Okutunda
24 Atolela Mwisesi okuti: “Londa komphunda enda ku Siovaa. Endei na Alau, na Nandambe, na Ambiyuu,+ novakulu 70 ova Isilayeli, amulipetamenena kwe kokule. 2 Mwisesi oe vala ufwena pu Siovaa aike; vakwavo kavapondola okufwena-po, ovanthu ovakwavo aveho kavapondola okulonda nae komphunda.”+
3 Pahe Mwisesi aende kovanthu evepopila onondaka mba Siovaa ambuho, novitumino viae aviho vionomphela,+ ovanthu aveho avakumbululila kumwe avati: “Onthwe twetavela okulinga atyiho Siovaa apopia.”+ 4 Mwisesi ahoneka onondaka ambuho Siovaa+ apopia. Apinduka-po komuhuka-huka, akatunga omutala wovilikutila menyi liomphunda, aiki onomphandyi 12 mbomamanya, mbutuuka momihoko aviho 12 vyo Isilayeli. 5 Pahe atumu ovakwendye ova Isilayeli, avalingi oviawa viokuyokwa, avaave ononthane valingile ovilikutila viombembwa+ Siovaa. 6 Mwisesi akwata kapii ohonde eipake movilindo, ohonde yahupa-po einyanye komutala wovilikutila. 7 Akwata omukanda womphango, eutangela ovanthu nondaka yakaluluka.+ Ngwe avati: “Matulingi atyiho Siovaa apopia, matutavela kwe.”+ 8 Mwisesi apolo ohonde einyanye kovanthu,+ ati: “Ei ohonde yomphango Siovaa alinga noonwe, yelikwata nonondaka ombo ambuho.”+
9 Mwisesi, na Alau, na Nandambe, na Ambiyuu, novakulu 70 ova Isilayeli avalondo komphunda, 10 avamono Huku yova Isilayeli.+ Ponomphai mbae avamono-po otyipuka tyikahi ngemanya liosafila tyasukuka unene ngeulu.+ 11 Kalingile natyike ovalume ovo ova Isilayeli vankhimana;+ vamwene memonekelo Huku yotyotyili, avali avanu.
12 Siovaa pahe atolela Mwisesi okuti: “Londa kuno komphunda, ngako ukala. Mandyikwavela omamanya omapapi ena ovitumino nahoneka vilongeswe ovanthu.”+ 13 Ovo Mwisesi na Susuwee,+ omukwatesiko wae avamaneka avaende, ou Mwisesi alondo aike komphunda ya Huku yotyotyili.+ 14 Mahi wapopilale ovakulu okuti: “Tukevelei pano matuya.+ Ovo Alau na Huli+ mamusala navo. Tyina umwe ena omphela ende kuvo.”+ 15 Mwisesi alondo komphunda otyo ekaka lifika omphunda.+
16 Omunkhima+ wa Siovaa aukala komphunda Sinai;+ ekaka alifiki omphunda mononthiki epandu. Monthiki ya pandu-vali aihanena Mwisesi mokati kekaka. 17 Ova Isilayeli ankho vamona omunkhima wa Siovaa umoneka ngotupia tukahi nokuyoka peulu liomphunda. 18 Mwisesi anyingila mekaka komphunda.+ Akala-ko ovitenya 40 novinthiki 40.+