Omukanda wo Tete Onohamba

7 Salomau wakalele omanima 13 nokutunga ondywo*+ yae mwene atee eimana.+

2 Atungu Ondywo yo Motyiteta tyo Limbanu,+ ankho ina onokovandu* 100 moule, nonokovandu 50 mounthanda, nonokovandu 30 motyitai ankho ikala komitete vikwana vionomphandyi mbomusendulu;+ keulu lionomphandyi ankho kuna onondyako mbomusendulu. 3 Onthele yo keulu ankho yavandekwa omavai omusendulu keulu liomitaleko ankho vikahi konomphandyi; ankho vina 45, momutete wike 15. 4 Ankho ina omitete vitatu vionondyanena mbokuna oumphana-oumphana, onondyanena ombo ankho mbelipilukila nononkhwavo mononkhalelo ononthatu. 5 Ankho tyati onombundi mbatyo, omiti viokukwata omapito, vina ononthele ononkhwana* ngeetyi tyikahi komutwe wonondyanena mbokwelipilukila nononkhwavo mononkhalelo ononthatu.

6 Atungu Endywo liomwombelo* Lionomphandyi, lina onokovandu 50 moule, nonokovandu 30 mounthanda; komutwe atungu-ko ondywo yokunyingilila ina onomphandyi notyikulilo.

7 Tupu atungu vali Endywo liomwombelo* liotyipundi Tyoutumini,+ omu ankho makoyesila onomphela,+ Endywo Liokukoyesila. Elimate nomavai omusendulu okutuka pohi atee momitaleko.

8 Ondywo* omu ankho makala kepata ekwavo,+ kokule Nendywo liomwombelo, ankho yatungwa otyipuka tyike. Tupu Salomau atungila omona wa Falaoo ankho omukai wae ondywo ankho yelifwa Nendywo liomwombelo.+

9 Atyiho otyo atunga, okutuka kelisesu atee keulu liovimato,+ no kondye atee kepata enene, ankho wetyitunga nomamanya okulanda onombongo ononyingi, aviukiswa nawa notyiheteko aatetwa nomateto omamanya, tyilinge kondye, tyilinge mokati.+ 10 Elisesu ankho liatungwa nomamanya omanene, alanda onombongo ononyingi; amwe ankho ena onokovandu 10, omakwavo ankho onokovandu etyinana. 11 Kombanda yao, ankho kwapakwa omamanya okulanda onombongo ononyingi aviukiswa nawa notyiheteko, nomavai omusendulu. 12 Okuliseta nepata enene ankho kuna otyimato tyatungwa nomitete vitatu viomamanya okwaviukiswa, nomutete womavai omusendulu, ankho tyelifwa notyimato tyepata lyo mokati+ kondywo ya Siovaa, notyimato tyondywo yokunyingilila.+

13 Ohamba Salomau atumu vakapole Hilau+ ko Tilu. 14 Hilau ankho omona womukai omuhepe womuhoko wa Nafitalii, tate yae oe ankho unthila ovivela viotyitasu+ vio ko Tilu. Una oufwisu, nounongo, nenoñgonoko+ liokulinga ovilinga aviho novivela viotyitasu.* Eya kohamba Salomau, aundapa movilinga aviho apelwe.

15 Pahe atungu onomphandyi onombali mbotyivela otyitasu.+ Onomphandyi ambuho ankho mbuna onokovandu 18 mokutai, apesukisa epanda liokuheteka lina onokovandu 12, malilisete mounene wonomphandyi.*+ 16 Tupu alingi omitwe vivali viotyivela otyitasu opo vipakwe keulu lionomphandyi. Omutwe umwe ankho una onokovandu ononthano mokutai omukwavo nao ankho una onokovandu ononthano mokutai. 17 Omutwe wonomphandyi ankho una owanda womalienge elipondaikinya;+ omutwe wike una omalienge epandu-vali, omutwe omukwavo nao una omalienge epandu-vali. 18 Alingi omitete vivali viomalomaa* eliseta nowanda opo ahike omitwe ankho vikala keulu lionomphandyi; tupu ngatyo alinga omitwe ovio vivali. 19 Omitwe viokuli peulu lionomphandyi mbondywo yokunyingilila ankho vielifwa nonthemo ina onokovandu ononkhwana mokutai. 20 Omitwe vivali ankho vikala peulu lionomphandyi onombali pana peliseta elola, apa pawingilwa omawanda; ankho omitwe aviho ankho vina omitete viomalomaa* 200 vieliseta navio.+

21 Apake onomphandyi mbondywo yokunyingila mondywo ya Huku.*+ Apake omphandyi yo kokulio* eiluku okuti o Sakii,* apake omphandyi yo kokumbili* eiluku okuti o Mbowasi.*+ 22 Peulu lionomphandyi ankho pekahi ngonthemo. Pahe ovilinga viokutunga onomphandyi avipu.

