Otyiimbo tya Salomau
5 “Nanyingilile motyitaka tyange,+
Nanyingilile-mo mphange yange, tyitumphwa tyange.
Nanyingilile-mo andyipolo-mo onombao mbange,+
Andyili owiki wange moviteme, andyili owiki wange.
Andyinu ovinyu yange, andyipwene omahini ange.”+
“Liei, mapanga ange!
Nwei, nwei mukolwe noviwa vya ava velihole!”+
2 “Ame ndyilele, mahi omutima watyo ututumba vala.+
Omukwendye wange ndyihole wiivala okutotola pepito!”
“Ndyelule, ndyelule mphange yange, muwa wange,
Ndyelule muhikwena wange omuwa, pomba yehena otyinthembia!
Ndyelule, omutwe wange wepwila meyombo,
Onohuki mbange mbatalala, mbatalalekwa nounyenya wo kounthiki.”+
3 “‘Ekapote nelilula-mo-ale,
Nkhele ndyilivala vali?
Nelikoha-le konomphai,
Nkhele ndyiliata vali pohi ndyisile?’
4 Omukwendye wange ndyihole, wapola okuvoko kwae pemphana pepito.
Pahe omutima wange auhimbika okulumpha-lumpha-mo.
5 Andyipinduka-po-vo ndyikaikule omukwendye wange ndyihole.
Omavoko ange amoma omila,*
Ominwe viange viamoma omulela womila,
Viamomena umwe potyikwatelo tyepito.
6 Andyiikula epito, omukwendye wange anyingile,
Mahi nkhati vala ñgana, omulenga wange kepo, kepo wapita-le.
Tala, atyindyihama omapita.*
Ankhaovola, anehemuvasi.+
Andyiihana, ehenthavela.
7 Andyihonyena novayungi vepunda-umbo.
Avambete unene, andyipwila movipute.
Ou omulele wange aveumpholo.*
8 Ame ndyimuti anei, vahikwena vo mo Selusalei.
Nga mwavasa omulenga wange,
Mupopilei muti: Otyiivaluko tyili nokundia, neivaluka omunthu ndyihole.”
9 “Oityi utila omunthu wove uhole omuwa vali ku vakwendye vakwavo,
Oityi upopila ngootyo ove muhikwena omuwa vali pu vakwenyi?
Oityi utila omunthu wove uhole omuwa vali ku vakwendye vakwavo,
Soka pahe ututwala umwe kokwaana?”
10 “Omukwendye wange, omulenga, omumbambi.
Povanthu vena onomili 10, oe vala umoneka-po.
11 Omutwe wae, oolu, oolu yakangulwa nawa.
Onohuki mbae mbuyemba-yemba, mbuyemba-yemba uti vala onompha mbomundende,*
Onohuki mbae mbunthikovela nawa uti vala ekwaila.
12 Omaiho ae omawa, uti vala omaiho opomba ili pomeva aenda,
Uti vala omaiho opomba iyoa momahini,
Iti yoe-yoe pahe aikayotela kehimba, ketala lieyula omeva.*
13 Omapanda ae, uti opapa patyopelwa ombao,+
Ekahi ngounthumbo wombao yokunika nawa.
Omilungu viae, uti ononthemo, vimoma omulela womila.+
14 Ominwe vyo komavoko ae oolu, uti oolu yahonya nomamanya o kilisolitu.
Eli eimo liae eyo liondyamba liasolwa nawa, liamatwa-matwa omamanya osafila.
15 Ovikalo viae, uti onomphandyi mbomamanya ahongwa nawa, mbapumphama koolu yakangulwa nawa.
Olupe lwae, uti o Limbanu, utupu ou aelekwa nae, omuwa uti vala omusendulu.+
Omukwendye wange ndyihole omuwa, tyiivei vahikwena vo mo Selusalei.”