Isaiya
7 Pononthiki mba Akasi+ ohamba yo Sundaa, Akasi omona wa Sotau, Sotau omona wa Usiya, na Lesii Ohamba yo Silia na Peka+ omona wa Lemaliya ohamba yo Isilayeli, vakalwisile o Selusalei, mahi avehetyivili* okwipunda-ko.+ 2 Eumbo lya Ndaviti alipopilwa okuti: “O Silia yelipaka kumwe no Efalaii.”
Omutima wa Akasi, nomitima viovanthu vae, avihimbika okuteketa, ngomiti vyo motyiteta vipukwa-pukwa nomphepo.
3 Siovaa apopila Isaiya okuti: “Mbambavo, katukei, noove nomona wove Seale-Sasumbe,*+ kahonyenei na Akasi apa pehikila omukungu* wetangi liomaande liokwaya peulu+ likala metapalo lyo kepia liomukohi. 4 Mupopila okuti: ‘Wahalinge otyiho, tula omutima. Wahatile owoma, omutima wehekutunde mokonda yomapundi oo evali apia otyo atunda omwihi, mokonda yonyengo onene ya Lesii no yo Silia, no yomona wa Lemaliya.+ 5 O Silia, no Efalaii, nomona wa Lemaliya, vekupanga omphango, vati: 6 “Twende tukalwise o Sundaa, atwiitipaula pokati,* atwipundu-ko* aikala yetu, omona wa Tambeeli atumukalesa ohamba ya-mo.”+
7 “‘Tatekulu Ohamba Onene Siovaa, wati:
“Otyo kamatyilingwa-le,
Nii kamatyimoneka.
8 Mokonda, omutwe wo Silia, o Ndamasiku,
Omutwe wo Ndamasiku, o Lesii.
Momanima vala 65,
O Efalaii maitipaulwa aiho, aihanyauka-po.+
Ankho onwe kamundyumbu onthumbi,
Kamamutwalako tyapama.”’”
10 Siovaa apopila vali Akasi okuti: 11 “Ita enyingilikilo ku Siovaa Huku yove.+ Enyingilikilo lipondola okwenda kohi Ngondyembo, * ine lipondola okwenda peulu-ulu ngeulu.” 12 Mahi Akasi ati: “Himaiti, nii himalolo Siovaa.”
13 Isaiya ati: “Mbambavo, onwe veumbo lya Ndaviti, nthehelelei. Etyi mwalola oumphwa-lundo wovanthu, katyituuka? Nkhele muna vali okulola oumphwa-lundo wa Huku?+ 14 Mwene pahe Siovaa memwaavela enyingilikilo: Tala! Omuhikwena* malingi omulemi, akutula omona omukwendye,+ emuluku, ati utiwa o Imanuwele.*+ 15 Makalia vala ongundi nowiki, atee ehika meti liokwaanya otyivi, nokukoya otyiwa. 16 Tyina nkhele omona oo ehenehike meti liokwaanya otyivi, nokukoya otyiwa, otyilongo tyonohamba onombali, ombu ove watila owoma, atyiho matyikakala tyehena ovanthu.+ 17 Ove, novanthu vove, neumbo lya ho, Siovaa mekemwetela omuvo umwe wepwiya, uhenekale-ko tundee etyi Efalaii eliyapuka no Sundaa,+ mokonda Makaeta ohamba yo Asilia.+
18 “Monthiki omo, Siovaa makahika ofengwa opo aihane ononyi mbo kokule-kule komilola vyo Nilu ko Isitu, nononyiki mbo kotyilongo tyo Asilia. 19 Mambukeya ambuho, ambukalapela momalola,* no momavoyo ononkhanda, no komikete, no pomaiva aeho.
20 “Monthiki omo, Siovaa makakwata onkhiki yokukulula yapolwa kohika yo Kondongi,* yaetwa nohamba yo Asilia,+ akakulula nayo onohuki mbo komutwe, nomainya omovikalo. Onkhiki oyo, tupu maikakulula onondyeli.
21 “Monthiki omo, ovanthu mavakahupisa ondema ike yomotyunda, nonongi onombali onoina. 22 Mokonda yomahini omanyingi, mavakalia ongundi, tyeetyi aveho mavakahupa motyilongo, mavakalia vala ongundi, nowiki.
23 “Monthiki omo, ponofika ambuho ankho pena omiti 1.000 vionouva, vilanda onombongo 1.000 mbopalata, mapakakala vala omikete, neholi. 24 Ovalume mavakanyingila-mo nononkhondyi nonohevo, mokonda otyilongo atyiho matyikeyula vala omikete, neholi. 25 Mokonda yokutila owoma omikete, neholi, ove kumakafwena vali konomphunda ankho mbulimwa ketemo. Mambukakala ohika yokulila onongombe ononthwei, nokuliatwa-liatwa nonongi.”