Omukanda wo Tete wa Samuwele

25 Etyi pakala Samuwele+ ankhi, ova Isilayeli aveho avalingi omutambo avekemupaka popepi neumbo liae ko Lamaa.+ Pahe Ndaviti aende no moluhandya lwo ko Palaa.

2 Ko Maoo+ ankho kukala omulume umwe uundapa ko Kalumelu.*+ Ankho omuhona; wali nonongi 3.000 novinkhombo 1.000, ankho ukahi nokukulula ovingi omainya ko Kalumelu. 3 Omulume oo ankho utiwa o Nambale+ omukai wae o Ambingaili.+ Omukai watyo ankho omuwa, wapunga, mahi omulume watyo ankho o womuhoko wa Kalembe,+ ankho ombuluvulu omukalavi.+ 4 Etyi Ndaviti ekahi moluhandya, eivi okuti Nambale ukahi nokukulula onongi mbae omainya. 5 Ndaviti atumu ovalume 10 ku Nambale, evepopila okuti: “Endei ko Kalumelu, tyina mwamavasi Nambale mupopilei muti Ndaviti upula. 6 Tyina mwamemuvasi muti: ‘Tatekulu kala nomwenyo omule, kala nekongoko ewa,* vomeumbo liove vakale nawa, ovipuka aviho una-vio viende nawa. 7 Neiva okuti ukahi nokukulula omainya onongi mbove. Etyi ovanthita vove ankho tuna-vo, katwevelingile natyike otyivi,+ natyike vakambele mononthiki ombuho vakala ko Kalumelu. 8 Upondola okupula kovaundapi vove, mavekupopila. Linga-vo onkhenda omafwalali ange mokonda tukahi mononthiki mbehambu.* Mbambavo, twavele-vo onthwe vaundapi vove nomona wove Ndaviti etyi una-tyo.’”+

9 Ovaundapi va Ndaviti avaende avakapopila Nambale onondaka ambuho Ndaviti apopia. Etyi vamana okupopia, 10 Nambale apulu ovaundapi va Ndaviti okuti: “Ndaviti omona wa Sesee olie? Kuna ovaundapi ovanyingi vahena kovahona vavo, otyo vaya.+ 11 Okuti ndyipondola okupola okulia kwange, nomaande ange, nohitu yovinyama ame naipaela ovaundapi vange vokukulula omainya ovingi, andyiavela ovalume ovo nehei oku vatunda?”

12 Ngootyo, ovaundapi va Ndaviti avakondoka, avemupopila atyiho Nambale atola. 13 Ndaviti apopila omafwalali ae okuti: “Manekei, pakei omitunga motyilalo!”+ Aveho avamaneka omitunga, Ndaviti nae amaneka wae. Ndaviti aende novalume 400, ovakwavo 200 avesala nokuyunga ovityuma.

14 Pononthiki opo, umwe povaundapi va Nambale apopila Ambingaili, omukai wa Nambale okuti: “Ndaviti watumine ovatumwa-ndaka vae okutunda moluhandya opo vakakukunye omuhona wetu mahi ngwe evepopi omapita.+ 15 Ovalume ovo ankho vetulinga nawa. Kavetulingile natyike otyivi, ononthiki ambuho twakala navo momaluhandya ankho tutupu natyike twakambela.+ 16 Ononthiki ambuho, otyitenya notyinthiki ankho vekahi ngotyimato tyituyakulila mokweenda kwononthiki ambuho ankho tukahi navo nokulisa onongi. 17 Pahe, soka etyi molingi mokonda matyietela ehanyauno tatekulu yetu novanthu aveho vomeumbo liae.+ Petupu omunthu+ utyivila okupopia nae, mokonda utupu onondunge.”*

18 Ambingaili+ liwa-liwa apolo onombolo 200, nomilindi viovinyu vivali, nonongi ononthano, nonosesu* ononthano ononene mbononkhange, nomingome 100 vialingwa nonombe, nomingome 200 vialingwa nomakuyu, evipake aviho kovimbulu.+ 19 Pahe apopila ovaundapi vae okuti: “Otyo mwenda, ame mandyimulandula.” Mahi ahapopila natyike Nambale omulume wae.

20 Pweetyi ekahi mondyila ikwata pokati konomphunda, tyavelama kotyimbulu, tyina akatala-ko vala, o Ndaviti nomafwalali ae vekahi nokuya avahonyena. 21 Ndaviti ankho ukahi nokulipopila okuti: “Halingile natyike etyi nayakulila ovipuka aviho viomulume oo moluhandya. Natyike povipuka viae tyavomba,+ mahi ame ndyimulinga otyiwa, ngwe unkhondolela otyivi.+ 22 Huku akondolele otyivi etyilinge nonya onondyale mba Ndaviti* ine ame ndyihupisa atee umwe omulume wike* vala wa Nambale komuhuka.”

