Omukanda wa Vali Onohamba
1 Etyi Akambe ankhia ova Moambe+ avatyitukila-po ova Isilayeli.
2 O pononthiki opo Akasiya asoponokela pemphana ankho liahikwa nomavai keulu liondywo yae ko Samaliya, elivete. Apopila ovatumwa-ndaka okuti: “Endei ku Mbaale-Sembumbe huku yo Ekoloo,+ ekemupopile otyipute tyange+ ine matyiveluka.” 3 Mahi oandyu ya Siovaa aipopila Iliya*+ omu Tisimbee okuti: “Enda kahonyenei novatumwa-ndaka vohamba yo Samaliya, vepula okuti: ‘Omokonda yatyi mukapulila ku Mbaale-Sembumbe huku yo Ekoloo?+ Okuti mo Isilayeli mutupu Huku? 4 Siovaa wati: “Ove kumatundu poula opo ulangi, tyotyili monkhi.”’” Iliya aende.
5 Etyi ovatumwa-ndaka vakondoka ku Akasiya, evepulu okuti: “Omokonda yatyi mwakondokela?” 6 Avemukumbulula okuti: “Twahonyena nomulume umwe, ati: ‘Kondokei kohamba yokwemutuma, ipopilei okuti: “Siovaa wati: ‘Omokonda yatyi ukapulila ku Mbaale-Sembumbe huku yo Ekoloo? Okuti mo Isilayeli mutupu Huku? Ove kumatundu poula opo ulangi, tyotyili monkhi.’”’”+ 7 Ohamba aivepulu okuti: “Omulume mwahonyena nae wemupopila onondaka ombo, ukahi ñgeni?” 8 Avemukumbulula okuti: “Omulume umwe wavala otyikutu tyomainya,+ una epoha monomanekelo.” + Ohamba aiti: “Oo, o Iliya omu Tisimbee.”
9 Ohamba aitumu-ko onkhalamutwe yomafwalali 50 nomafwalali ayo 50. Ayiende ku Iliya ankho upumphi peulu liomphunda, aimupopila okuti: “Munthu wa Huku yotyotyili,+ ohamba yati tyatiwa: ‘Tuluka.’” 10 Mahi Iliya akumbulula onkhalamutwe yomafwalali 50 ati: “Naina ine ame ndyimunthu wa Huku, keulu+ kutunde otupia atukwipaela kumwe nomafwalali ove 50.” Keulu akutundu otupia, atumwipaela kumwe nomafwalali ae 50.
11 Ohamba aitumu-ko vali onkhalamutwe onkhwavo yomafwalali 50 nomafwalali ayo 50. Aende-ko, apopila Iliya okuti: “Munthu wa Huku yotyotyili, ohamba yati: ‘Tuluka, kuluminya liwa.’” 12 Mahi Iliya evekumbulula okuti: “Naina ine ame ndyimunthu wa Huku yotyotyili, keulu kutunde otupia atukwipaela kumwe nomafwalali ove 50.” Keulu akutundu otupia twatunda ku Huku, atumwipaela kumwe nomafwalali ae 50.
13 Ohamba aitumu-ko vali onkhalamutwe ya tatu yomafwalali 50 nomafwalali ayo 50. Mahi onkhalamutwe oyo yomafwalali 50, ayiende keulu liomphunda, aiikila konongolo aiiti Iliya eilinge okankhenda, aiti: “Munthu wa Huku yotyotyili, evela-vo omwenyo wange nomwenyo wovaundapi* vove ava 50. 14 Ononkhalamutwe onombali mbo tete mbomafwalali 50, kumwe nomafwalali ambo 50, mbaipawa notupia twatunda keulu, mahi pahe ame, evela-vo omwenyo wange.”*
15 Oandyu ya Siovaa aipopila Iliya okuti: “Enda nae. Wehemutile owoma.” Iliya akatuka aende nonkhalamutwe yomafwalali ekelivasa nohamba. 16 Iliya apopila ohamba okuti: “Siovaa wati: ‘Ove watuma ovatumwa-ndaka vakapule ku Mbaale-Sembumbe huku yo Ekoloo.+ Okuti mo Isilayeli mutupu Huku?+ Omokonda yatyi wahapulilile kwe? Ove kumatundu poula opo ulangi, tyotyili monkhi.’” 17 Ngeetyi Siovaa apopile etyi atuma Iliya, Akasiya ankhi umwe. Mokonda ankho utupu omona nawike, Seolau*+ emupingi kotyipundi menima lya vali lya Seolau+ omona wa Seosafaa ohamba yo Sundaa.
18 Ovipuka ovikwavo viehipululo lya Akasiya,+ ovipuka aviho alingile, kaviahonekelwe momukanda womahipululo o pononthiki mbonohamba mbo Isilayeli?