Omukanda wa Vali Onohamba
5 Naamaa onkhalamutwe yomafwalali ohamba yo Silia, wali omulume wankhimana unene, ulingwa onthilo na tatekulu yae, mokonda Siovaa wemukwatesileko okulwisa onondyale mbova Silia ambutili-ko.* Ankho eswalali limwe liapama, namphila ena otyilunda.* 2 Onthiki imwe etyi vakalwisile otyilongo tyova Isilayeli, ova Silia vatyindile omona omukainthu, akakala omuundapi womukai wa Naamaa. 3 Omukainthu apopila omukai aundapela okuti: “Ine tatekulu yange wenda komuuli+ uli ko Samaliya ñgeno hahe! Ñgeno wemuhakula otyilunda tyae.”+ 4 Ngwe* aende, akapopia ku tatekulu yae etyi omona omukainthu omu Isilayeli apopia.
5 Ohamba yo Silia aipopila Naamaa okuti: “Enda umwe pehepano ñgaa! Mandyitumu omukanda kohamba yo Isilayeli.” Naamaa aende, atyindi onotalendu* 10 mbopalata, nonosikulu 6.000 mboolu, novikutu 10. 6 Atwala omukanda kohamba yo Isilayeli wapopia okuti: “Nekutuma omukanda ou nomuundapi wange, utiwa o Naamaa opo umuhakule otyilunda.” 7 Ohamba yo Isilayeli, yati vala tangee omukanda oo, aitandula ovikutu viayo aipopi okuti: “Okuti ame, ame Huku, ndyityivila okwipaa omunthu nokumukalesa nomwenyo atee-tee?+ Ame atuma omulume ou ati muhakula otyilunda tyae! Mutyeete umwe okuti wahanda okundwisa.”
8 Mahi etyi Eliseu omunthu wa Huku yotyotyili etyiiva okuti ohamba yo Isilayeli yatandaula ovikutu viayo, liwa-liwa atumu vakapopile ohamba okuti: “Omokonda yatyi watandulila ovikutu viove? Mbambavo, yeka omulume oo eye kwaame opo anoñgonoke okuti mo Isilayeli muna omuuli.”+ 9 Naamaa aende nononkhambe mbae nomatemba ae ovilwa, atalama kombundi yeumbo lya Eliseu. 10 Eliseu atumu omutumwa-ndaka wae ekemupopile okuti: “Enda kelikohe tyihika pepandu-vali+ mondongi yo Solondau,+ olutu lwove maluveluka, okala tyasukuka.” 11 Naamaa anumana unene ahande okukondoka, ati: “Ame ankho ndyisoka okuti: ‘Malupuka, atalama komutwe wange, aihana enyina lya Siovaa Huku yae, ayulika oku, ayulika oku nokuvoko kwae opo anthyakule otyilunda.’ 12 O Ambana no Falepale, onondongi mbomo Ndamasiku,+ kambuna vali omaande ekahi nawa tyipona omaande aeho omo Isilayeli? Hamo vala ndyikelikoha andyiveluka?” Anumana unene apiluluka aende.
13 Ovaundapi vae aveya kwe avemupulu okuti: “Tate, ine omuuli ekupopilile otyipuka tyimwe tyalema ñgeno kwetyilingile? Pahe tyina apopia vala okuti: ‘Likoha oveluka?’” 14 Aende anyingila momaande* mondongi yo Solondau tyihika pepandu-vali ngeetyi tyapopia omunthu wa Huku yotyotyili.+ Olutu lwae aluveluka, akala nolutu ngo lwomona omututu,+ akala tyasukuka.+
15 Konyima akondoka novanthu vae* ankho ena-vo komunthu wa Huku yotyotyili.+ Aende komutwe womuuli emupopila okuti: “Pahe ndyityii okuti kutupu vali oku kuna Huku. Huku, o Huku yo Isilayeli vala.+ Mbambavo tavela-vo otyiawa etyi nekwavela* ame muundapi wove.” 16 Mahi Eliseu ati: “Na Siovaa umwe una omwenyo, una ame ndyiumbila* himetavela otyiawa etyi.”+ Naamaa atwalako okumukuluminya opo etavele mahi ehetavela. 17 Konyima, Naamaa ati: “Mokonda tatekulu kwetavelele, mbambavo, mpheko-vo kapii ame omuundapi wove keheke liotyilongo etyi, lituuka okutyindwa nonomula onombali, mokonda omuundapi wove kamalingi vali oviawa viokuyokwa nii ovilikutila kono huku ononkhwavo, tyihe ku Siovaa. 18 Mahi Siovaa aevele-vo omuundapi wove motyipuka tyike vala: Mokonda tyina tatekulu yange ohamba, anyingila mondywo* ya Limoo ekelinyongamene-po, ukwatelela mokuvoko kwange, naame andyiende andyilinyongamena-po mondywo ya Limoo. Tyina ndyenda ndyikelinyongamene-po mondywo ya Limoo, mbambavo Siovaa aevele-vo omuundapi wove.” 19 Eliseu emupopila okuti: “Enda nombembwa.” Etyi Naamaa apita, aende-po vala katutu, 20 Seyasii+ omukwatesiko wa Eliseu, Eliseu omunthu wa Huku yotyotyili,+ elipopila okuti: ‘Omokonda yatyi tatekulu ayekela Naamaa+ omu Silia ende, ehetavela etyi emwavela? Na Siovaa umwe una omwenyo, mandyimulandula opo amphe tyimwe.’ 21 Seyasii ahateka alandula Naamaa. Etyi Naamaa amona omunthu ukahi nokuhateka monyima yae, atuluka kokatemba kae kovilwa akondoka opo vahonyene nae emupulu okuti: “Ya onawa vala?” 22 Akumbulula okuti: “Onawa vala. Tatekulu yange wanthuma opo ndyikupopile okuti: ‘Tala, kweya ovakwendye vevali vamwe povana vovauli, vatunda kotyilongo tyonomphunda mboko Efalaii. Mbambavo veavela-vo otalendu ike yopalata novikutu vivali.’”+ 23 Naamaa ati: “Pola-po onotalendu onombali.” Emukuluminya+ apake onotalendu onombali mbo palata, novikutu vivali monosaku onombali, eviavela ovaundapi vae vevali, opo vevityinde-po avapiti komutwe wa Seyasii.
24 Etyi ehika ko Ofeli,* apolo onosaku ombo onombali pomavoko avo embutwala mondywo yae, evepopila vende. Etyi vapita, 25 aende ekelilekesa ku tatekulu yae. Eliseu emupulu okuti: “Utundilila-pi Seyasii?” Emukumbulula okuti: “Omuundapi wove kaile nakwike.”+ 26 Eliseu emupulu okuti: “Ove usoka okuti hamwe hityii okuti walandulile omulume una, atuluka kokatemba kae kovilwa amuhonyena nae? Okuti ombu ononthiki mbokutavela opalata, novikutu, nomindyambi nomapia omiti vionouva, nonongi, nonongombe, novaundapi ovakwendye novaundapi ovakainthu?+ 27 Otyipuka otyo walinga, otyilunda tya Naamaa+ matyiya kwoove no kovatekula vove, atyihaveluka atee-tee.” Seyasii wati vala okutunda ponthele yae, watwela otyilunda.+