23 Etyi Ambingaili amona Ndaviti, atuluka liwa-liwa kotyimbulu elipetamena ku Ndaviti, aikila konongolo pohi. 24 Aikila konongolo ponomphai mba Ndaviti, ati: “Tatekulu yange, onombei mbukale mbange. Yeka omuundapi wove apopie, tehelela onondaka mbomuundapi wove. 25 Tatekulu mbambavo wahatehelele omulume oo wahasilivila Nambale,+ ulinga ngeetyi tyihangununa enyina liae. Enyina liae o Nambale* utupu onondunge. Mahi ame, ame muundapi wove, hamwene omafwalali tatekulu atumine. 26 Pahe tatekulu yange, na Siovaa umwe una omwenyo, noove una* omwenyo, o Siovaa wekutyilika+ okuvelwa onombei mbokunengula ohonde,+ nokwovola ouviuki* komavoko ove. Onondyale mbove, na vana vahanda okukulinga omapita tatekulu yange, vakale nga Nambale. 27 Pahe avela ovakwa-vita vove vokwekulandula otyiawa etyi*+ omuundapi wove ekwetela, tatekulu yange.+ 28 Mbambavo, evela-vo onkhali yomuundapi wove, mokonda tyotyili Siovaa maavela tatekulu yange eumbo litwalako tyapama,+ mokonda tatekulu yange ukahi nokulwila-ko ovilwa vya Siovaa,+ tatekulu kwalingile otyivi natyike mokweenda kwononthiki mbove ambuho.+ 29 Putyina umwe ekuyeva ahande okukupola omwenyo,* omwenyo wa* tatekulu yange maupakwa nawa motyipapo tyomwenyo ponthele ya Siovaa, Huku yove, mahi omwenyo wonondyale* mbove meuyumbuhi kokule ngemanya liayumbwa nonthwala.* 30 Tyina Siovaa amalingila tatekulu yange ovipuka aviho oviwa alaa, ekulingi onkhalamutwe yo Isilayeli,+ 31 natyike matyikwihama komutima, nii kumelivele onombei* mokonda kwanengulile ohonde yomunthu wehena etyi ei, kwaovolele ouviuki*+ komavoko ove mwene. Tyina Siovaa amekulingi otyiwa tatekulu, hinangela omuundapi wove.”

32 Ndaviti apopila Ambingaili okuti: “Siovaa Huku yo Isilayeli, wekutuma onthiki yo hono tulivase, ahilivikwe! 33 Ove walinga onondunge! Huku ekuyambe etyi hono wanthyilika okuvelwa onombei mbokunengula ohonde,+ nokwovola ouviuki* komavoko ange mwene. 34 Mahi, na Siovaa umwe una omwenyo Huku ya Isilayeli, wokwanthyilika kokukulinga omapita,+ ine ha tyeetyi weya liwa,+ ñgeno muhuka kombimba nawike omulume* povanthu va Nambale wahupa.”+ 35 Ngootyo, Ndaviti atambula atyiho aeta emupopila okuti: “Enda-po nombembwa keumbo liove. Etyi wapopia netyiiva, mandyilingi ngeetyi wapopia.”

36 Pahe Ambingaili akondoka ku Nambale, emuvasi welilingila-po otyipito meumbo liae ngatyina ohamba. Nambale* ankho wahambukwa wakolwa unene. Ambingaili ehemupopila natyike atee kwatya. 37 Komuhuka, etyi Nambale akololokwa, omukai wae emupopila-tyo atyiho. Omutima wae aukala ngo womunthu wankhia, akukuta umwe ngemanya. 38 Etyi palamba ononthiki 10, Siovaa aipaa Nambale.

39 Etyi Ndaviti etyiiva okuti Nambale wankhia, ati: “Siovaa wokwandyamena,+ andyakulila kokukundiswa na Nambale,+ atyilika omuundapi wae okulinga otyivi,+ ahilivikwe. Siovaa wakondola otyivi tya Nambale komutwe wae!” Pahe Ndaviti atumu ondaka ku Ambingaili opo akale omukai wae. 40 Etyi ovaundapi va Ndaviti vehika ku Ambingaili ko Kalumelu, avemupopila okuti: “Ndaviti wetutuma tuye okukupola opo ukakale omukai wae.” 41 Liwa-liwa akatuka, elipetamena pohi, ati: “Omupika wove uli pano, nafwapo opo ndyikakale omupika wokukoha onomphai+ mbovaundapi va tatekulu yange.” 42 Ambingaili+ ekelifwiika liwa-liwa, avelama kotyimbulu, ahimbika okwenda, alandulwa novaundapi vae vetano ovahikwena, avaende novatumwa-ndaka va Ndaviti, akakala omukai wae.

43 Ndaviti ankho wanepa-le Ainowa+ wo ko Sesiliyeli,+ aveho vevali avakala ovakai vae.+

44 Mahi Saulu anepesa omukai wa Ndaviti, omona wae Mikale,+ ku Paliti,+ Paliti omona wa Laisi wo ko Ngalii.