Isekiyele
17 Ondaka ya Siovaa aindyendela vali aiti: 2 “Mona womulume, popia oluñgano luyemba keumbo lya Isilayeli, popia omuhe.+ 3 Popia uti, ‘Etyi otyo tyapopia Tatekulu Ohamba Onene Siovaa, wati: “Onkhombe onene,+ ina omapapatelo omanene, ina onondembelembe onondaande, yeyula momainya, aunda-unda, yeya mo Limbanu,+ yakwata kondungu yomusendulu.+ 4 Yatukula-ko ondyovo yatyo yalinga vali ondaande, yeitwala kotyilongo tyovakwa-niñgoso,* yeitwika mepunda-umbo liovakwa-niñgoso.+ 5 Pahe aipolo onthwika motyilongo,+ aikeitwika peheke limwe ewa. Yeitwika pomeva omanyingi ngomuundye. 6 Onthwika oyo aipapula, aulingi omuti wonouva wahanduka,+ wavovapo vala, omafo atyo apilukila mokati, mombwelo aupake omii. Pahe aulingi omuti wonouva wapapula, una umwe onompha.+
7 “‘“Akuya vali onkhombe onkhwavo onene,+ ina omavava omanene, ina onondembelembe onondaande.+ Omuti wonouva autandaveka omii viao no konkhombe oko, avii kokule no onkhu apa watwikwa, autandaveka omafo ao no kuyo iuyaveke.+ 8 Omuti oo wonouva watwikilwa-le mepia likahi nawa, pomaande amwe omanyingi, opo upapule ulinge onompha, wiime ovinyango, ulinge omuti omunene.”’+
9 “Uti, ‘Etyi otyo tyapopia Tatekulu Ohamba Onene Siovaa, wati: “Ñgaa maukulu umwe? Petupu ou matukula-po omii viao,+ ovinyango viao avivolo, ondyovo yatyo aikukuta?+ Otyipuka maukukuta, maukukuta umwe nokuutukula-po atyahalingi-ale tyokuvoko kwononkhono, nii tyovanthu ovanyingi. 10 Namphila watwikwa-le, okuti maukekula-kula umwe? Tyina omphepo yo koutundilo yamavete mu-o, okuti kamaukukuta-po auho? Maukakukutila mepia wapapulila.”’”
11 Ondaka ya Siovaa aindyendela vali aiti: 12 “Popila-vo mbaa veumbo lionomphuki uti: ‘Onwe ñgaa ovipuka ovio kamutyii etyi vipopia?’ Popia uti: ‘Tala! Ohamba yo Mbambilonia yaile ko Selusalei, yakwata-mo ohamba yatyo, novanene vatyo, aiveeta mo Mbambilonia.+ 13 Hatyo vala otyo, yapola umwe watuka mombunga* yonohamba,+ yemulingila omphango aimutumu aane.+ Pahe aityindi-mo ovalume vokwankhimana motyilongo,+ 14 opo ouhamba wende no pohi, wahayeluke vali, ukaleko umwe vala tyina utavela omphango yae.+ 15 Mahi konyima ohamba* aimutyitukila-po,*+ aitumu ovatumwa-ndaka vayo ko Isitu, ipewe ononkhambe,+ nomafwalali omanyingi.+ Okuti matyimwende nawa? Okuti omunthu ulinga ngootyo mahupu? Okuti upondola okuteya-po omphango, ahalingwa natyike?’+
16 “‘“Ndyitukaila umwe omwenyo wange,” o Tatekulu Ohamba Onene Siovaa wetyitola, “makankhila mo Mbambilonia, motyilongo mukala ohamba* yemulingile ohamba,* ou wati umwe neetyi tyaanenwa wetyitomba, watyopola omphango yalingilwe.+ 17 Ovita ovinene vya Falaoo, nomafwalali ae omanyingi-nyingi, etupu etyi maakalinga,+ kamaalingi natyike apa onondondelo mbokulwila mbukatuka, onongandyo mbovimato ambutungwa papesekele omienyo viovanyingi.* 18 Mokonda kalingile etyi aanenene, watyopola omphango. Namphila apopile aane,* mahi walinga ovipuka ovio aviho, otyo ahamahupila.”’
19 “‘Etyi otyo tyapopia Tatekulu Ohamba Onene Siovaa, wati: “Ndyitukaila umwe omwenyo wange, mandyikatahela komutwe wae ovihuna vituka kweetyi alinga, okutomba etyi tyaanenwa,+ okutyopola omphango yange. 20 Mandyikemuyumba owanda wange, makankhia mowanda wange wokuyeva.+ Mandyikemweeta mo Mbambilonia, ngamo tunyingilila nae momphela kombanda yovipuka andinga.+ 21 Ovakwa-vita vae aveho mavai-nkholo, mavakankhia komutunga, vokwahupa-po mavakayandyaneswa nonohika ambuho.*+ Onwe mamukankhola umwe okuti, ame Siovaa netyipopia.”’+
22 “‘Etyi otyo tyapopia Tatekulu Ohamba Onene Siovaa, wati: “Mandyikapola ondyovo imwe kondungu yomusendulu,+ andyikeitwika, ponondyovo ononthutu mbatyo mbuli kondungu yao, mandyikapola-po imwe yanyapa nawa,+ mwene andyikeitwika komphunda imwe yayeluka, yaya peulu.+ 23 Ame mandyikeitwika komphunda imwe yo Isilayeli yaya peulu onompha mbao mambukekula, aukaima ovinyango, aukalinga omusendulu umwe omunene. Oviila viatyo aviho mavikakala mombwelo yao, avikaombela mokafi komafo ao. 24 Omiti aviho vyo mepia maviketyikola umwe nawa okuti ame Siovaa, ame napaka pohi omuti wokwaya peulu, omusupi andyiukulameka,+ nakukutisa-po omuti watalalele nawa, omuti wokwakukutile neuyovesa.+ Ame Siovaa, ame netyipopia, ame netyilinga.”’”