Isekiyele

20 Pahe menima lya pandu-vali, monthiki ya 10 yohanyi ya tano, ovakulu vamwe vomo Isilayeli veile, avapumphama ponthele yange, avapulu tyimwe ku Siovaa. 2 Ondaka ya Siovaa aindyendela aiti: 3 “Mona womulume, popia novakulu vomo Isilayeli, vetolela uti: ‘Etyi otyo tyapopia Tatekulu Ohamba Onene Siovaa, wati: “Onwe mweya no kwaame mwahanda okutehela mwaame? ‘Ndyitukaila umwe omwenyo wange, ame etyi mwahanda himemutolela-tyo,’+ o Tatekulu Ohamba Onene Siovaa wetyipopia.”’

4 “Ove wafwapo upopie omphela yavo?* Mona womulume wafwapo upopie omphela yavo? Vepopila vanoñgonoke ovipuka vitoyesa onombwale mbavo valingile.+ 5 Vepopila uti: ‘Etyi otyo tyapopia Tatekulu Ohamba Onene Siovaa, wati: “Monthiki nakoya Isilayeli,+ napopile ovana veumbo* lya Sakoo andyiane,* andyilinoñgonokesa kuvo motyilongo tyo Isitu.+ Yoo, naanene andyiveti: ‘Ame, ame Siovaa Huku yenyi.’ 6 Monthiki oyo, naanene, andyiti mandyivepolo motyilongo tyo Isitu, andyivetwala kotyilongo tyimwe neveovolela,* otyilongo tyomahini, nowiki.+ Otyilongo otyiwa* vali kovilongo aviho. 7 Pahe andyiveti: ‘Munthu na munthu ayumbehi ovipuka vitoyesa muna-vio vili komaiho enyi. Mwehelisilisei novilolo vitoyesa* vyo Isitu.+ Ame, ame Siovaa Huku yenyi.’+

8 “‘“Mahi, kaventhavelele, kavahandele okunthehelela. Kavayumbilehi ovipuka vitoyesa viali kotyipala tyavo, kavayekele-po ovilolo vitoyesa vyo Isitu.+ Ame andyiti haa mandyiveuyulila olunuma lwange, nonyengo yange aiho motyilongo tyo Isitu. 9 Mahi otyo netyilingilile enyina liange, opo liahasilisilwe momaiho ovanthu vovilongo, omu vakalaile.+ Mokonda ame nelinoñgonokesa kuvo* komaiho ovanthu ovo vovilongo pweetyi nevepola* motyilongo tyo Isitu.+ 10 Pahe, andyivepolo motyilongo tyo Isitu, andyivetwala no moluhandya.+

11 “‘“Andyivepe ovitumino viange, andyivenoñgonokesa ovitumino viange vionomphela,+ opo ou weendela-mo vimupe omwenyo.+ 12 Andyivepe vali ovityasapalo viange,+ vilinge otyilimbo tyetu navo,+ opo vanoñgonoke okuti ame Siovaa, ame ndyivesukula.

13 “‘“Mahi moluhandya, eumbo lya Isilayeli kalienthavelele.+ Kavaendelele movitumino viange, nii kavetavelele ovitumino viange vionomphela, ngwe omunthu weendela-mo, vimupa omwenyo. Vasilisa omapita ovityasapalo viange. Ame andyiti haa mandyiveuyulila onyengo yange moluhandya, ndyivenyime-ko.+ 14 Mahi otyo netyilingilile enyina liange, opo liahasilisilwe momaiho ovanthu vovilongo, omu nevepola.*+ 15 Ame tupu napopile navo moluhandya andyiane, natile himevetwala vali motyilongo nevepa+ — otyilongo tyomahini, nowiki,+ otyilongo otyiwa* vali kovilongo aviho — 16 mokonda kavetavelele ovitumino viange vionomphela, kavaendelele movitumino viange, vasilisa ovityasapalo viange, kombanda yomutima wavo walandula ovilolo viavo vitoyesa.+

