Okutunda
17 Ova Isilayeli aveho avaende no koluhandya lwo Sine,+ otyo vati avaende avatalama, avaende avatalama, ngeetyi vapopilwa na Siovaa,+ avakaonga onthanda ko Lefindii.+ Mahi oko, avahavasi-ko omaande okunwa.
2 Ovanthu avahimbika okutañgunisa Mwisesi,+ avati: “Twaavele omaande tunwe.” Mwisesi ati: “Munthañgunisila-tyi? Nkhele mulola ñgoo Siovaa mokonda yatyi?”+ 3 Mahi ovanthu vankhia unene ohunga, vahanda omaande vanwe; avatañgunisa Mwisesi,+ avati: “Wetupolela-tyi ko Isitu, wahanda tunkhie nohunga, atuho noonthwe, novana vetu, novipako vietu?” 4 Pahe Mwisesi eliyave ku Siovaa ati: “Ovanthu ava mandyivelingi ñgeni? Haa pahe mavandyipaa umwe nomamanya!”
5 Siovaa atolela Mwisesi ati: “Enda komutwe wavo. Enda novakulu ova Isilayeli. Tyinda otyimuti tyove wavetele natyo komaande ondongi Nilu.+ Kwata otyimuti, enda. 6 Tala! Ame mandyikala noove ponkhanda yo po Holembe. Veta monkhanda, mamutundu omaande, ovanthu mavanwe.”+ Mwisesi ngatyo alinga, otyo ovakulu ova Isilayeli vatala. 7 Pomphangu opo aluku-po okuti o Masaa*+ no Melimbaa,*+ mokonda yeetyi ova Isilayeli vemutañgunisa, neetyi valola+ Siovaa, otyo vati: “Siovaa uli umwe pokati ketu ine kepo?”
8 Ova Amaleke+ aveya okulwisa ova Isilayeli etyi veli ko Lefindii.+ 9 Mwisesi okutala otyo, apopila Susuwee+ ati: “Povita vietu pola-po vamwe, endei mukalwise ova Amaleke. Muhuka mandyende keulu liotyipunda notyimuti tya Huku yotyotyili peke liange.” 10 Ou Susuwee, aende, avakalwisa ova Amaleke ngeetyi Mwisesi emutuma;+ angwe ovo Mwisesi, na Alau, na Huli+ avalondo kotyipunda.
11 Tyina omavoko a Mwisesi atandavela umwe vala, kuna ova Amaleke vatila-ko kova Isilayeli; tyina omavoko a Mwisesi ayendyelela, ova Isilayeli kuna avatili-ko kova Amaleke. 12 Etyi omavoko a Mwisesi aoka, avemweetela emanya, ngako apumphama. Ovo Alau na Huli avayake momavoko ae, ou uli nthele, ou uli nthele, omavoko ae aakala umwe tyayeluka atee ekumbi lianyingila. 13 Susuwee nomutunga wae, etyivili okulwisa Amaleke novita viae.+
14 Siovaa apopila Mwisesi ati: “Honeka otyipuka otyo momukanda, ovanthu na vehetyilimbwe,* haa otyipopila vali Susuwee, honeka okuti: ‘Mandyinyimi-ko ova Amaleke aveho mombwelo yeulu, avahahinangailwa vali.’”+ 15 Mwisesi atungu-po omutala wovilikutila, euluku okuti o Siovaa-Nisi,* 16 ati: “Tyeetyi okuvoko kwa Amaleke kulwisa otyipundi tya Sah+ tyoutumini, Siovaa makakalaila vala okulwisa Amaleke novanthu aveho vakatuka mwe.”+