Susuwee
3 Susuwee apinduka-po komuhuka-huka, atyiti nae nova Isilayeli aveho* avatundu ko Sitii,+ avaende atee vehika kondongi yo Solondau. Avahayauka, ngapo valalela.
2 Etyi vakala-po ononthiki ononthatu, vokwakalela komutwe+ ova Isilayeli avaenda-enda monthanda, 3 avapopila ovanthu aveho avati: “Tyina mwamati-ko ñgaa otyikasa tyomphango tya Siovaa Huku yenyi tyili nokutyindwa-po novanakwa vokwatuka mu Levii,+ katukei amutyilandula. 4 Mahi muna okutyikalela kokule otyikambo tyina ono kovandu 2.000.* Mwahafwenei-mo unene amulambe mono kovandu omo, na mumone ondyila mamweende nayo, mokonda ondyila ei onwe kamuneikwate.”
5 Pahe Susuwee atolela ovanthu aveho ati: “Likohei,+ mokonda muhuka Siovaa malingi ovipuka vihuvisa pokati kenyi.”+
6 Etyi Susuwee amana okupopila ovaunyingi, pahe apopila ovanakwa ati: “Tyindei-po otyikasa tyomphango+ amupiti komutwe wovanthu aveho.” Ovanakwa avatyindi-po otyikasa tyomphango avapiti komutwe wovanthu aveho.
7 Siovaa apopila Susuwee ati: “Okuhimbikila hono, mandyikupake kounene otyo ova Isilayeli aveho vatala,+ na vanoñgonoke okuti mandyikala noove+ ngeetyi nakalele na Mwisesi.+ 8 Ove una okupopila ovanakwa vokwatyinda otyikasa tyomphango okuti: ‘Tyina onwe mwamehiki pondongi yo Solondau,+ talamei mokati kondongi yatyo.’”
9 Susuwee atolela ova Isilayeli ati: “Endywei mutehelele etyi Siovaa Huku yenyi apopia.” 10 Pahe Susuwee ati: “Mamutyimono umwe nawa okuti kuna Huku una omwenyo uli pokati kenyi,+ putyina amataata komutwe wenyi ova Kanaa no vokwatuka mu Hete, nova Heveu, nova Peliseu, nova Silingaseu, nova Amoleu nova Sembusi.+ 11 Talei! Otyikasa tyomphango tya Tatekulu youye auho, tyili nokwenda otyotyo komutwe wenyi, tyili nokunyingila mondongi yo Solondau. 12 Momihoko vyo va Isilayeli koyei-mo ovalume 12. Momihoko aviho tyitie omu mwatunda omulume wike, omu mwatunda omulume wike.+ 13 Tyina onomphai mbovanakwa vokwatyinda Otyikasa tya Siovaa Tatekulu youye auho mbamaliate* momeva ondongi yo Solondau, omeva okutunda kombanda maatalama aakala ngondamu.”*+
14 Pahe etyi vati pokukatuka pomakaka avo, etyi nkhele veheneyauke ondongi yo Solondau, ovanakwa vokwatyinda otyikasa tyomphango+ avapiti komutwe. 15 Ovanakwa vokwatyinda Otyikasa vati vala hikee pondongi yo Solondau avaliate momaande Notyikasa tyavo potyipepe (ngwe pokuteya o Solondau iyula unene+ aihandye), 16 omeva aatalama, aakala ngondamu.* Ankho elikutila kokule unene na apa veli, kepunda-umbo lyo Andau likala popepi no Saletaa. Aa omeva okwaya no kelunga Alambaa, Elunga Liomongwa,* aakaya umwe. Ovanthu avetyivili okuyauka mokonda omeva ankho etai. Apa vayaukila ankho peliviuka no Selikoo. 17 Ovanakwa vokwatyinda otyikasa tya Siovaa tyomphango avatalama mondongi+ yo Solondau pokati-na-kati, ava ova Isilayeli aveho avalambe avai nthele ina ondongi yo Solondau. Apa vakwata pakukuta umwe petupu omeva,+ aveho avalambe.