Omukanda wo Tete Onohamba
3 Salomau alingi omphango yokunepela Falaoo ohamba yo Isitu. Anepe* omona+ wa Falaoo. Emutwala Kepunda-umbo lya Ndaviti,+ atee ovilinga viokutunga ondywo yae+ nondywo ya Siovaa+ notyimato tyeliseta no Selusalei viapwa.+ 2 Mahi, ovanthu nkhele ankho valingila ovilikutila ponomphangu mbukola+ mbokwaya peulu, mokonda pononthiki opo ondywo yomunkhima wenyina lya Siovaa ankho kainetungwe.+ 3 Salomau atwalako okuhumba Siovaa, mokwendela mwetyi tate yae Ndaviti emulongesile, mahi nkhele ankho ulingila ovilikutila, noviawa ponomphangu mbukola mbokwaya peulu.+
4 Ohamba ayeende ko Simbeau opo ikalinge ovilikutila, mokonda oko ankho kuna omphangu ikola yaya peulu yokwankhimana vali.*+ Salomau alingila komutala oo ovilikutila 1.000 viokuyokwa.+ 5 Siovaa amonekela Salomau mondyoi kounthiki etyi ekahi ko Simbeau, emuti: “Ita etyi wahanda ñgeno ndyikwavela.”+ 6 Salomau ati: “Ove walingile olwembia olunene omuundapi wove Ndaviti tate yange, mokonda ngwe ankho ukutavela, ulinga evi viaviuka, ankho una omutima omuwa. Na hono, ove umuhole unene, tyeetyi wemwavela omona opo apumphame kotyipundi tyoutumini wae.+ 7 Pahe Siovaa Huku yange, ove wamphaka kouhamba pomphangu ya Ndaviti tate yange, ame omuundapi wove, namphila ame nkhele ndyimututu,* nehei nawa ovipuka.*+ 8 Omuundapi wove ukahi pokati kovanthu waholovona,+ ovanthu ovanyingi vehevilwa okuvalulwa. 9 Avela-vo omuundapi wove omutima utavela opo atete onomphela mbovanthu vove,+ apunge otyiwa notyivi.+ Olie utyivila okuteta onomphela mbovanthu vove ava aveho ovanyingi-nyingi?”*
10 Etyi Salomau aita atyihambukiswa Siovaa.+ 11 Huku emuti: “Mokonda otyo waita otyo, kwaitile omwenyo omule,* nii kwaitile omalumono, nii ononkhia mbonondyale* mbove, mahi waita ekungunyiko liokuteta onomphela,+ 12 mandyilingi etyi waita.+ Mandyikwavela omutima omunongo,+ una ekungunyiko. Kakwali nawike wali ngoove, nii kamakukakala nawike welifwa noove.+ 13 Tyihe-otyo vala, mandyikwavela etyi ove wahaitile,+ mandyikwavela omalumono nomunkhima.+ Kakwali nawike wali ngoove, nii kamakukakala nawike welifwa noove mokweenda komwenyo wove.*+ 14 Ine ove wendela monondyila mbange, opake momutima etyi mandyikulongesa, novitumino viange, ngeetyi tyalingile tate yove Ndaviti,+ noove mandyikwavela omwenyo omule.”*+
15 Etyi Salomau apinduka-po, etyinoñgonoka okuti ondyoi. Akondoka ko Selusalei, atalama komutwe Wotyikasa Tyomphango tya Siovaa, alingi ovilikutila viokuyokwa,+ novilikutila viombembwa. Tupu alingila ovaundapi vae aveho otyipito.
16 Pononthiki ombo, omakunga evali aaende kohamba aatalama komutwe wayo. 17 Umwe povakai ovo ati: “Tatekulu yange hamba, ame nomukai ou tukala mondywo ike, etyi ame nakutula nae ankho tuna-e mondywo. 18 Etyi palamba ononthiki ononthatu nae akutula. Ankho onthwe vala atwike tukahi-mo, mutupu vali nawike. 19 Kounthiki omukai ou awili komona wae anyimi. 20 Apinduka-po mokati kovinthiki, tyina ame omupika wove ndyilele tatekulu yange, apolo-po omona wange wokuna omwenyo ponthele yange,* emupake ponthele yae, omona wae wokwanyima, emupake komavoko ange. 21 Etyi napinduka-po komuhuka ndyinyamise omona wange, tyina ndyiti ñgaa omona wanyima. Etyi nemutala nawa, andyiimbuka okuti ha wange-ko.” 22 Ou omukai omukwavo ati: “Ai! Omona wange owokuna omwenyo, wove owokwanyima!” Omukai wo tete ati: “Nii! Omona wove oyou wokwanyima, wange oyou wokuna omwenyo!” Avahimbika okutañgunina pohamba.
23 Pahe ohamba aiti: “Ou uti: ‘Au! Omona wange owokuna omwenyo, wove owokwanyima!’ Omukwavo uti: ‘Au! Omona wove oyou wokwanyima, wange oyou wokuna omwenyo!’” 24 Pahe ohamba aiti: “Ndyetelei-mo omutunga!” Avaetela ohamba omutunga. 25 Ohamba aiti: “Tetei omona wokuna omwenyo pokati, otyinthimbu tyimwe amutyipe omukai umwe, otyikwavo amutyipe omukai omukwavo.” 26 Ina yomona wokuna omwenyo etyi eiva otyo, mokonda uhole omona wae, apopila ohamba ati: “Tatekulu yange, omona wokuna omwenyo alinge wae wehemwipae mba!” Mahi omukai omukwavo ati: “Au, mutetei umwe! Opo tyitie vala ame ha wange-ko ngwe ha wae-ko.” 27 Pahe ohamba aiti: “Avelei omona wokuna omwenyo omukai wo tete! Mwehemwipaei, oe o ina yomona.”
28 Ovanthu aveho vo Isilayeli aveivi etyi ohamba yatetulula+ otyitateka otyo, avahuvu unene,* ankho vetyimona okuti ina ounongo wa Huku, ounongo wokulinga etyi tyaviuka.+