Okutunda
7 Siovaa apopila Mwisesi okuti: “Tala! Nekulinga ngatyina u Huku* ku Falaoo; Alau omukulu wove, mekekupopila-ko ngomuuli.+ 2 Ove una okukemupopila atyiho nekutuma; omukulu wove Alau, oe makapopia na Falaoo, ngwe ayeke ova Isilayeli vatunde motyilongo. 3 Ame Falaoo mandyimuyeke atene omutima.+ Mandyikayawisa komanyingilikilo ndyilinga, nomaelema mandyilingi motyilongo tyo Isitu.+ 4 Mahi, Falaoo kememutavela. Mandyipake okuvoko kwange mo Isitu andyipolo-mo ovanthu vange ovanyingi,* ova Isilayeli, ova Isitu andyivelingi etyi tyata muvo.+ 5 Ova Isitu mavakanoñgonoka vala okuti ame, ame Siovaa,+ putyina ame namatandaveka okuvoko kotyilongo tyo Isitu, andyipolo ova Isilayeli pokati kavo.” 6 Mwisesi na Alau avalingi etyi Siovaa evetuma; avetyilingi umwe nawa. 7 Mwisesi ankho una omanima 80, Alau una omanima 83 etyi vakapopia na Falaoo.+
8 Siovaa apopila ovo Mwisesi na Alau ati: 9 “Ine Falaoo umutuma ati: ‘Lingei omaelema,’ popila Alau uti: ‘Kwata otyimuti tyove otyiyumbu pohi komutwe wa Falaoo.’ Otyimuti otyo matyityituka onyoka onene.”+ 10 Mwisesi na Alau avaende ku Falaoo, avalingi umwe ngeetyi Siovaa evetuma. Alau ayumbu pohi otyimuti tyae komutwe wa Falaoo, novaundapi vae, otyimuti atyityituka onyoka imwe onene. 11 Ou Falaoo, aihana ovanongo nononganga mbomo Isitu;+ aihana ovanakwa vokwatambula, navo ngatyo valinga novihemba viavo.*+ 12 Aveho avayumbu ovimuti viavo pohi avityituka ononyoka ononene; otyimuti tya Alau, atyimbunyini-po ambuho. 13 No ngootyo, Falaoo atene omutima,+ ehetavela ngeetyi Siovaa apopile.
14 Siovaa apopila Mwisesi okuti: “Omutima wa Falaoo una onkhango.+ Waanya okuyeka ovanthu vaye. 15 Enda ku Falaoo komuhuka. Ngwe maende no kondongi Nilu! Kakalele ponthele pondongi mulivase nae. Tyinda otyimuti tyove tyokwatyitukile onyoka.+ 16 Mutolela okuti: ‘Siovaa Huku yova Hembeleu wanthumine kwoove tatekulu+ okuti: “Yeka ovanthu vange opo vaye moluhandya vakafende ame,”* mahi ove ohetavela. 17 Siovaa wati: “Pahe motyinoñgonoka okuti ame, ame Siovaa.+ Mandyivete komaande o mondongi Nilu notyimuti etyi tyili peke liange, aatyituka ohonde. 18 Ombisi ili mondongi Nilu mainkhi, omaande omondongi Nilu maakanika, ova Isitu aveheketyivila okunwa omaande amo.”’”
19 Siovaa apopila Mwisesi okuti: “Popila Alau uti: ‘Kwata otyimuti tyove, tyitoma momaande omo Isitu+ nokuvoko kwoove, monondongi, no momikungu,* no movinyinda,+ no monondamu opo atyituke ohonde.’ Motyilongo atyiho tyo Isitu mamuyula ohonde, atee umwe komitemba no kononkhanda.” 20 Mwisesi na Alau avalingi umwe ngeetyi Siovaa evetuma. Akwata otyimuti, avete kombanda yomaande omo Nilu, Falaoo novaundapi vae otyo vatala, omaande aeho o mondongi Nilu aatyituka ohonde.+ 21 Ombisi yo mondongi ainkhi,+ ondongi ainiki omapita, ova Isitu nkhele avehetyivili vali okunwa omaande omo Nilu.+ Otyilongo atyiho tyo Isitu atyipwila mohonde.
22 Ovanakwa vetambu vomo Isitu navo ngatyo valinga novihemba viavo,+ mokonda yotyo, Falaoo atene omutima ehetavela, ngeetyi Siovaa apopile.+ 23 Falaoo akondoka keumbo liae, ehesuku natyo. 24 Ova Isitu aveho avaheye ononyombo konthele kondongi Nilu okwovola omaande etavela okunwa, mokonda o mondongi Nilu kaetavela okweenwa. 25 Okutuka apa Siovaa anyona omaande o mondongi Nilu apalambe ononthiki epandu-vali.