Selemiya
16 Ondaka ya Siovaa aindyendela vali aiti: 2 “Wahanepe omukai nii wahakale novana motyilongo etyi, tyilinge ovakwendye tyilinge ovakainthu. 3 Siovaa wapopia ovana ovakwendye novakainthu vatyitilwa motyilongo tyino, no voina vokwevekutula no vohe vokweveeta kouye, wati: 4 ‘Mavakankhia komauvela omavi,+ mahi kamavakalilwa, kamavakapakwa; mavakalinga ombumbi yeheke.+ Mavakanyimwa-ko nomutunga nondyala,+ ovivimbi viavo mavikalinga okulia kwoviila meulu no kwovinyama meheke.’
5 Etyi otyo tyapopia Siovaa wati:
‘Wahanyingile meumbo muliwa okulia kwomutambo,
Wahaye-ko okalila, wahakatale ava vahiwa-po.’+
‘Mokonda ovanthu ovo nevepola ombembwa yange,’ o Siovaa wetyipopia,
‘Nevepola olwembia lwange olunene nokankhenda kange.+
6 Tyilinge ovanene, tyilinge ovatutu mavakankhia-mo, motyilongo etyi.
7 Petupu ou mataindyila okulia ava valula,
Eveungumanese kokulila vavo vankhia;
Nawike meveavela olufo luvekengelela,
Vanwe mokonda yononkhia mbo vohe no voina.
8 Tupu wahanyingile meumbo muna otyipito,
Okapumphama novanthu, mulie amunu.’
9 “Etyi otyo tyapopia Siovaa womambamba ovita, Huku yova Isilayeli wati: ‘Pohika pano, pononthiki mbove, momaiho ove mwene, mandyimane-ko ondolo, nehambu, nondaka yomukwendye unepa no yomuhikwena unepwa.’+
10 “Tyina wamapopila ovanthu ovo onondaka ombo ambuho, mavekekupula okuti: ‘Oityi Siovaa etuhunina ovihuna ovio aviho? Otyityi twalinga tyapenga, onkhali patyi twalinga Siovaa Huku yetu?’+ 11 Ove vekumbulula uti: “Omokonda onombwale mbenyi vandyeka-po,”+ o Siovaa wetyipopia, “vakalandula ovika-huku, ovio vakalingila ngavio vafenda.+ Mahi ame vandyeka-po, avahapake nawa otyitumino tyange.+ 12 Onwe mwamana-mo umwe kokulinga evi viapenga, ha ngonombwale mbenyi,+ onwe muna onkhango, tyiti vala ou ulandula omutima wae wovivi, ou ulandula omutima wae wovivi, soka kamunthavela.+ 13 Otyo mandyimuyumbila kondye yotyilongo etyi, amukatokela kotyilongo tyiti vala noonwe nonombwale mbenyi kamutyii,+ oko mamukafendela ovika-huku na tyitenya na tyinthiki,+ mokonda himemulingi onkhenda.”’
14 “Mahi omboo mbuya ononthiki,” o Siovaa wetyipopia, “ononthiki vahamakati vali: ‘Na Siovaa umwe una omwenyo, wapola ova Isilayeli motyilongo tyo Isitu!”+ 15 mahi mavati: “Na Siovaa umwe una omwenyo, wapola ova Isilayeli kotyilongo tyo kombanda no kovilongo aviho evetyandyanesile!” Ame mandyivekondola kotyilongo tyavo, otyilongo napele onombwale mbavo.’+
16 ‘Ame oo ndyikonga ovafwi vombisi ovanyingi,’ o Siovaa wetyipopia,
‘Mavekevefwa.
Haa pahe mandyikongo ovakongo ovanyingi,
Avekeveyeva monomphunda ambuho, no kovipunda aviho,
No momaleva o mononkhanda.
17 Mokonda omaiho ange eete ovipuka aviho valinga.*
Kavaholamene kotyipala tyange,
Nii ovipuka valinga ovivi kaviaholamene komaiho ange.
18 Tete mandyivetyepesako kovivi aviho valinga nononkhali vena-mbo,+
Mokonda vasilisa otyilongo tyange novilolo viehena omwenyo* viovika-huku viavo vitoyesa,
Veyulisa epingo liange novipuka viavo vianika.’”+
19 Ove Siovaa, nonkhono mbange, ndyakulilo yange,
O mwoove ndyitilila monthiki yokuhuka-huka,+
Kwoove makuya ovanthu vovilongo, mavatundu konohika mbo kokule-kule mbohi.
Mavakati: “Ovakulu vetu vapiñgana umwe vala omatutu,
Ovipuka viahasilivila, viahape, viahaeta ouwa.”+
20 Okuti omunthu upondola okulilingila ono-huku,
Ngwe tyili hano-huku?+
21 “Mandyivenoñgonokesa,
Pononthiki opo, mandyivenoñgonokesa ononkhono mbange, omafa ndyinao,
Mavakankhola umwe okuti enyina liange o Siovaa.”