Selemiya
35 Ondaka ya Siovaa ayeendela Selemiya pononthiki mba Seoyakii,+ omona wa Sosiya, Seoyakii ohamba yo Sundaa, aiti: 2 “Enda keumbo lyo vokwatuka mu Lekambe,+ kapopie navo oveeta mondywo ya Siovaa, mondywo yokulila; pahe ovepe ovinyu vanwe.”
3 Atwende na Saasaniya omona wa Selemiya, Selemiya omona wa Hambasinia, naava velilandula navo, novana vae aveho, no veumbo lyo vokwatuka mu Lekambe aveho, 4 andyivetwala mondywo ya Siovaa. Andyivetwala mondywo yokulila yovana va Hanaa, Hanaa omona wa Sindaliya, omunthu wa Huku yotyotyili. Ondywo oyo yokulila ili ponthele pondywo yokulila yovanene vatyo ili keulu liondywo yokulila ya Maaseya omona wa Saluu omuyungi wombundi. 5 Pahe andyiyulisa ovinyu momalufo no monomphindo, andyipe ovalume veumbo lyo vokwatuka mu Lekambe andyiveti: “Nwei ovinyu.”
6 Mahi ngwe avati: “Onthwe kamatunu ovinyu mokonda Sonandambe*+ omona wa Lekambe ombwale yetu wetwaavela otyitumino tyokuti: ‘Noonwe novana venyi, ovinyu mwahanwei. 7 Mwahatungei omaumbo, mwahakunei ombuto, nii mwahatwikei omapia omiti vionouva, mwahakalei nepia liomiti vionouva. Mahi, kalei-kalei vala monohinge, opo mukale ehimbwe motyilongo omu mukala mwailukila.’ 8 Onthwe pahe tutavela umwe vala onondaka mba Sonandambe omona wa Lekambe ombwale yetu, tulinga atyiho etutuma, nkhele twali katunenwe ovinyu — noonthwe, novakai vetu, novana vetu ovakwendye novakainthu. 9 Onthwe nomaumbo katutungu tukale-mo, nomiti vionouva tutupu, nii omapia, nii ombuto. 10 Onthwe tukala umwe vala monohinge, tutavela atyiho Sonandambe,* ombwale yetu etutuma. 11 Mahi etyi Nambukondonosole* ohamba yo Mbambilonia eya okulwisa otyilongo,+ onthwe atuti: ‘Endywei tunyingile mo Selusalei tuhupe kovita viova Kalindeya no kova Silia, pahe tukala mo Selusalei.’”
12 Ondaka ya Siovaa ayeendela Selemiya aiti: 13 “Etyi otyo tyapopia Siovaa womambamba ovita Huku ya Isilayeli wati: ‘Enda, kapopile ovalume vomo Sundaa no vokukala mo Selusalei, uti: “Hanwe napangela vala nokulondola mutavele onondaka mbange?”+ o Siovaa wetyipopia. 14 “Sonandambe omona wa Lekambe, watumine vokwatuka mwe vahanwe ovinyu, na hono ondaka yatyo oyo oyo umwe vala vakwatapo, kavanu ovinyu, vetavela otyitumino tyombwale yavo.+ Ame soka ndyipangela vala okupopia noonwe,* mahi otyo mwehenthavela-le.+ 15 Ame ndyikalela vala okumutuma ovaundapi vange aveho ovauli, ndyiti umwe andyivetumu andyipaleka,*+ otyo ndyiti: ‘Kondokei-vo vala, yekei-po onondyila mbenyi onombi+ amulingi etyi tyaviuka! Mwahalandulei ono huku ononkhwavo, mwehembufendei. Opo vala, mamukala-kala motyilongo nemupa, noonwe nonombwale mbenyi.’+ Mahi onwe kamwayendelekele okutwi kwenyi, kamwendyivile. 16 Vokwatuka mu Sonandambe omona wa Lekambe, vana valandula umwe vala otyitumino ombwale yavo yevepele,+ mahi ovanthu ava kavendyivi.”’”
17 “Pahe, etyi otyo tyapopia Siovaa Huku womambamba ovita Huku ya Isilayeli wati: ‘Ame ndyili nokweetela o Sundaa novanthu aveho vokukala mo Selusalei, ovihuna aviho nevepopilile nevetile elowei,+ mokonda ame nevepopilile mahi avahanthehelela, andyiveihana andyipaleka, mahi avehenthavela.’”+
18 Selemiya apopila veumbo lya Lekambe ati: “Etyi otyo tyapopia Siovaa womambamba ovita Huku ya Isilayeli wati: ‘Mokonda onwe mwetavela otyitumino tya Sonandambe, ombwale yenyi, mwakwatapo umwe ovitumino viae aviho, mulinga umwe vala etyi emutuma, 19 etyi otyo tyapopia Siovaa womambamba ovita Huku ya Isilayeli wati: “Apeho makukala umwe watuka mu Sonandambe* omona wa Lekambe, malingi omuundapi wange.”’”