Omukanda wa Vali Ehipululo
34 Sosiya+ wahimbika okutumina nomanima etyinana, watumina omanima 31 mo Selusalei.+ 2 Walingile etyi tyaviuka komaiho a Siovaa, aendela monondyila mba Ndaviti he-mbwale yavo; kayapukilile kokulio nii kokumbili.
3 Menima 8 lioutumini wae, pweetyi nkhele omututu, ahimbika okwovola Huku ya Ndaviti, omukwaukulu wae.+ Tyina tyiti menima 12 lioutumini wae, ahimbika okusukukisa o Sundaa no Selusalei,+ ahanye-po onomphangu mbukola mbokwaya peulu,+ novipandyi vikola,* novilolo viahongwa,+ novilolo viovivela.* 4 Tupu, avahanye-po omitala viovilikutila vya Mbaale otyo atala, ngwe ahanye-po omitala vionombao* vikala kombanda yavio. Atyatyaula vali ovipandyi vikola,* novilolo viahongwa, novilolo viovivela,* evikunkhulula, ofinde yatyo, eyuuvu komalangalo a vana vevilingilile ovilikutila.+ 5 Ayokela omankhipa ovanakwa komitala viavo viovilikutila.+ Ngootyo, asukukisa o Sundaa no Selusalei.
6 Mepunda-umbo lya Manasesi, no lya Efalaii,+ no lya Simiyau, atee ko Nafitalii, monohika mbokwahanyauka mbeliseta nao, 7 ahanye-mo omitala viovilikutila, atyatyaula ovipandyi viatyo vikola,* novilolo viahongwa,+ evikunkhaulula. Ahanye omitala aviho vionombao motyilongo atyiho tyo Isilayeli.+ Konyima akondoka ko Selusalei.
8 Menima 18 lioutumini wae, etyi Sosiya amana okusukukisa otyilongo, nondywo ya Huku,* atumu Safaa+ omona wa Asalia, na Maaseya onkhalamutwe mepunda-umbo, nomuhipululi Sowaa omona wa Sowakasi, vakaviukise ondywo ya Siovaa, Huku yae.+ 9 Aveya ku Hilikiya omunene-nakwa, avemwavela onombongo mbokwaetwa kondywo ya Huku. Vokwatuka mu Levii vayunga konombundi, ovo vakongolola onombongo ombo ko Manasesi, no ko Efalaii, no kovanthu ovakwavo mo Isilayeli,+ no ko Sundaa, no ko Mbesamii, no kovanthu vakala mo Selusalei. 10 Onombongo ombo, ambupewa vokwakalela komutwe otyilinga tyondywo ya Siovaa. Vokuundapa mondywo ya Siovaa, avaviukisa ondywo nonombongo ombo. 11 Avembwavela vokuhonga omavai, novatungi, opo valande omamanya ahongwa nawa, nomavai ononkhambo mbokutunga onondywo onohamba mbo Sundaa mbayekele atee mbawa-po.+
12 Ovalume ovo valingile umwe nawa ovilinga viavo.+ Vomuhoko wa Levii vapelwe otyilinga tyokuvelulika, tyati: O Saate na Ombandiya vatuka mu Melali,+ na Sakaliya na Mesulau vatuka mu Kowate.+ Aveho vokwatuka mu Levii vaimba nawa,+ 13 valinga ovilinga aviho,* tupu ankho ovo valulika ovanthu aveho vokulinga ovilinga aviho. Vamwe puvo, ankho ovahoneki, ovakwavo ononkhalamutwe, vamwe ankho vaundapa konombundi.+
14 Pweetyi vekahi nokupola-mo onombongo mbaetwa mondywo ya Siovaa,+ omunakwa Hilikiya avasi omukanda Wovitumino vya Siovaa+ viaavelelwe* Mwisesi.+ 15 Pahe Hilikiya apopila Safaa omuhoneki okuti: “Navasa omukanda Wovitumino mondywo ya Siovaa.” Hilikiya aavela Safaa omukanda oo. 16 Safaa atwala omukanda oo kohamba, emupopila okuti: “Ovaundapi vove vekahi nokulinga atyiho vatumwa. 17 Vapola onombongo mbali mondywo ya Siovaa, avembwavela ononkhalamutwe, no vokulinga ovilinga.” 18 Omuhoneki Safaa apopila vali ohamba okuti: “Pena omukanda napewa nomunakwa Hilikiya.”+ Safaa ahimbika okuutangela komutwe wohamba.+
