Susuwee
2 Pweetyi veli ko Sitii,+ Susuwee omona wa Nuu, atumu ovalume vevali vakalave otyilongo. Evepopila okuti: “Kalavei otyilongo, mahi haunene o Selikoo.” Ovalume ovo avaende, avehikila pondywo yomukai umwe ekunga utiwa o Laambe,+ ngapo vakala. 2 Ohamba yo mo Selikoo aitolelwa okuti: “Tala! Hono kounthiki muno mwanyingila ovalume ova Isilayeli veya okulava otyilongo.” 3 Mokweiva otyo, ohamba yo mo Selikoo aitumu ondaka ku Laambe aiti: “Lupula pondye ovalume ovo vokweya mondywo yove, veli mondywo yove mokonda veya okulava otyilongo atyiho.”
4 Mahi omukai oo, apolo ovalume ovo vevali eveholeka. Pahe ati: “Au, tyili ovalume ovo veile umwe muno mahi oku vatunda ame hikwii. 5 Ovalume ovo vapita-le kokawii-wii etyi epito liepunda-umbo lihungi kokwiikwa. Oku vaya nako ame hikwii, mahi ine muvehatekela umwe pehepano ñgaa, muvevasa.” 6 (Mahi omukai oo, wevetwaile no kombanda yondywo yae, eveholeka povipandi vieholi vili-ko.) 7 Ovalume ovo vokwatumwa nohamba avalandula-ko,+ avaviuku poviyau viondongi yo Solondau. Etyi valupuka epito liepunda-umbo aliikwa.
8 Tyina nkhele ovalavi vehenelangale-po, omukai oo aende kombanda yondywo oku veli. 9 Eveti: “Ndyityii okuti Siovaa memwaavela otyilongo etyi,+ onthwe twemutila owoma.+ Ovanthu aveho motyilongo vasoya kombanda yenyi.+ 10 Mokonda tweiva etyi Siovaa akukutisa omeva Elunga Likuhuka pweetyi mutunda ko Isitu,+ neetyi mwalinga onohamba onombali mbova Amoleu, Siyoo+ na Onge,+ mbuna onwe mwaipaela himba lina* o Solondau. 11 Etyi twetyiiva, atumutili owoma, omitima avitutundu,* atuho atuhulilwa umwe* mokonda Siovaa Huku yenyi, oe o Huku yo keulu-ulu, oe o Huku ya pano pohi.+ 12 Pahe mbaa, ndingei-vo olwembia ngeetyi nemulinga olwembia, lingei-vo olwembia no veumbo lya tate, tukailei enyina lya Siovaa. Ovolei etyi mamumphe oku mandyitalela okuti muyumbwa onthumbi. 13 Hupisei-vo tate na mee, na ava tulikwai navo ovakwendye novahikwena, na ava vakala navo. Tuhupisei-vo,* twahankhie-vo mbaa.”+
14 Ovalume ovo avemuti: “Ine katwetyilingile opo nkhwali onthwe matunkhi, mahi onwe kamamunkhi!* Ine ove kupopi etyi tyetweeta muno, onthwe matukulingi olwembia, tupu matulingi umwe etyi twekupopila tyina Siovaa ametwavela otyilongo tyino.” 15 Pahe, evekwatesa pondyanena, avatulukila kepanda mokonda ondywo yae yaika motyimato tyepunda-umbo. Ondywo yae yali kotyimato tyepunda-umbo.+ 16 Evepopila okuti: “Endei konomphunda ngako mukaholama ononthiki ononthatu, opo vokumuyeva vehemuvase. Tyina vokumuyeva vamakondoka, onwe pahe amweende nondyila yenyi.”
17 Etyi omukai oo amana okupopia, ovalume avemuti: “Wetyimona etyi twaana apa, onthwe kamatukala nonombei,+ 18 ine ove kukutu epanda eli liakuhuka pondyanena apa wetukwatesa. Ove pahe kapole ho na nyoko, naava mulikwai navo, no vomeumbo lya ho, okala navo mondywo yove.+ 19 Ou wamalupuka mondywo yove ai pondye, otyo o tyae,* opo ombei kaili vali kwoonthwe. Mahi ine pena ou uyama ku umwe pwaava una-vo mondywo muno, opo ombei ili ku onthwe. 20 Namphila twaana ine ove ukatola etyi tyetweeta muno,+ opo hanthwe vali tuvelwa onombei.” 21 Ngwe ati: “Tyikale umwe ngeetyi mwapopia.”
Pahe avelilekela, ovalume ovo avaende. Etyi vapita, omukai oo akutu epanda likuhuka pondyanena. 22 Ovalume ovo avaende no konomphunda, avakakala-ko ononthiki ononthatu atee vokuveyeva vakondoka. Vokuveyeva aveveovola monondyila ambuho, mahi avehevevasi. 23 Etyi palamba ononthiki ononthatu, ovalume ovo vevali konomphunda oko avatundu-ko avayauka ondongi, avaende ku Susuwee omona wa Nuu. Avapopila Susuwee atyiho vamona-mona. 24 Avapopila Susuwee okuti: “Siovaa wetupakulila otyilongo atyiho.+ Ovanthu aveho vakala-mo, etyi vetwiiva avasoyo unene.”+