23 Atungu Elunga* liotyivela tyokwayokwa.+ Lieliseta elola, omwoyo watyo una onokovandu 10, mokutai lina onokovandu 5, tyesukisile epanda liokuheteka lina onokovandu 30 opo lilisete nalio.*+ 24 Mombwelo yomwoyo okuliseta nalio aliho,+ liayolwa-yolwa ounthenda, mokovandu ike ononthenda 10, okuliseta Nelunga aliho, nomitete vivali viononthenda mbotyivela mbayokwa ambumatwa Kelunga. 25 Elunga olio liali kombanda yononthwei 12,+ 3 mbapilukila kombanda, 3 mbapilukila koutakelo, 3 mbapilukila kombwelo, 3 mbapilukila koutundilo. Elunga olio lipumphi kombanda yambo, onongombe ombo ambuho mbatyindamena mulio. 26 Omulita walio mounthanda* ulifwe peke, omulungu walio walingwa ngomulungu wolufo, ukahi ngonthemo. Munyingila onombatu 2.000.*

27 Pahe alingi outuku-tuku* 10+ wotyitasu. Outuku-tuku auho ankho una onokovandu ononkhwana moulaale, nononkhwana mounthanda, nononthatu mokutai. 28 Outuku-tuku oo ankho watungwa ñgaa: wapakwa omalutalatu* omononthele, omalutalatu oo ankho apakwa pokati kominthinda. 29 Momalutalatu omononthele pokati kominthinda ankho pena ononkhulika,+ nonongombe ononthwei, nono kelumbii,+ mominthinda ovio ankho muna ñgoo omalutalatu ngoo. Kombanda yononkhulika, no konongombe ononthwei, no mombwelo yambo ankho muna ominthinda vieliponda-ponda. 30 Outuku-tuku ankho una omalola ekwana otyitasu, nomuwesu wotyitasu, ankho wakwatela movivela vyo pomavindi.* Mombwelo yombasiya ankho muna onondyako mbuna ominthinda vieliponda-ponda mononthele. 31 Omulungu wombasiya ankho uli mokati komulami ankho una okovandu ike motyitai; omulami oo ankho weliseta elola, kumwe nondyako ankho wakala ondyalo ina okovandu ike notyihupe motyitai, omulami ankho una omalutalatu. Omalutalatu ao omononthele ankho kaelisetele elola, ena omavindi ekwana. 32 Omalola ekwana okatuku-tuku ankho akala mombwelo yomalutalatu omononthele, onololamendu mbomalola ankho mbweekwatela mokatuku-tuku, omalola ankho ena okovandu ike notyihupe motyitai. 33 Omalola okatuku-tuku ankho ekahi ngomatemba ovilwa. Onololamendu mbatyo, nonondyandi, nonolayu, nonokumbu ambuho ankho ombovivela viokwayokwa. 34 Outuku-tuku ankho una onondyako ononkhwana pononthele; onondyako ombo ankho ovivela vianthililwa-ko avilikwate* nokatuku-tuku katyo. 35 Keulu liokatuku-tuku ankho kuna otyivela tyeliseta elola tyina omeya-kovandu; keulu oko liokatuku-tuku, omwoyo watyo, nomalutalatu omononthele ankho anthililwa-ko aelikwate* nokatuku-tuku. 36 Kombanda yomwoyo no komalutalatu omononthele, anthindi-ko ono kelumbii, nononkhulika, nomindende, mokati komioyo aviho, tupu apake-ko ominthinda vieliponda-ponda.+ 37 Ongootyo ankho alinga outuku-tuku 10;+ auho ankho watungwa otyipuka tyike,+ ankho ulifwe tupu welifwa.

38 Alingi onombasiya 10 mbotyivela otyitasu;+ ike ankho ityinda onombatu 40. Tupu onombasiya ambuho ankho mbuna onokovandu ononkhwana.* Outuku-tuku auho 10 ankho una ombasiya ike-ike. 39 Pahe apake outuku-tuku utano kokulio kwondywo, oukwavo utano eupake kokumbili kwondywo, Elunga elipake kokulio kwondywo, aliihulu kombanda.+

40 Hilau+ tupu alingi onombasiya, nonopaa,+ novilindo.+

Hilau amane ovilinga aviho alingila ohamba Salomau, viondywo ya Siovaa:+ 41 Onomphandyi onombali,+ nomitwe viatyo vikahi ngomaholo vili keulu lionomphandyi; nomawanda evali+ okufika omitwe viokukahi ngomaholo vili keulu lionomphandyi onombali; 42 nomalomaa 400+ o komawanda evali okufika omitwe vionomphandyi onombali viokukahi ngomaholo. Omawanda aeho ali nomitete viomalomaa. Tyati ou una omitete vivali, ou una omitete vivali; 43 noutuku-tuku 10,+ nonombasiya 10+ mbuli kombanda youtuku-tuku; 44 Elunga+ nononthwei 12 mbo mombwelo Yelunga; 45 noviyukilo vietwe, nonopaa, novilindo, novityuma aviho Hilau alingila ohamba Salomau notyitasu tyasolwa nawa viondywo ya Siovaa. 46 Ohamba aivilingila kotyilongo tyo Solondau, pokati ko Sukote no Saletaa nofoloma yeema.

47 Salomau ahaheteka ovityuma mokonda ovinyingi unene. Otyitasu katyapeyalelwe.+ 48 Salomau alingi ovityuma aviho vyo mondywo ya Siovaa: omutala wovilikutila+ woolu; nomesa+ yoolu opo kupakwe onombolo mbotyiawa; 49 ovikandiyelo+ vioolu yatyo mwene, vitano kokulio vitano kokumbili, ankho vikala komutwe wondywo yo mokati; nononthemo,+ nonolambata, novivela viokunyima* vioolu;+ 50 onombasiya, no viokunyima omutemo,+ novilindo, nomalufo,+ novitenyo,+ vialingwa noolu yatyo mwene; ovivela vioolu viokukwata omapito ondywo+ yo mokati Omphangu Ikola Unene, nomapito ondywo aiho ya Huku+ wevilingile noolu.*

51 Ngootyo Ohamba Salomau amane ovilinga aviho ena okulinga viondywo ya Siovaa. Pahe Salomau apake mokati ovipuka tate yae Ndaviti apakulile vilinge omalumono akola,+ nopalata, noolu, novityuma aviho violumono lwondywo ya Siovaa.+