19 Ohamba yati vala ivee onondaka Mbovitumino, aitandula ovikutu viayo.+ 20 Ohamba aipopila Hilikiya, na Aikau+ omona wa Safaa, na Ambandoo omona wa Mika, na Safaa omuhoneki, na Asaiya omuundapi wohamba, okuti: 21 “Endei, kapulei ku Siovaa, kapulilei-ko naame, no vokwahupa mo Isilayeli no mo Sundaa tyapopia omukanda ou wavasiwa; mokonda onyengo ya Siovaa maiuyukila kwoonthwe onene unene, onombwale mbetu kavafwisilepo ondaka ya Siovaa, kavalandulile etyi tyahonekwa momukanda ou.”+
22 Ngootyo, Hilikiya na vana ohamba ankho yatuma, avaende komuuli Hulunda.+ Hulunda ankho omukai wa Saluu onkhalamutwe yo mondywo yokuvalela, omona wa Tikivaa, Tikivaa omona wa Halasi. Hulunda ankho ukala Konthele Omphe Yepunda-umbo mo Selusalei. Avemupopila etyi vatumwa.+ 23 Ngwe evepopila okuti: “Siovaa Huku yo Isilayeli wati: ‘Popilei omulume wemutuma kwaame okuti: 24 “Etyi, otyo tyapopia Siovaa, wati: ‘Ovihuna aviho viahonekwa momukanda+ watangelwa komutwe wohamba yo Sundaa, mandyivieta momphangu ei, no kwaava vakala-mo.+ 25 Mokonda vandyeka-po,+ avalingila ovilikutila viokutunda omwihi ovika-huku ovikwavo, opo vanumanese+ novilinga viomavoko avo, onyengo yange maikankhindukila omphangu ei ayahatalama.’”+ 26 Mahi onwe popilei ohamba yo Sundaa yokwemutuma okukapula ku Siovaa, okuti: “Etyi, otyo tyapopia Siovaa, Huku yo Isilayeli, wati: ‘Konthele yonondaka ombu weiva,+ 27 mokonda omutima wove wetavela,* oliolo omutima komaiho a Huku etyi weiva onondaka mbapopiwa konthele yomphangu ei na vana vakala-mo, oliolo omutima komaiho ange, otandula ovikutu viove, olilila komaiho ange, ame nekwiiva,+ o Siovaa wetyipopia. 28 Mokonda yotyo, mandyikekupaka komaendo onombwale mbenyi,* ove mokapululukwa nombembwa melangalo liove. Ngootyo, omaiho ove kamaakamona ononkhumbi mandyietela omphangu ei, na vana vakala-mo.’”’”+
Ngwe avakapopila ohamba etyi vakumbululwa. 29 Ohamba aitumu okwiihana ovakulu aveho vomo Sundaa no vomo Selusalei.+ 30 Ohamba pahe ailondeka no kondywo ya Siovaa novalume aveho vomo Sundaa, ovanthu aveho vokukala mo Selusalei, ovanakwa novauli, ovanthu aveho, ovanene novatutu. Evetangela onondaka ambuho mbomukanda womphango wokwavasiwa mondywo ya Siovaa.+ 31 Ohamba aitalama pomphangu yae, ailingi omphango*+ komaiho a Siovaa, yokuti malandula mu Siovaa, aendela movitumino viae, no mwetyi alondola, netyi apopia nomutima wae auho, nohande* yae aiho,+ mokufwisapo onondaka mbomphango mbahonekwa momukanda oo.+ 32 Tupu, alundu aveho veli mo Selusalei, nomo Mbesamii, avetavela omphango oyo. Vokukala mo Selusalei avaendela momphango ya Huku, Huku yovakwaukulu vavo.+ 33 Konyima, Sosiya ahanye ovipuka aviho vitoyesa* movilongo aviho vyo va Isilayeli,+ alundu aveho vakala mo Isilayeli vaumbile Siovaa, Huku yavo. Mokweenda kwomwenyo wae,* kavayekele-po okulandula Siovaa, Huku yovakwaukulu vavo.