Isekiyele
31 Menima 11, mohanyi ya tatu, monthiki yo tete kohanyi, ondaka ya Siovaa aindyendela vali aiti: 2 “Mona womulume, popila Falaoo ohamba yo Isitu, novanthu vae aveho+ uti:
‘Ove pahe kounene olie mulifwe nae?
3 Kwali omu Asilia umwe, omusendulu wo ko Limbanu,
Wali nonompha onongwa, uti vala otyiteta tyeeta otyihi, waya unene peulu.
Ondungu yao yakatoma pokati komakaka.
4 Omaande eukulisile aulingi omunene, onondyivi-ndyivi mbokwaya kohi ambuutwala no peulu.
Wali pokati komaande ahateka, opo watwikilwe.
Omilola vionondongi ovio vitalaleka omiti aviho viotyilongo.
5 Otyo wekulilile aweende vali unene peulu komiti aviho viotyilongo.
Onompha mbatyo ambutandavela, onondyovo mbatyo ambulingi ononde,
Mokonda yomaande ao omanyingi.
6 Oviila aviho viomeulu avitunga-tunga ovityiyu monompha mbatyo,
Ovinyama aviho viomohika avityitila mombwelo yonompha mbao,
Ovanthu aveho vovilongo avakala motyihi tyao.
7 Aulingi omunene no kouwa no konompha mbatyo,
Mokonda omii viao viehika momaande omanyingi.
8 Kamwali vali omusendulu nawike ulifwe nao mepia lya Huku.+
Kakwali omungalaviya nawike una onondyovo ngo mbao,
Kakwali omuti nawike wo melola una onompha ngo mbao.
Nii mepia lya Huku, kamwali omuti nawike weelekwa nao kouwa.
9 Ame neulingile omuwa, neupakele omafo omanyingi,
Omiti aviho vyo mo Endene, epia lya Huku yotyotyili, ankho viuulwa onkhi.’
10 “Etyi otyo tyapopia Tatekulu Ohamba Onene Siovaa wati: ‘Mokonda walinga* omulaale unene, ondungu yao yakatoma pokati komakaka, omutima wao pahe welipaka-ko welihapela oule wao, 11 ame mandyikeupakula komutumini omunene wovanthu vovilongo.+ Oo, mekeukatukila, ame mandyikewaanya kombanda yovivi viao. 12 Ononthunda-vilongo, ovakalavi vali povanthu vovilongo mavekeutyoka-po avekeusa monomphunda, omafo ao maakatokela momalola aeho, onompha mbao mambukatyokwa-ko ambukatokela monondongi ambuho mbotyilongo.+ Ovanthu aveho kombanda yohi mavakatunda-mo motyihi tyao, avekeusa-po. 13 Oviila aviho viomeulu mavikakala kotyihingi tyao tyawa, ovinyama aviho viomohika mavikakala konompha mbao.+ 14 Otyo matyeende ngootyo, opo omiti vili pomaande viahalinge unene omilaale, ondungu yavio yahakatome pokati komakaka, opo omiti aviho vili pomeva viehehike-po, viahalinge omilaale unene. Mokonda omiti aviho mavikaipawa, mavikapakwa kohi yeheke, navio novanthu vokuli nokwenda no metoto.’*
15 “Etyi otyo tyapopia Tatekulu Ohamba Onene Siovaa, wati: ‘Monthiki maukalauka kondyembo,* ovanthu aveho mavakalula. Otyo ame mandyikaikila omaande okohi, andyikapata omilola viao, omaande omanyingi atalame. O Limbanu mandyikeiyumba enthiki kombanda yao, omiti aviho vyo mepia mavikauvuka. 16 Omuhindo wao pokuwa, oo mankhatuñgunya nao ovanthu vovilongo, tyina wamatoko-po, andyiutwala kondyembo,* nao naava veli nokwenda no metoto,* nomiti aviho vyo mo Endene,+ omiti omiwa viatyo, vikahi vali nawa vyo ko Limbanu, aviho viokwatalalekwa nawa, mavikaungumanesilwa kohi yeheke. 17 Omiti ovio viaya nao kondyembo* ko vokwankhia komutunga,+ navo no vokwaama ku-o,* ava vakalaile motyihi tyao movanthu vovilongo.’+
18 “‘Pomiti vyo mo Endene, oupi weelekwa noove kouwa no kounene?+ Mahi ove tyotyili, mokatokehilwa pohi kumwe nomiti vyo mo Endene, okehika kohi yeheke. Mokalangala pokati ko vokwahapitile ekwendye, po vokwankhia komutunga. Otyo otyo matyikalingwa Falaoo, nae novanthu vae aveho,’ o Tatekulu Ohamba Onene Siovaa wetyipopia.”