17 “‘“Mahi ame nevelinga okankhenda,* anehevehanye-ko; hevenyimine-ko moluhandya. 18 Ame ovana vavo moluhandya nevetile,+ ‘Mwahaendelei movitumino vionombwale mbenyi,+ mwahalandulei ovitumino viavo vionomphela, nii mwehelisilisei novilolo viavo vitoyesa. 19 Ame, ame Siovaa Huku yenyi. Endelei movitumino viange, mwahatundei movitumino viange vionomphela, ovio vala mukwama.+ 20 Tyimonei okuti ovityasapalo viange vikola,+ avilingi otyilimbo tyetu noonwe, opo munoñgonoke okuti ame, ame Siovaa Huku yenyi.’+

21 “‘“Mahi ovana ovo, avahimbika okunthyitukila-po.+ Kavaendelele movitumino viange, kavetavelele ovitumino viange vionomphela, nii kavalingile etyi vipopia, ngwe omunthu weendela-mo vimupa omwenyo. Vasilisa ovityasapalo viange. Ame andyiti haa mandyiveuyulila olunuma lwange, nonyengo yange aiho moluhandya.+ 22 Mahi andyilikondola,+ netyilingilile enyina liange,+ opo liahasilisilwe momaiho ovanthu vovilongo, omu nevepola.* 23 Tupu naanena moluhandya, andyiveti mandyivetyandyanesa movanthu vovilongo, andyivetwala-twala no movilongo,+ 24 mokonda kavalingile etyi tyipopia ovitumino viange vionomphela, kavetavelele ovitumino viange,+ vasilisa ovityasapalo viange, avalandula ovilolo* vitoyesa vionombwale mbavo.+ 25 Ame neveyeka valandule ovitumino viahaviukile, novitumino vionomphela viehevepe omwenyo.+ 26 Neveyeka velisilise novilikutila viavo mwene — pweetyi vapaka ovana vavo aveho oviveli motupia+ — netyilinga ndyivehanye-ko, na vankhole umwe okuti ame, ame Siovaa.”’

27 “Pahe ove, mona womulume popila eumbo lya Isilayeli uti: ‘Etyi otyo tyapopia Tatekulu Ohamba Onene Siovaa, wati: “Otyo-ale etyi onombwale mbenyi mbandingile, tyokundinga omutomba, etyi vantholelele hatyo-ko valingile. 28 Ame andyivetwala motyilongo natile mandyivepe-tyo, pweetyi napopile, andyiane.+ Etyi vamona ovipunda viaya peulu, nomiti ominene,+ avahimbika okwaava ovilikutila viavo, noviawa viavo vinumanesa. Ngako valingila ovilikutila viavo viomuniko omuwa,* otyo vanengulila-ko oviawa viavo viovikunwa. 29 Pahe ame, andyivepulu andyiti: ‘Omphangu oyo yaya peulu oku mwenda, ipunguhuna-tyi? (Na hono Itiwa Omphangu Yaya Peulu.)’”’+

30 “Pahe, popila eumbo lya Isilayeli uti: ‘Etyi otyo tyapopia Tatekulu Ohamba Onene Siovaa, wati: “Onwe muli nokulisilisa ngeetyi tyalingile onombwale mbenyi kombanda yokulandula ovilolo vitoyesa vilinge onombalehi mbenyi?+ 31 Onwe nkhele na hono muna vala tyokulisilisa, mwaava ovilikutila kovilolo vitoyesa, novana venyi muvepaka* motupia?+ Otyo ove umbo lya Isilayeli wahanda ndyimutolele evi musuka navio?”+

“‘Ndyitukaila umwe omwenyo wange,’ wetyitola o Tatekulu Ohamba Onene Siovaa, ‘etyi mwahanda himemutolela-tyo.+ 32 Etyi muna-tyo momitwe* mwiivala okuti: “Tukalei ngo vomihoko omikwavo, ngovanthu vovilongo ovikwavo, vafenda* evai, vafenda emanya,”+ kamatyilingwa na katutu vala.’”

