Omukanda wo Tete wa Samuwele
11 Naasi omu Amoo+ eya nomafwalali ae, avaongo onthanda opo valwise ova Sambesi,+ ko Sileyande. Ovalume aveho voko Sambesi avapopila Naasi okuti: “Tulingei omphango,* onthwe atukuundapela.” 2 Naasi omu Amoo eveti: “Mandyilingi vala omphango noonwe tyina mutavela okulingwa ñgaa: Amuho muna okuyoolwa-mo eiho lienyi lyo kokulio. Mandyilingi ngootyo opo ndyikundise ova Isilayeli aveho.” 3 Ovakulu vomo Sambesi avemupopila okuti: “Tukevelele vala ononthiki epandu-vali opo tutume ovatumwa-ndaka motyilongo atyiho tyo Isilayeli. Ine petupu nawike utuyovola, onthwe matulifefe kwoove.” 4 Etyi ovatumwa-ndaka vehika ko Simbeaa+ kukala Saulu, avapopila onondaka ombo ovanthu, aveho avahimbika okulilila peulu.
5 Saulu ankho ukahi nokutundilila komalisilo, ukahi monyima yonongi. Saulu apulu okuti: “Ovanthu ava valinga-tyi? Oityi vekahi nokulila?” Avemupopila atyiho ovalume voko Sambesi vapopia. 6 Etyi Saulu eiva onondaka ombo ononkhono mba Huku ambumupameka,+ anumana unene. 7 Apolo onongombe onombali, embutyoko ovinthimbu-ovinthimbu, atumu ovatumwa-ndaka vevitwale motyilongo atyiho tyo Isilayeli avakapopia okuti: “Omunthu wahalandula Saulu na Samuwele onongombe mbae mambulingwa ngoombu!” Ovanthu avatili owoma Siovaa, aveho avaende nolusoke lwike vala.* 8 Saulu evevalula aveho etyi veli ko Mbeseke, ankho pena ova Isilayeli 300.000 nova Sundaa 30.000. 9 Avapopila ovatumwa-ndaka ankho veya kuvo okuti: “Popilei ovalume voko Sambesi mo Sileyande onondaka ombu: ‘Muhuka tyina omutenya wamatokota onwe mamuyovolwa.’” Ngootyo, ovatumwa-ndaka avaende avakapopila onondaka ombo ovalume voko Sambesi, ngwe avahambukwa unene. 10 Pahe ovalume voko Sambesi avapopila ova Amoo okuti: “Muhuka onthwe matulifefe kwoonwe, amutulingi atyiho mwasoka.”+
11 Onthiki yalandula-ko Saulu ayapaula ovalume ovikundyi vitatu, avaende atee pokati konthanda yova Amoo,+ avahimbika okuveipaa kombimba* atee omutenya watokota. Vokwahupa-po aveliyandyana, apehesala nii vala ovanthu vekahi mphangu ike vevali. 12 Ovanthu avapopila Samuwele avati: “Ovalie vatile: ‘Saulu kapondola okututumina?’+ Etei ovalume ovo tuveipae.” 13 Mahi, Saulu ati: “Petupu omunthu wiipawa onthiki yohono,+ mokonda Siovaa wayovola ova Isilayeli.”
14 Samuwele apopila ovanthu ati: “Twendei ko Silingale+ tukapopie vali okuti Saulu ohamba.”+ 15 Ovanthu aveho avaende ko Silingale, Saulu avemulingi ohamba kotyipala tya Siovaa. Avalingi ovilikutila viombembwa kotyipala tya Siovaa,+ Saulu novanthu aveho vo Isilayeli avalingi otyipito otyinene tyehambu.+