Omukanda wo Tete wa Samuwele

15 Samuwele apopila Saulu okuti: “Siovaa wanthumine okukulembula opo ukale ohamba yovanthu vae, ova Isilayeli.+ Pahe tehelela etyi Siovaa apopia.+ 2 Siovaa womambamba ovita wati: ‘Mandyikoyesa ova Amaleke mokonda valwisa ova Isilayeli etyi vekahi mondyila okutunda ko Isitu.+ 3 Pahe enda, kaipae ova Amaleke+ ovehanyeko kumwe novipuka viavo aviho.+ Weheveevele;* ipaa+ ovalume novakai, novana nomalukembe, nonongombe nonongi, nomakamelu novimbulu.’”+ 4 Saulu aihana omaswalali, eevalulila ko Telaii: ankho omaswalali ena 200.000 novalume vatunda ko Sundaa 10.000.+

5 Saulu aende atee kepunda-umbo lyo Amaleke, aveveyolamena melola.* 6 Saulu apopila ova Keneu okuti:+ “Hondovokei, tundei pokati kova Amaleke opo nehemwipaele kumwe navo.+ Mokonda onwe mwalinga olwembia olunene ova Isilayeli aveho,+ etyi vatunda kotyilongo tyo Isitu.” Ova Keneu avatundu pokati kova Amaleke. 7 Konyima yotyo, Saulu aipaa ova Amaleke,+ okutuka ko Havilaa+ atee ko Sule,+ otyilongo tyikala popepi no Isitu. 8 Akwate ohamba yova Amaleke Angange+ eheiipaa, mahi ovanthu ovakwavo eveipaa nomutunga.+ 9 Mahi Saulu novanthu ovakwavo, avaevela Angange, nonongi nonongombe mbukahi vali nawa, ovinyama viokwanina vali, onongi ononthwei novipuka aviho vikahi nawa.+ Kavahandele okuvihanya-ko. Mahi aviho vihekahi nawa, vina vahapandele avevihanye-ko.

10 Ngootyo Siovaa apopila Samuwele okuti: 11 “Nelivela onombei* etyi nalinga Saulu ohamba, mokonda wayeka-po okulinga etyi napopia, kafwisilepo onondaka mbange.”+ Samuwele atyimwiihama unene, eliyave ku Siovaa otyinthiki atyiho.+ 12 Etyi Samuwele apindukapo komuhuka vekelivase na Saulu, Samuwele avemupopila okuti: “Saulu waile ko Kalumelu,+ atungu-ko otyimato tyomunkhima wae.+ Konyima akondoka ko Silingale.” 13 Etyi Samuwele elivasa nae, Saulu emupopila okuti: “Siovaa ekuyambe. Ame nafwisapo ondaka ya Siovaa.” 14 Mahi Samuwele ati: “Oityi ndyiivite tyivandala ngonongombe nonongi?”+ 15 Saulu akumbulula okuti: “Twembupola kova Amaleke, ovanthu vaevela onongi mbukahi nawa nonongombe, na mbulingilwe Siovaa ovilikutila Huku yove; mahi viokwahupapo twevihanyauna.” 16 Samuwele emupopila okuti: “Wahapopie vali! Mandyikupopila etyi Siovaa amphopila mongulo kongulohi .”+ Saulu ati: “Wati-wi?”

17 Samuwele emupulu okuti: “Ove kwelitombele+ etyi wakala onkhalamutwe yomihoko viova Isilayeli, etyi Siovaa ekulembula ukale ohamba yova Isilayeli?+ 18 Konyima Siovaa ekwavela otyilinga ati: ‘Enda, kahanye-ko ova Amaleke onondingavivi.+ Velwisa atee uvehanyako.’+ 19 Omokonda yatyi waanyena ondaka ya Siovaa? Ñgeno wetavelele, ove walinga etyi wahatuminwe okupola ovipuka viavo,+ walinga etyi tyapenga komaiho a Siovaa!”

20 Mahi Saulu apopila Samuwele okuti: “Mahi ame netavela umwe ondaka ya Siovaa! Nalinga umwe otyilinga Siovaa anthuma, andyieta Angange ohamba yova Amaleke, ova Amaleke nevehanyako.+ 21 Mahi ovanthu avapoloko onongi nonongombe, vimwe povipuka oviwa ankho vina okuhanyaunwa, opo vilingilwe otyilikutila Siovaa Huku yove, ko Silingale.”+

22 Samuwele emupopila okuti: “Okuti Siovaa uhambukilwa oviawa viokuyokwa novilikutila,+ ngeetyi ahambukilwa okutavela ondaka ya Siovaa? Noñgonoka okuti, okutavela tyesukisa vali tyipona ovilikutila,+ okutehelela ondaka yae hahe vali tyipona ovilenga+ vionongi; 23 mokonda oumphwiililiki+ welifwa nonkhali yokutapesa,+ elungavi lielifwa nokukwata owanga no nokufenda ovika-huku.* Etyi ove waanya okutavela ondaka ya Siovaa,+ nae wekwanya ukale ohamba.”+

24 Saulu pahe apopila Samuwele okuti: “Nalinga onkhali ku Siovaa, hetavelele onondaka mbove, mokonda natila owoma ovanthu andyilingi etyi vaita. 25 Pahe mbambavo, otyiponyo onkhali nalinga, tukondoke atuho opo ndyikelivondele ku Siovaa.”+ 26 Samuwele apopila Saulu ati: “Ame himakondoka noove, mokonda ove kwetavelele ondaka ya Siovaa, Siovaa nae wekwanya ukale ohamba yova Isilayeli.”+ 27 Samuwele etyi ekahi nokwenda, Saulu akwate kevava liotyikutu tyae tyehena omankhanya, alitanduka-ko. 28 Samuwele emupopila okuti: “Siovaa hono wekutukula ouhamba wo Isilayeli, meuwaavela mukwenyi ukahi vali nawa kwoove.+ 29 Tyihe-otyo vala, Omunene wo Isilayeli+ kamayeke-po okufwisapo ondaka yae,+ nii kamapilulula etyi asoka,* mokonda Ngwe hamunthu wokupilulula etyi asoka.”*+

30 Ngwe ati: “Nalinga onkhali. Mahi ndinge-vo okankhenda mba, mokonda vala yovakulu votyilongo, nova Isilayeli. Tukondoke atuho, ndyikelivondele ku Siovaa Huku yove.”+ 31 Samuwele avakondoka na Saulu, Saulu ekelivondela kotyipala tya Siovaa. 32 Samuwele ati: “Eta kuno Angange ohamba yova Amaleke.” Angange eya, mahi watilile owoma,* mokonda po tete Angange wapopia okuti: ‘Tyotyili himaipawa vali tyalambale.’* 33 Mahi Samuwele ati: “Ngeetyi omutunga wove wasa ovakai ovanyingi tyehena ovana, nyoko nae mesala tyihena ovana.” Pahe Samuwele atyoka-tyoka ovinthimbu Angange otyo Siovaa etyiete ko Silingale.+

34 Samuwele aende no ko Lamaa, Saulu aende no keumbo liae ko Simbeaa ya Saulu. 35 Atee Samuwele ankhia kamwene vali Saulu, mokonda Samuwele wanumanene unene na Saulu.+ Siovaa elivele etyi alinga Saulu ohamba yo Isilayeli.+