Amosi
9 Namona Siovaa+ uli keulu liomutala wovilikutila, ati: “Tyoka-ko omutwe womphandyi, ehina liatyo litekete. Tyoka-ko omutwe watyo, ame mandyiipaa nomutunga ovanthu aveho mavahupu-po. Nawike metyivili okwenda nkholo, nawike metyivili okuhupa.+
2 Ine vaheya etoto liaya kohi, vakaholame kondyembo,*
Enkhanya liange malikevepola-mo.
Ine vaya no peulu,
Mandyikevetulula-ko.
3 Ine vakaholama pokatanga-tanga komphunda Kalumelu,
Mandyikeveovola-ko atee ndyivevasa, andyivekwata.+
Ine vakaholama kohi yelunga, okuti-vo hamwe opo nehevemone,
Mandyikatuma-ko onyoka, ikevenumate.
4 Ine vatwalwa koupika nonondyale mbavo,
Mandyitumu-ko omutunga, aukeveipaa.+
Mandyitale nawa etyi valinga na ndyiveetele ononkhumbi, hakuti opo ndyiveetele oviwa.+
5 Tatekulu Ohamba Onene Siovaa womambamba ovita, Oe mayame motyilongo* etyi,
Atyisenguluka-po,+ aveho vakala-mo mavakalula.+
Otyilongo atyiho matyilondeka ngo Nilu
Atyilauka ngo Nilu yo ko Isitu.+
6 ‘Una wokutunga ondondelo yae keulu,
Wokwatunga apa akala* keulu liohi,
Wokwoongiya omaande okweepola melunga,
Euyulila koluhimba,+
Oo, utiwa o Siovaa.’+
7 Siovaa wati: ‘Onwe va Isilayeli, tyina ame ndyimutala ñgana, uti vala ovana va Kuse.
Hame-ko napola ova Isilayeli kotyilongo tyo Isitu?+
Hame-ko napola ova Filisitiya ko Keleta,+ ova Silia andyivepolo ko Kile?’+
8 ‘Tala! Omaiho a Tatekulu Ohamba Onene Siovaa, ekahi nokutala outumini wokulinga ononkhali,
Ngwe mekeuhanya-ko kombanda yohi.+
Mahi eumbo lya Sakoo himekelihanya-po aliho,’+ o Siovaa wetyipopia.
9 ‘Mokonda ame mandyipake-ko otyitumino,
Mandyipukumuna eumbo lyo Isilayeli. Mandyilipukumunina pokati kovanthu vovilongo aviho,+
Mandyilipukumuna ngeetyi omunthu asisa nomusalo
Apahalambe okamanya nakeke.
10 Aveho vokulinga ononkhali povanthu vange,
Vokupopia okuti: “Ononkhumbi kamambuya-le ponthele yetu, kamambutuvasi,” mavakankhia komutunga.’
11 ‘Monthiki omo, mandyikapindula-po ekaka lya Ndaviti+ liokwawa,*
Pomanthiwi atyo mandyikapata-po,
Pokwateka-teka mandyiviukisa-po.
Mandyilipindula-po alikala ngeetyi liali kohale,+
12 Opo vapinge etyi tyahupa ko Endoo,+
Neetyi tyahupa kovanthu vovilongo aviho vokwapopilwa enyina liange,’ o Siovaa wetyipopia, oe uli nokutyilinga.
13 Siovaa wati: ‘Makukeya ononthiki mbumwe,
Omulimi makakwama wokuteya,
Wokuhina onouva makakwama mu una watyinda ombuto.+
Monomphunda mamukamoma ovinyu yahoholola,+
14 Ovanthu vange ova Isilayeli mandyikevepola koupika,+
Avakapindula-po omapunda-umbo okwahanywa, avakakala-mo.+
Mavakatwika omiti vionouva avakanwa ovinyu yatyo,+
Mavakatwika omiti momataka avakalia ovinyango viatyo.’+
15 Siovaa Huku yavo, wati: ‘Mandyikevetwika motyilongo tyavo.
Motyilongo ame nevepaka,
Kamavakapolwa-polwa-mo vali.’”+