Selemiya
18 Ei oyo ondaka yaendelele Selemiya yatunda ku Siovaa: 2 “Katuka, lauka no keumbo liomuhongi wonombiya,+ oko, oko ame mandyikapopila onondaka mbange umbwiive.”
3 Ame andyilauka no keumbo liomuhongi, ndyimuvasa uhonga ombiya. 4 Mahi ombiya omuhongi eli nokuhonga aihanyaukila umwe peke liae. Omuhongi amamanga vali onthata alingi ombiya onkhwavo, ombiya asoka ikahi vali nawa.*
5 Pahe ondaka ya Siovaa aindyendela aiti: 6 “‘Okuti ame hipondola okumulinga ngeetyi omuhongi wombiya alinga, onwe umbo lya Isilayeli?’ o Siovaa wetyipopia. ‘Tala! Onwe peke liange, mwafwa onthata ei peke liomuhongi, onwe umbo lya Isilayeli.+ 7 Apeho tyina namapopi okutukula, nokunyima-ko, nokuhanya-ko ovanthu votyilongo tyimwe hamwe ouhamba umwe,+ 8 ngwe avayeke-po ovivi viavo ame nati hevihandele, mandyilikondola,* anahaeta vali emone nahandele okweeta.+ 9 Mahi apeho tyina namapopi okutunga, nokutwika ovanthu votyilongo tyimwe hamwe ouhamba umwe, 10 ngwe avalingi ovipuka ovivi komaiho ange, avehetavela ondaka yange, mandyilikondola,* andyiyeke-po otyiwa nahandele okuvelingila.’
11 “Pahe popila-vo ovalume vo mo Sundaa no vokukala mo Selusalei uti: ‘Etyi otyo tyapopia Siovaa wati: “Ame ndyili nokutunga-tunga ovihuna,* ndyili nokumupakela eliva enene. Yekei-po-vo vala mbaa onondyila mbenyi onombi, viukisei onondyila mbenyi, novipuka mulinga.”’”+
12 Mahi ngwe avati: “Tyitupu-ale vali!+ Onthwe matulandula umwe vala omalusoko etu, munthu na munthu pwoonthwe, malingi etyi mwene tyeya komutima wae omuvi wonkhango.”+
13 Mahi, etyi otyo tyapopia Siovaa wati:
“Nkhele pulei-vo vala kovanthu vovilongo.
Olie weivile-ale otyipuka ngeetyi?
Isilayeli wahaendele na mulume, walinga otyipuka otyivi unene.+
14 Okuti ongandyi yo ko Limbanu maipu-ko kombwelo yonomphunda mbayo?
Okuti omaande okwatenda, atunda kokule maakukuta?
15 Mahi ovanthu vange vandimbwa,+
Valingila ovilikutila* otyipuka tyahasilivila,+
Vatokesisa vakwavo nonondyila mbavo, monomphai mbavo mbo kohale,+
Vevetwala monondyila mbokuteta mbahaviukisilwe.*
16 Otyilongo tyavo vetyilinga otyilongo tyitilisa owoma,+
Aveho mavakakwata-po maveketyitala avatili owoma, avakapuka komutwe.+
17 Ame mandyikalinga lwomphepo itunda koutundilo, mandyikevetyandyanesila umwe momaiho onondyale mbavo.
Ame mandyikevepa ekohi, himekevepa otyipala monthiki vahuka-huka.”+
18 Ngwe avati: “Endywei tutele eliva Selemiya,+ mokonda otyitumino tyovanakwa* vetu, neetyi tyatola ovanongo vetu, nonondaka mbovauli vetu kamambunyimwa-ko. Endywei tumutendeleye,* twahatehelei etyi apopia.”
19 Nthehelele-vo mbaa Siovaa,
Tehela etyi vokundyele veli nokupopia.
20 Okuti otyiwa tyilifeta notyivi?
Vaheya etoto vamphole omwenyo.*+
Hinangela okuti ame natalamene kotyipala tyove opo ndyipopie oviwa viyemba kuvo,
Opo onyengo yove ivehondovoke.
21 Pakula ovana vavo kondyala,
Vepakula kononkhono mbomutunga.+
Ovakai vavo vesale tyehena ovana, tyehena ovalume.+
Ovalume vatyo vankhie kovihuna viipaa,
Ovana vavo ovakwendye vatoke komutunga movilwa.+
22 Momaumbo avo mwiivalele ononkhu,
Tyina wameveetela ovifwanga.
Mokonda vaheya etoto vankhwate,
Vatela omaliva, veetelela onomphai mbange.+
23 Mahi ove, ove Siovaa,
Wii nawa omaliva avo aeho vapanga okwahanda okundyipaa.+
Weheveevele ovivi viavo,
Wahanyime onkhali yavo komaiho ove.