oumbangi+ pomavoko.+ Omamanya oo ahonekwa na nthele na nthele, no komutwe no konyima. 16 Omamanya omapapi+ atungwa na Huku, etyi tyahonekwa-mo o Huku wetyihoneka-mo. 17 Etyi Susuwee eiva ovanthu vekahi nokuviela, apopila Mwisesi ati: “Ndyiivite ovanthu vekahi nokulwa monthanda.” 18 Mwisesi ati:
“Mahi kavekahi nokuviela tyokwatilisa onondyale,*
Tupu hatyokuliyava mokonda vatila konondyale;
Etyi ndyiivite otyikwavo.”
19 Etyi Mwisesi ehika ponthele ponthanda, amono onthane+ novanthu vekahi nokunyana, onyengo yae ainkhinduka, ayumbu pohi omamanya omapapi ena-o peke, aatyatyaukila menyi liomphunda.+ 20 Akwata onthane valingile, eipake motupia, eityopa-tyopa,+ eihandaulila komaande, omaande atyo eavela ova Isilayeli vanwe.+ 21 Mwisesi apulu Alau okuti: “Oityi ovanthu ava vekulinga, wevelingisisa onkhali onene ngeei?” 22 Alau akumbulula okuti: “Wahanumane tatekulu. Ove utyii okuti omutima wovanthu ava wayemba vala kokulinga ovipuka ovivi.+ 23 Vamphopila okuti: ‘Tulingile-ko otyika-huku matyituhongolela mokonda katutyii oityi tyamoneka na Mwisesi, omulume wokwetupola kotyilongo tyo Isitu.’+ 24 Ame andyivepopila okuti: ‘Una una ovipuka viokulifiwiswa vioolu elipole-vio, evieta kwaame.’ Etyi vevieeta, andyivipake motupia, andyivilingi onthane ei.”
25 Mwisesi amono okuti Alau kevetyilikile, mokonda yotyo avalingi otyipuka tyikundisa konondyale mbavo. 26 Mwisesi atalama pombundi yonthanda ati: “Olie wahula ku Siovaa? Eye kwaame!”+ Vomuhoko wa Levii aveho aveya no kwe. 27 Evepopila okuti: “Siovaa Huku yo Isilayeli wati: ‘Manekei omitunga vienyi, amweende monthanda, amwipaa vana mulilandula navo, no vomunthele yenyi nomapanga enyi, okuhimbikila nthele imwe amukavitula konthele onkhwavo.’”*+ 28 Vomuhoko wa Levii avalingi etyi Mwisesi evetumine. Onthiki oyo avaipaa ovalume 3.000. 29 Mwisesi evepopila okuti: “Lisukukisei* muundapele Siovaa, mokonda onwe mwaipaa ovana venyi na vana mulilandula navo.+ Hono memuyambe.”+
30 Muhuka tyee, Mwisesi apopila ovanthu okuti: “Onwe mwalinga onkhali imwe onene. Pahe mandyende komphunda ku Siovaa, andyikemwitila-ko. Hamwe weevela onkhali yenyi.”+ 31 Mwisesi aende komphunda ku Siovaa, ati: “Tala onkhali onene ovanthu ava valinga! Velilingila otyika-huku tyoolu.+ 32 Pahe ine tyitavela, evela onkhali valinga;+ okuti katyitavela, nyima enyina liange momukanda wahoneka.”+ 33 Siovaa apopila Mwisesi okuti: “Mandyinyimi momukanda wange enyina lya una walinga onkhali kwaame. 34 Pahe enda, twala ovanthu komphangu nekupopila. Oandyu yange maipiti komutwe wove;+ monthiki mandyikeveongela omphela, mandyikevemonesa ononkhumbi mokonda yonkhali valinga kwaame.” 35 Siovaa aetela ovanthu ovihuna mokonda vatumine Alau evelingile-ko onthane.