Omukanda Wa Vali wa Samuwele
9 Ndaviti apulu okuti: “Okuti pena umwe wahupa-po meumbo lya Saulu ou ame ndyipondola okukala nae nolwembia olunene mokonda ya Sonataa?”+ 2 Kwali omuundapi umwe wo meumbo lya Saulu utiwa o Simba.+ Avekemwihana eye ku Ndaviti, ohamba Ndaviti aimupulu okuti: “Ove, ove Simba?” Ngwe akumbulula okuti: “Yoo, ame omuundapi wove.” 3 Ohamba aipulu vali okuti: “Muna umwe wahupa meumbo lya Saulu ou ame ndyipondola okukala nae nolwembia olunene ngo lwa Huku?” Simba akumbulula ohamba okuti: “Mwahupa omona wa Sonataa, walemana onomphai ambuho.”+ 4 Ohamba aimupulu okuti: “Uli-pi?” Simba akumbulula ohamba okuti: “Uli keumbo lya Makili,+ omona wa Amiyeli, ko Lo-Ndembale.”
5 Ohamba Ndaviti aitumu liwa-liwa vekemupole keumbo lya Makili omona wa Amiyeli, ko Lo-Ndembale. 6 Etyi ehika ku Ndaviti, Mefimbosete omona wa Sonataa, Sonataa omona wa Saulu, aikila konongolo elipetamena pohi. Ndaviti ati: “Mefimbosete!” Ngwe akumbulula okuti: “Ame uno, ame muundapi wove.” 7 Ndaviti emupopila okuti: “Wahatile owoma, ame tyotyili mandyikala nolwembia olunene+ noove mokonda ya Sonataa, tate yove. Onohika mba tate-mbwale yove Saulu mandyikukondolela-mbo, ove molia-alia* komesa yange.”+
8 Mefimbosete elipetamena-po ati: “Ame, ame-lie omuundapi wove opo ulingile okankhenda* ame, otyimbwa tyankhia?”+ 9 Ohamba aitumu okwihana Simba, omukwatesiko wa Saulu aimupopila okuti: “Ndyikahi nokwavela omutekula wa tatekulu yove+ ovipuka aviho vya Saulu, no vyo veumbo liae. 10 Ove novana vove, novaundapi vove mamumulimina onohika amuteye etyi tyapia-mo, opo mwavele okulia ombunga yae. Mahi Mefimbosete, omutekula wa tatekulu yove apeho malia-alia komesa yange.”+
Simba wali novana 15 novaundapi 20.+ 11 Simba apopila ohamba ati: “Omuundapi wove malingi atyiho tatekulu ohamba atuma.” Mefimbosete walile-lile komesa ya Ndaviti,* ngatyina o umwe povana vohamba. 12 Mefimbosete nae wali nomona omututu utiwa o Mika.+ Aveho vakala mondywo ya Simba avakala ovaundapi va Mefimbosete. 13 Mefimbosete wakalele mo Selusalei, apeho otyo alia komesa yohamba.+ Ankho walemana onomphai ambuho.+