Omukanda wa Vali Onohamba
8 Eliseu apopila omukai ina yomona una atutilisile*+ ati: “Enda, noove, no veumbo liove, okakala onthunda-vilongo oku wahanda, mokonda Siovaa wapopia okuti motyilongo mamukala ondyala+ maikala omanima epandu-vali.” 2 Omukai alingi etyi omunthu wa Huku yotyotyili apopia. Aende, nae no veumbo liae, akakala kotyilongo tyova Filisitiya,+ akala-ko omanima epandu-vali.
3 Etyi pakala omanima epandu-vali, omukai oo, kotyilongo tyova Filisitiya atundu-ko, akondoka kotyilongo tyae, akaita kohamba imukondolele eumbo liae nepia liae. 4 Ohamba weivasa ili nokupopia na Seyasii omukwatesiko womunthu wa Huku yotyotyili, aiti: “Mphopile-vo ovipuka aviho ovinene Eliseu ehole okulinga.”+ 5 Tyina ekahi nokupopila ohamba oñgeni Eliseu atutilisile+ omona, kuna ina yomona wokwatutilisilwe nae uhika, aiti kohamba eumbo liae nepia liae.+ Seyasii apopila ohamba okuti: “Tatekulu yange hamba omukai ndyikahi nokupopia oyou, ou omona wae una Eliseu atutilisile.” 6 Ohamba aipulu komukai etyi tyaendele-po, ngwe eipopila atyiho. Ohamba aimupakula komutumini wo mombonge aiti: “Mukondolela ovipuka viae aviho, notyifwe tyovipuka aviho viatunda mepia liae, okupolelela onthiki atunda motyilongo muno atee hono.”
7 Eliseu aende ko Ndamasiku+ pononthiki Mbeni-Handande+ ohamba yo Silia, avela. Avapopila ohamba okuti: “Omunthu wa Huku yotyotyili+ uli muno.” 8 Ohamba aipopila Hasayeli+ okuti: “Enda komunthu wa Huku yotyotyili,+ mahi taindya etyi umutyindila. Kapule kwe ondaka ya Siovaa, mupula ine mandyiveluka kouvela ou.” 9 Hasayeli aende ku Eliseu, emutyindila ovipuka oviwa vyo ko Ndamasiku, viatyindilwe nomakamelu 40. Etyi ehika, atalama komutwe wae ati: “Omona wove Mbeni-Handande ohamba yo Silia, wanthuma kwoove tatekulu, wapula okuti: ‘Okuti mandyiveluka kouvela ou?’” 10 Eliseu emuti: “Enda, mupopila okuti: ‘Ove mokala nawa tatekulu;’ mahi Siovaa wandekesa okuti mankhi.”+ 11 Eliseu emutale ehimbwe-himbwe, atee Hasayeli tyemukundisa. Eliseu omunthu wa Huku yotyotyili ahimbika okulila. 12 Hasayeli emupulu okuti: “Oityi ulila tatekulu?” Ngwe emuti: “Ndyilila mokonda ndyii ovivi molingi ova Isilayeli.+ Mokapaka otupia ovimato viavo viokwapama, okaipaa nomutunga ovalume vokwapama, okaniangaula ovana, okatoma-toma omaimo ovalemi.”+ 13 Hasayeli ati: “Oñgeni ame muumbili wove, tyimbwa ngaame, ndyipondola okulinga ovipuka ovio?” Mahi Eliseu emuti: “Siovaa wandekesa okuti ove mokala ohamba yo Silia.”+
14 Atundu pu Eliseu, akondoka. Etyi ehika, tatekulu yae emupulu okuti: “Oityi Eliseu ekupopila?” Emuti: “Wati tyatiwa mokala nawa.”+ 15 Mahi monthiki yalandula-ko, Hasayeli akwata omanda, eiyaveka momaande, eipake* motyipala tyohamba atee yankhia.+ Hasayeli emupingi kouhamba.+
16 Menima lya tano Seolau+ omona wa Akambe atumina, Akambe ohamba yo Isilayeli, pononthiki Seosafaa ohamba yo Sundaa, Seolau+ omona wa Seosafaa, akala ohamba. 17 Wali nomanima 32 etyi akala ohamba, atumina omanima etyinana mo Selusalei. 18 Waendelele monondyila mbonohamba mbo Isilayeli,+ walingile ngeetyi veumbo lya Akambe valingile,+ mokonda wanepele+ omona wa Akambe; walingile ovipuka ovivi komaiho a Siovaa.+ 19 Mahi Siovaa kahandele okuhanya-ko o Sundaa, mokonda ya Ndaviti omuundapi wae,+ tyeetyi wapopile-ale okuti memupe okandiyelo katema,+ akalingi kae no kovana vae atee-tee.
20 Pononthiki mba Seolau, ova Endoo avatyitukila-po o Sundaa,+ avelitaindyila ohamba yavo mwene.+ 21 Seolau aende nomatemba ae aeho ovilwa ko Saile, tyina tyiti kounthiki, alwisa ova Endoo evepake pokati kumwe no vomatemba ae ovilwa, ova Endoo avatili-ko; omafwalali aakahateka no komakaka ao. 22 Ova Endoo valwisa ova Sundaa atee onthiki yo hono. Ova Limbina+ navo o pononthiki opo vatyitukila-po o Sundaa.
23 Ovipuka ovikwavo viehipululo lya Seolau, ovipuka aviho alinga, kaviahonekelwe momukanda womahipululo o pononthiki mbonohamba mbo Sundaa? 24 Pahe Seolau akapululukwa-po nonombwale mbae, akapakwa pomalangalo onombwale mbae Mepunda-umbo lya Ndaviti.+ Akasiya+ omona wae, emupingi kovipundi.
25 Menima 12 Seolau omona wa Akambe atumina, Akambe ohamba yo Isilayeli, Akasiya omona wohamba yo Sundaa Seolau, alingi ohamba.+ 26 Akasiya wali nomanima 22 etyi alinga ohamba, atumina enima like mo Selusalei. Ina o Ataliya+ omutekula* wa Onili+ ohamba yo Isilayeli. 27 Waeendele monondyila mbo veumbo lya Akambe,+ walingile ovipuka ovivi komaiho a Siovaa, ngeetyi veumbo lya Akambe valingile, mokonda he wanepele+ omukai wo veumbo lya Akambe. 28 Avaende na Seolau omona wa Akambe okukalwisa Hasayeli ohamba yo Silia ko Lamote-Sileyande,+ mahi ova Silia avayahe Seolau.+ 29 Ohamba Seolau akondoka ko Sesiliyeli+ ngako ekelitalela ovipute avangwa nova Silia ko Lamaa pweetyi alwisa Hasayeli Ohamba yo Silia.+ Akasiya omona wa Seolau ohamba yo Sundaa aende ko Sesiliyeli akatale Seolau omona wa Akambe wavangwa.*