Omukanda wa Vali Ehipululo
5 Ngootyo, Salomau amane ovilinga aviho ena okulinga viondywo ya Siovaa.+ Pahe Salomau apake mokati ovipuka tate yae Ndaviti apakulile vilinge omalumono akola,+ nopalata, noolu, novityuma aviho violumono lwondywo ya Huku yotyotyili.+ 2 Pononthiki opo, Salomau aongiya ovakulu aveho vo Isilayeli, nononkhalamutwe mbomihoko nonohongoi mbonombunga mbova Isilayeli. Aveya mo Selusalei opo vakapole Otyikasa Tyomphango tya Siovaa Kepunda-umbo lya Ndaviti+ ko Siyau.+ 3 Ovalume aveho vo Isilayeli aveliongiya pohamba motyipito* tyilingwa mohanyi ya pandu-vali.+
4 Ovakulu aveho vo Isilayeli aveya, ovana va Levii avatyindi-po Otyikasa.+ 5 Avatyindi-po Otyikasa nekaka liomaliongiyo,+ novityuma aviho vikola vili mekaka. Ovanakwa no vomuhoko wa Levii* avevitwala no kombanda. 6 Ohamba Salomau novanthu aveho vo Isilayeli vaihanwa opo vekeliongiye nae, vali komutwe Wotyikasa; avalingi onongi ononyingi ovilikutila,+ nonongombe mbehevilwa okuvalulwa. 7 Ovanakwa avatwala Otyikasa Tyomphango tya Siovaa pomphangu yatyo, mondywo yo mokati, Momphangu Ikola Unene, avetyipake mombwelo yomavava ono kelumbii.+ 8 Omavava ono kelumbii atandavela keulu Liotyikasa. Otyikasa novikwatelelo viatyo,+ avikala mombwelo yono kelumbii. 9 Ovikwatelelo ovilaale unene, onondungu mbavio mbumoneka Komphangu Ikola komutwe wondywo yomokati, mahi kambumonenwa kondye. Ovikwatelo na hono opo vikahi. 10 Motyikasa mutupu natyike, muna vala omavai evali apakelwe-mo na Mwisesi ko Holembe,+ etyi Siovaa alinga omphango+ nova Isilayeli pokwatunda ko Isitu.+
11 Ovanakwa avalupuka momphangu ikola (mokonda ovanakwa aveho vali-po vokwatunda movikundyi viatyo+ aviho, velisukukisile).+ 12 Ovana aveho va Levii ovaimbi+ vahula ku Asafe+ no ku Hemaa,+ no ku Sendutuu,+ no kovana vavo, no ku vana velikwai navo, ankho vavala omivalo viokwankhimana, vetai koutundilo womutala wovilikutila, otyo vahika omalata, novihumba, novisandyi, kumwe novanakwa vena 120 vahika ononkhwino.+ 13 Vokuhika ononkhwino, novaimbi ankho vapandulila kumwe Siovaa nondaka ike vala, nokumuhilivika. Tyina ononkhwino mbuhikila kumwe nomalata, novihumba, ngwe otyo vahilivika Siovaa “mokonda omuwa, olwembia lwae olunene lutwalako apeho.”+ Poola yatyo opo mondywo, mondywo ya Siovaa, amuyula ekaka.+ 14 Mokonda yekaka, ovanakwa avehetyivili vali okukala-mo opo valinge ovilinga viavo, tyeetyi onohanya mbomunkhima wa Siovaa, mbeyula mondywo ya Huku yotyotyili.+