Omukanda wa Vali Ehipululo
9 Onkhai-hamba yo ko Sambaa+ yeivile omunkhima wa Salomau. Ayiende ko Selusalei opo ikalole Salomau nomapulo epwilisa unene.* Yalandulwa novanthu ovanyingi* nomakamelu atyinda omulela wombasamu, noolu onyingi-nyingi,+ nomamanya omawa. Eya ku Salomau emupopila atyiho ena-tyo momutima.+ 2 Salomau akumbulula omapulo ayo aeho. Petupu natyike tyepwilisile* Salomau okumuhangununina.
3 Etyi onkhai-hamba yo ko Sambaa yamona ounongo wa Salomau,+ nondywo atunga,+ 4 novikulia viae,+ novaundapi vae tyina vapumphama, novilinga vilingwa no vokupaka okulia komesa, novikutu vavala, no vokupaka ovikunwa komesa, novikutu viavo, novilikutila viokuyokwa alinga apeho mondywo ya Siovaa,+ aihuvu unene.* 5 Aipopila ohamba okuti: “Atyiho neiva kotyilongo tyange konthele yovilinga viove,* nounongo wove, naina otyili umwe. 6 Mahi netavela vala ku etyi neiva, etyi neya, andyilitalela-ko nomaiho ange mwene.+ Tala! Etyi vantholela konthele younongo wove omunene, naina katyihi-ale.+ Etyi namona, tyilamba-po unene pweetyi neiva konthele yove.+ 7 Ovanthu vove, novaundapi vove vena ehambu mokonda apeho vekahi ponthele yove otyo vatehelela ounongo wove! 8 Siovaa Huku yove ankhimanekwe, una wekuhambukilwa, ekupake kotyipundi tyoutumini opo ukale ohamba menyina lya Siovaa Huku yove. Mokonda Huku yove uhole ova Isilayeli,+ tupu wahanda vakale-ko apeho, wekunaka ukale ohamba maitumina nouwa nouviuki.”
9 Ayiavela ohamba onotalendu* 120 mboolu,+ nomulela omunyingi-nyingi wombasamu, nomamanya omawa. Motyilongo kamuneetwe vali omulela wombasamu ulifwe pu una onkhai-hamba yo ko Sambaa yaetelele Ohamba Salomau.+
10 Tupu ovaundapi va Hilau nova Salomau vokwakapolele oolu ko Ofili,+ vaetele omavai omusandalu, nomamanya omawa.+ 11 Ohamba aipolo omavai oo omusandalu, aitungu nao onondondelo mbondywo ya Siovaa,+ no mbondywo* yohamba,+ novisandyi, novihumba viovaimbi.+ Motyilongo tyo Sundaa kamunekale omavai nga ana.
12 Ohamba Salomau tupu waavelele onkhai-hamba yo ko Sambaa, atyiho ihanda, neetyi yaitile. Weyaavelele vali ovipuka ovinyingi tyipona evi yaetelele* ohamba. Pahe aikatuka, aikondoka kotyilongo tyayo novaundapi vayo.+
13 Oolu Salomau apewa nima na nima, ipeyala onotalendu 666,+ 14 tyahavalula oolu nopalata Salomau aetelwa novalandesi, novakwa-vitanda, nonohamba ambuho mbova Alambe, novatumini votyilongo.+
15 Ohamba Salomau alingi onondyakulilo 200 ononene mboolu yahonyaikwa+ (ondyakulilo ike ilema onosikulu* 600 mboolu),+ 16 nonondyakulilo 300 ononthutu* mboolu (ondyakulilo ike ilema onomina* ononthatu mboolu). Ovipuka ovio ohamba aivipake Mondywo yo Kotyiteta tyo Limbanu.+
17 Ohamba tupu ailingi otyipundi tyoutumini nomayo ondyamba, aityihoto noolu yakangulwa.+ 18 Opo uhike potyipundi tyoutumini, pena ondondelo ina omatyeko epandu, notyiliatelo tyoolu tyaima kotyipundi; pokupumphamena pena ovipuka viokuyaka omavoko, vina ovilolo viononkhulika.+ 19 Komatyeko epandu kuna ononkhulika 12,+ ketyeko like kuna onombali-onombali, ike-ike kononthele. Petupu ouhamba nawike una otyipundi tyoutumini nga tyina. 20 Omalufo aeho Ohamba Salomau, oolu. Ovityuma aviho vyo Mondywo yo Motyiteta tyo ko Limbanu, tupu o vioolu yakangulwa nawa. Mutupu otyipuka natyike tyopalata, mokonda pononthiki mba Salomau opalata kaisilivila,+ 21 tyeetyi onombaluku mbohamba mbwenda ko Talisi+ novaundapi va Hilau.+ Onombapolo mbo ko Talisi mbweta like momanima etatu oolu, nopalata, nomayo ondyamba,+ no nonthyima, no nopavau.*
22 Ohamba Salomau wali vali omuhona, wali omunongo tyipona onohamba ambuho kombanda yohi.+ 23 Onohamba ambuho kombanda yohi mbwovola* Salomau mbutehelele ounongo wae Huku yotyotyili apaka momutima wae.+ 24 Aveho ankho vemweetela ovipuka vialingwa nopalata, noolu, nomivalo,+ noviti viokulwa, nomulela wombasamu, nononkhambe, no nomula. Nima na nima otyo valinga. 25 Salomau wali novinyongo 4.000 viononkhambe mbae, nomatemba ovilwa, nononkhambe 12.000.*+ Ovipuka ovio wevipakele momapunda-umbo omatemba ovilwa mo Selusalei, popepi nohamba.+ 26 Watuminine onohamba ambuho, okutuka Kondongi* atee kotyilongo tyova Filisitiya, atee oku tyaoyela konondimbu mbo Isitu.+ 27 Ohamba yaongiyile opalata noolu mo Selusalei, avikake unene ngomamanya. Tupu yaongiyile unene omavai omisendulu, aakake unene ngomikuyu vyo mo Sefelaa.+ 28 Ankho vaetela Salomau ononkhambe mbo ko Isitu,+ no mbo kovilongo ovikwavo.
29 Ovipuka ovikwavo viehipululo lya Salomau,+ neetyi alingile okuhimbikila konthyimbi atee konthyulilo, okuti kaviahonekelwe movihonekwa vya Nataa+ omuuli, nomeulo lya Aiya+ omu Silo, no mwetyi omutali Indu+ amwene monondyoi konthele ya Selombowau+ omona wa Nembate? 30 Salomau watuminine mo Selusalei, nomo Isilayeli aiho omanima 40. 31 Pahe, Salomau akapululukwa novakwaukulu vae, avekemupaka Kepunda-umbo lya Ndaviti tate yae.+ Omona wae Lombowau, apingi kouhamba.+