Wahonekelwa Ova Ngalasiya
1 Ame Paulu, omutumwa,* wehemutumwa wa munthu nii womulume nawike, mahi ndyiwa Sesusi Kilisitu,+ netyipewa na Huku Tate yetu,+ ou wemupindula-po kononkhia, 2 na vakwetu tuna-vo kuno, wenda komawaneno omo Ngalasiya:
3 Okankhenda okanene kakale noonwe, ombembwa ituka ku Tate yetu Huku, no ku Tatekulu Sesusi Kilisitu nayo ikale noonwe. 4 Mwene welipakulila umwe ononkhali mbetu,+ opo etuyovole mouye uno wovivi,*+ omu mwene Huku Tate yetu ahandela,+ 5 omunkhima ulinge-linge wae, ulinge umwe wae apeho. Amem.
6 Ame ñgaa tyanthyuvisa tyoonwe okuhondovoka* vala liwa mu Ou wemwiihanena mokankhenda okanene ka Kilisitu, soka amukapola-po tyoviwa ovipe vielikalela.+ 7 Hakuti nati kuna vali oviwa ovipe ovikwavo, mahi kuna umwe vamwe veli nokumuhimapalesa,+ vahanda okupililika oviwa ovipe viayemba ku Kilisitu. 8 Ngwe mahi, ine pena umwe, tyilinge omunthu tyilinge oandyu yo keulu, eya emutumbukila noviwa ovipe vielikalela neevi twemutolela, oo akatengale umwe. 9 Ngo omu twemupopila-le, ndyiwana-po vali, Ou umupopila oviwa ovipe vilikalela neevi mwetavela-le, oo akatengale umwe.
10 Ame ñgaa okuti ovanthu nahanda vahule kwaame, ine o Huku? Ine ñgaa nahanda okuhambukiswa ovanthu? Ine nali wokuhambukiswa ovanthu, opo ñgeno halingile omupika wa Kilisitu. 11 Ame nahanda mutyikungunyike, vanthu vange, oviwa ovipe ame nemutolela kaviatukile movanthu,+ 12 anehevitambulile kovanthu, anehevilongesilwe, mahi evi neviholololelwa na Sesusi Kilisitu.
13 Otyili, onwe mweiva-iva evi ankho ndyilinga kohale etyi ankho ndyili mo yova Sundaa,+ ankho hipumphama* ndyihukaisa umwe ewaneno lya Huku, andyivehandaula;+ 14 ame ankho ndyili vali nokukula mo yova Sundaa tyapona ovo tava yange ovanyingi momuhoko wetu, ankho ame vali netyipakako tyoviso vyo votate.+ 15 Mahi Huku, ou wankhoyela-le meimo lya mee, wandyihanena umwe vala okankhenda kae okanene,+ mwene wati tyaviuka 16 okuholololela Omona wae mwaame, opo nkhapopie oviwa ovipe viayemba komona wae movanthu vovilongo,+ ame hakahatekelele pomunthu* nawike; 17 anahaile ko Selusalei, okwenda ku vakwetu vatetekela okulinga ovatumwa, ame naile no ko Alambia, etyi natunda oko andyikondoka no ko Ndamasiku.+
18 Pahe etyi pakala omanima etatu, ngapo ndyilondeka no ko Selusalei,+ tukelimone-po na Sefa,*+ oo atukala umwe nae ononthiki 15. 19 Mahi atwehelimono-ale novatumwa ovakwavo, atulimono vala na Tiaku,+ ondenge ya Tatekulu. 20 Pahe okuyemba kweevi ndyili nokumuhonekela, ovio ndyimutolela umwe, na Huku utyilwete, hili nokukemba.
21 Etyi natunda opo, andyikaya no monohika mbo Silia no mbo Silisia.+ 22 Mahi momawaneno omo Sundeya eli kumwe na Kilisitu, ame ankho hiiwe-mo. 23 Ovo ankho vetyiiva-iva vala okuti: “Omulume una ankho utuhukaisa,+ pahe upopia oviwa ovipe, upopia umwe etavelo ankho alwisa.”+ 24 Etyi vendyiva avahimbika okunkhimaneka Huku.