Omukanda wa Vali Onohamba
22 Sosiya+ wahimbika okutumina nomanima etyinana, watumina omanima 31 mo Selusalei.+ Ina utiwa o Sendinda omona wa Andaiya, wo ko Mbosikate.+ 2 Walingile etyi tyaviuka komaiho a Siovaa, aendela monondyila mba Ndaviti he-mbwale yavo;+ kayapukilile kokulio nii kokumbili.
3 Menima 18 ohamba Sosiya eli nokutumina, atumu omuhoneki Safaa omona wa Asalia, Asalia omona wa Mesulau mondywo ya Siovaa+ emupopila okuti: 4 “Enda ku Hilikiya+ omunene-nakwa, uti apole onombongo ambuho mbaetwa mondywo ya Siovaa,+ mbuna ovayungi vo kombundi vatambula kovanthu.+ 5 Onombongo ombo mbupewe vokwakalela komutwe otyilinga tyondywo ya Siovaa. Tyina vamembutambula, ngwe avembwavela ovaundapi vondywo ya Siovaa, mavaviukisa* ondywo,+ 6 vokuhonga omavai, no vokutunga, no vomamanya. Ovo mavalande nonombongo ombo omavai nomamanya aviukiswa opo vaviukise nao ondywo.+ 7 Mahi kavapondola okupulwa onombongo vekahi nokupewa, mokonda ovalume vayumbwa onthumbi.”+
8 Konyima Hilikiya omunene-nakwa apopila Safaa omuhoneki okuti:+ “Navasa omukanda Wotyitumino+ mondywo ya Siovaa.” Pahe Hilikiya aavela Safaa omukanda oo, Safaa ahimbika okuutanga.+ 9 Safaa omuhoneki aende kohamba eipopila ati: “Ovaundapi vove vapola* onombongo mbali mondywo, avembwavela ononkhalamutwe mbotyilinga tyondywo ya Siovaa.”+ 10 Omuhoneki Safaa apopila vali ohamba okuti: “Pena omukanda+ napewa nomunakwa Hilikiya.” Safaa ahimbika okuutangela komutwe wohamba.
11 Ohamba yati vala ivee onondaka mbomukanda Wotyitumino, aitandula ovikutu viayo.+ 12 Ohamba aipopila Hilikiya omunakwa na Aikau+ omona wa Safaa, na Akimbole omona wa Mikaiya, na Safaa omuhoneki, na Asaiya omuundapi wohamba okuti: 13 “Endei, kapulei ku Siovaa, kapulilei-ko ame, novanthu aveho nova Sundaa aveho konthele yonondaka mbomukanda ou wavasiwa, mokonda onyengo ya Siovaa yetwendela onene unene,+ tyeetyi ovakwaukulu vetu kavetavelele onondaka mbomukanda ou, kavalandulile etyi twahonekelwa momukanda ou.”
14 Hilikiya omunakwa, na Aikau, na Akimbole, na Safaa, na Asaiya, avaende komuuli+ Hulunda. Hulunda ankho omukai wa Saluu onkhalamutwe yo mondywo yokuvalela, omona wa Tikivaa, Tikivaa omona wa Halasi. Hulunda ankho ukala Konthele Omphe Yepunda-umbo mo Selusalei. Avemupopila etyi vatumwa.+ 15 Ngwe evepopila okuti: “Siovaa Huku yo Isilayeli wati: ‘Popilei omulume wemutuma kwaame okuti: 16 “Etyi, otyo tyapopia Siovaa, wati: ‘Ovihuna aviho vili momukanda watangelwa+ komutwe wohamba yo Sundaa, mandyivieta momphangu ei, no ku ava vakala-mo. 17 Mokonda vandyeka-po, avalingila ovilikutila viokutunda omwihi ovika-huku+ ovikwavo, opo vanumanese novilinga viomavoko avo,+ onyengo yange maitenthama komphangu ei ayahatalama.’”+ 18 Mahi onwe popilei ohamba yo Sundaa yokwemutuma okukapula ku Siovaa, okuti: “Etyi, otyo tyapopia Siovaa, Huku yo Isilayeli, wati: ‘Konthele yonondaka ombu weiva, 19 mokonda omutima wove wetavela,* oliolo omutima+ komaiho a Siovaa etyi weiva onondaka napopia konthele yomphangu ei na vana vakala-mo, etyi nati mavakamoneswa ovihuna, ovanthu avakatila owoma mokonda yavo, otandula ovikutu viove,+ olilila komaiho ange, ame nekwiiva, o Siovaa wetyipopia. 20 Mokonda yotyo, mandyikekupaka komaendo onombwale mbenyi,* ove mokapululukwa nombembwa melangalo liove. Ngootyo, omaiho ove kamaakamona ononkhumbi mandyietela omphangu ei.’”’” Ngwe avakapopila ohamba etyi vakumbululwa.