Isaiya
59 Talei! Okuvoko kwa Siovaa hakusupi-ko, tyokuhetyivili okuyovola,+
2 Ononkhali mbenyi mwene, ombo mbemuyapula ku Huku yenyi.+
Ononkhali mbenyi, mbemulingisisa okuholeka otyipala tyae kwoonwe,
Kahande okumutehelela.+
3 Mokonda omavoko enyi epwila mohonde,+
Ominwe vienyi avipwila movivi.
Omilungu vienyi vipopia omatutu,+ elaka lienyi lilondovola etyi tyihaviukile.
4 Nawike wiita ouviuki,+
Tupu nawike upopia otyili momphela.
Vayumba onthumbi momatutu,*+ nomovipuka vihesilivila.
Vapitwa ovivi, avakutula ovipengi.+
5 Vatotola omayiyi onyoka onkhalavi,
Avatungu olwauvi.+
Una ulia omayiyi avo unkhia,
Eyiyi liatyatyulwa mutunda ombuta.
6 Olwauvi lwavo kamalukala omuvalo,
Nii kamavakavala mweetyi valinga.+
Ovilinga viavo ovivi.
Valinga ovipengi nomavoko avo.+
7 Onomphai mbavo mbuhateka opo mbukalinge ovivi,
Mbuhateka opo mbukamomese ohonde ya una uhena etyi alinga.+
Omalusoke avo, omalusoke omavi.
Onondyila mbavo o mbokuhanya vala, o mbokumonesa emone.+
8 Ondyila yombembwa kaveii-ale,
Apa vakwata petupu ouviuki.+
Vapengesa onondyila mbavo.
Una uliata monondyila omo, kamakanoñgonoka ombembwa.+
9 Otyo ouviuki wakalela kokule noonthwe,
Etyi tyaviuka katyituvasi.
Onthwe tukevelela otyimimi, mahi tala! Kuna vala enthiki.
Tukevelela otyitei, mahi tutwalako vala okweendela mepuputu.+
10 Tyina tweenda, tuhihita movimato ngovamphoki.
Tukuva-kuva ngavana vehena omaiho.+
Komutenya watokota tulipunduka nga tyina okounthiki.
Tyina tuli po vokwapama, tukahi vala ngatyina ovanthu vankhia.
11 Atuho twoona ngomahambaungu,
Tukahi nokupopia ngonopomba.
Tukevelela ouviuki, mahi kaumoneka.
Tukevelela eyovo, mahi lili kokule noonthwe.
Tyeetyi, oumphuki wetu tuwii nawa,
Ononkhali mbetu twembunoñgonoka.+
13 Twatyitukila-po Siovaa, atumwaanye.
Twatyindamena ku Huku yetu.
14 Ouviuki ukahi nokutaatwa,+
Etyi tyaviuka tyihikila vala kokule.+
Mokonda, otyili* tyelipunduka mopalasa,
Etyi tyaviuka, katyityivili okunyingila.
16 Wetyimona okuti kutupu omunthu nawike,
Wahuva etyi amona okuti nawike upopila-ko vakwavo.
Okuvoko kwae mwene akweeta eyovo,
Ouviuki wae, aumulundu okulinga tyimwe.
17 Pahe, avale ouviuki, aukala ngatyina otyikutu tyae tyovilwa,
Elipake ekapasete lieyovo komutwe.+
18 Ngwe mekevekondolela etyi valinga:+
Onondyale mbae, membupe onyengo, vemuyele, ekevekondolela etyi valinga.+
Ovilongo viokuli pokati kelunga, mekevifeta etyi tyatamo.
19 Okuhimbikila koutakelo, mavakatila owoma enyina lya Siovaa,
Okuhimbikila koutundilo, avakala nonthilo onene nomunkhima wae.
Mokonda, ngwe mekeya ngondongi ihateka unene,
Itahwa nomphepo ya Siovaa.
20 “Omuyovoli+ mekehika ko Siyau,+
Mekehika kovana va Sakoo vokwayeka-po okulinga ovivi,”+ o Siovaa watola.
21 “Ei oyo omphango mandyikalinga navo,”+ o Siovaa wapopia. “Ononkhono mbange mbuli mwoove, nonondaka mbange napaka momulungu wove, kamambukatunda momulungu wove, no momulungu wovana vove,* no momulungu wovatekula vove,* okuhimbikila pehepano atee-tee.” O Siovaa wetyipopia.