33 “‘Ndyitukaila umwe omwenyo wange’ o Tatekulu Ohamba Onene Siovaa wetyipopia, ‘ame mandyilingi ohamba yenyi andyitumina nokuvoko kwapama, nenkhanya liatandavela, andyimuuyulila onyengo yange onene.+ 34 Mandyimupolo pokati kovanthu, andyimukongolola kovilongo mwatahaililwe nokuvoko kwapama, nenkhanya liatandavela, otyo ndyuuyula onyengo yange onene.+ 35 Mandyimutwala moluhandya lwovanthu, ngamo ndyikapopila omphela yenyi otyo tulitala umwe tyipala na tyipala.+

36 “‘Ngeetyi naongelele omphela onombwale mbenyi moluhandya lwotyilongo tyo Isitu, noonwe mandyimwoongela omphela,’ o Tatekulu Ohamba Onene Siovaa wetyipopia. 37 ‘Mandyimukwatesa mombwelo yomphangoti yomunthita,+ mandyimweeta memphu liomphango.* 38 Mahi mandyikapola onomphuki pokati kenyi, naava valinga ononkhali vamphengesa.+ Mandyikevepola motyilongo vailukila, mahi kamavakanyingila motyilongo tya Isilayeli.+ Onwe mamukankhola umwe okuti ame, ame Siovaa.’

39 “Ove umbo lya Isilayeli, etyi otyo tyapopia Tatekulu Ohamba Onene Siovaa, wati: ‘Endei, munthu na munthu akalingile ovilolo viae vitoyesa.+ Mahi ine onwe haa kamunthavela, kamamuketyivila vali okusilisa enyina liange likola novilikutila vienyi, novilolo vienyi vitoyesa.’+

40 “‘Mokonda, komphunda yange ikola, omphunda yaya peulu ya Isilayeli,’+ o Tatekulu Ohamba Onene Siovaa wetyipopia, ‘oko eumbo aliho lya Isilayeli, aveho, oko mavakafendela ame oko motyilongo.+ Oko, ame mandyikemuhambukilwa, andyikemwiita otyali tyenyi, noviawa vienyi viovinyango vyo tete, novipuka vienyi aviho vikola.+ 41 Mokonda yomuniko omuwa,* ame mandyikemupanda, tyina namemupolo pokati kovanthu, andyimukongolola kovilongo mwaile-ile nako;+ ame mandyikamoneka okuti ndyikola pokati kenyi, momaiho ovanthu vovilongo.’+

42 “‘Onwe mamukanoñgonoka umwe okuti ame, ame Siovaa,+ tyina namemutwala motyilongo tya Isilayeli,+ otyilongo natolele onombwale mbenyi, andyiane. 43 Kotyilongo oko, onwe mamukahinangela aviho mwalingaile, evi mwalinga-linga viemusilisa,+ noonwe mwene amukelitoya* kombanda yovipuka aviho ovivi mwalingaile.+ 44 Pahe opo mamukanoñgonoka okuti ame, ame Siovaa, tyina namemulingi ngootyo mokonda yenyina liange,+ anehemulingi etyi tyata movituwa vienyi ovivi, etyi tyata mokwasila kwenyi, ove umbo lya Isilayeli,’ o Tatekulu Ohamba Onene Siovaa wetyipopia.”

45 Ondaka ya Siovaa aindyendela vali aiti: 46 “Mona womulume, tala kohika yokwahula kombwelo, popila ohika yo kombwelo, ula etyi matyikalingwa otyiteta tyohika yo kombwelo. 47 Popila otyiteta tyohika yo kombwelo uti: ‘Tehelela ondaka ya Siovaa. Etyi otyo tyapopia Tatekulu Ohamba Onene Siovaa, wati: “Ndyikahi nokunthiakana otupia matuyoko-po+ omiti vili mwoove aviho, no viokwayova, no viokwakukuta. Omutemo watyo kamaukanyima,+ maukayoka onohika ambuho, okuhimbikila kombwelo atukehika kombanda. 48 Ohitu aiho maiketyimona* umwe okuti ame, ame Siovaa, ame nanthiakana otupia, otupia tumwe twahanyimwa.”’”+

49 Ame andyiti: “Tatiei, Tatekulu Ohamba Onene Siovaa! Veli nokumphopia vati: ‘Ou upopia vala onoñgano!’”*