Isekiyele
6 Ondaka ya Siovaa aiya vali kwaame aiti: 2 “Mona womulume, leuka konomphunda mbo Isilayeli, ula etyi mambulingwa. 3 Popia uti: ‘Onwe nomphunda mbo Isilayeli, tehelelei etyi Tatekulu Ohamba Onene Siovaa apopia: Wetyitola o Tatekulu Ohamba Onene Siovaa wapopila onomphunda, novipunda, nonondongi, nomilola, wati: “Tala! Mandyimweetela omutunga, mandyihanye-ko onomphangu mbenyi mbokwaya peulu. 4 Omitala vienyi viovilikutila mavikateywa-po,+ omitala vienyi viokuyokela ombao,* mavikahanyaunwa, mamukankhia ovivimbi viatyo vienyi andyikeviyumba povilolo vienyi vitoyesa.*+ 5 Mandyikayumba ova Isilayeli vankhia povilolo viavo vitoyesa, mandyikayandyanesa omankhipa enyi pomitala vienyi viovilikutila.+ 6 Kovilongo aviho mukala, omapunda-umbo atyo maakahanywa-po,+ onomphangu mbokwaya peulu mambukatungaululwa, ambukala ngootyo tyahanyauka.+ Omitala vienyi viovilikutila mavikatungaululwa, avihanywa-ko, ovilolo vienyi vitoyesa mavikahanyaunwa, omitala vienyi viokuyokela onombao mavikatungaululwa, ovilinga vienyi mavikanyimwa-ko. 7 Pwoonwe mapakatokela ovivimbi,+ onwe mamunoñgonoka okuti, ame, ame Siovaa.+
8 “‘“Mahi mandyikasa-po vamwe, mokonda vamwe pwoonwe mavakahupa komutunga, tyina mwamayandyaneswa pokati kovanthu vovilongo.+ 9 Ava vokwahupa mavakanthyinangelela koupika pokati kovanthu vovilongo oku mavahandauka nako.+ Maveketyinoñgonoka okuti, ankho nanumanena omitima viavo vieheviotyili* viayapuka kwaame,+ nomaiho avo ena ovipepe viokutala* ovilolo viavo vitoyesa.+ Mavakakunda, mavakatoya ovipuka aviho ovivi valingile, ovipuka vitoyesa.+ 10 Mavakanoñgonoka umwe nawa okuti ame, ame Siovaa, etyi nevepopila ovihuna evi mandyiveetela, hatyikembo.”’+
11 “Wetyitola o Tatekulu Ohamba Onene Siovaa, wati: ‘Puma peke, otutula nonomphai mbove, oliyave mokonda yovipuka ovivi, vitoyesa vialingwa meumbo lya Isilayeli, mokonda mavakankhia komutunga, no kondyala, no komukihi.+ 12 Wamakavasiwa uli kokule, makankhia komukihi, wo popepi makatokeswa nomutunga, ou wamahupu kovipuka ovio, makankhia kondyala, ame mandyikeveuyulila onyengo yange onene.+ 13 Onwe mamukanoñgonoka okuti ame, ame Siovaa,+ tyina ovivimbi viavo viamatokela povilolo viavo vitoyesa, no pomitala viavo viovilikutila,+ no kombanda yovipunda aviho viokwaya peulu, no ponombalanganga mbonomphunda ambuho, no mombwelo yomiti ominene, monompha mbomiti ominene, omu valingila ovilikutila viomuniko omuwa,* vihambukiswa ovilolo viavo vitoyesa.+ 14 Mandyikevekatulila okuvoko kwange, motyilongo amwahakala vali nawike, omaumbo avo aeho, maakahanyauka-po alambe-po oluhandya lwokuli ko Ndimbila. Ngwe mavakanoñgonoka nawa okuti ame, ame Siovaa.’”