Wahonekelwa Ova Hembeleu
2 Otyo tyahandela tutie, tyina twiiva ovipuka atukonkhenya umwe vali nawa tyipona etyi tulingale,+ opo twahapambuke mondyila.+ 2 Mokonda ine ondaka yatolelwe, ondaka yatundila monoandyu+ yalinga umwe yotyili, ou wokupengesa no wokwehetavela avalingwa umwe etyi vena okulingwa,+ 3 okuti onthwe, onthwe matuhupu ine tulinga omusenyo eyovo enene?+ Lina liatolelelwe tete mu Tatekulu yetu,+ ava vemwiiva pahe onthwe ngavo vetuungulula, 4 oku tupu Huku elipake kumwe navo ape ovanthu oumbangi novilekesa,+ nomaelema, novilinga ovinene momphepo yae ikola, ei aandyela omu mwene etyihandela.+
5 Mokonda hanoandyu apakulila ohi ei maikeya,+ ei tuli nokupopia. 6 Mahi umwe ombangi, una apa ati: “Omunthu wehesilivila-le ove upaka momutwe, o watyi; omunthu utuka movanthu oe usuka nae?+ 7 Ove omunthu wemulinga vala katutu omututu konoandyu; wemuvaleka otyuuya tyomunkhima, ahumbwe, ove wemunakela ovilinga walinga nomavoko ove vikale kolutei lwae. 8 Ovipuka aviho wevipaka mombwelo yonomphai mbae.”+ Mokwemupakulila ovipuka aviho,+ Huku kasile-po natyike ahapakele kolutei lwae.+ Mahi nkhele, onthwe katutyeete okuti ovipuka aviho vili kolutei lwae.+ 9 Mahi tweete Sesusi yatyo, walingilwe omututu vali konoandyu,+ pahe wapewa otyuuya ankhimane, ahumbwe mokonda wamwene umwe ononkhumbi ankhi,+ mokankhenda okanene ka Huku, amakela kononkhia okwalingila umwe ovanthu aveho.+
10 Ankho tyata-mo umwe, okuti ou ovipuka aviho viatungilwa, mu ou vieila-ko, ou wokwaeta ovana ovanyingi momunkhima,+ aviukise umwe nawa Ohongoi Onene yeyovo+ liavo nononkhumbi.+ 11 Mokonda tyati umwe oyou ukoha vakwavo, ovava vakohwa,+ aveho ova wike vala,+ otyo etyi tyokuveti onondenge mbae tyehemukundisila,+ 12 ati umwe: “Ame mandyipopi enyina liove konondenge mbange; pokati kewaneno opo ame mandyikuhivilikila noviimbo.”+ 13 Ngwe tupu ati: “Ame mandyiyumbu umwe mwe onthumbi.”+ Ati vali: “Tala! Naame, novana ovatutu, ava Siovaa* ampha.”+
14 Naina, mokonda “ovana ovatutu,” o vohonde nohitu, nae akala umwe movipuka ovio,+ opo anyime-ko nononkhia ou wokuna oviti vinthikululila ovanthu kononkhia,+ oo yatyo Eliapu,+ 15 ayovola* aveho ava ankho vapangela umwe vala moupika kombanda yowoma wononkhia.+ 16 Ngwe tyili, hanoandyu alingila, mahi ulingila ombuto ya* Ambalayau.+ 17 Otyo ankho esukisila umwe okufwa “onondenge” mbae mu atyiho,+ opo alinge omunene-nakwa wokankhenda, wonthyole yotyili movipuka vya Huku, aave otyilikutila tyombembwa+ tyikoha ovanthu mononkhali.+ 18 Nae mokonda wamona umwe ononkhumbi etyi alolwa,+ utyivila umwe okuhukulula ava veli nokulolwa.+