Omukanda Wa Vali wa Samuwele
24 Onyengo ya Siovaa ainkhinduka vali nova Isilayeli+ etyi umwe ahindila Ndaviti* okuti: “Enda kavalule+ ova Isilayeli nova Sundaa.”+ 2 Ohamba aipopila onkhalamutwe yovita Sowambe+ ankho vena-e okuti: “Liseta momihoko aviho vyo Isilayeli okuhimbikila ko Ndaa atee ko Mbelesemba,+ valula ovanthu opo ndyinoñgonoke apa velifwe.” 3 Mahi Sowambe apopila ohamba okuti: “Siovaa, Huku yove, akalese ovanthu ovanyingi okuwana-wana atyihiki po 100, tatekulu hamba etyitale nomaiho ae mwene. Mahi omokonda yatyi tatekulu hamba wahandela okulinga ngootyo?”
4 Mahi ondaka yohamba aipono ya Sowambe no yononkhalamutwe mbomafwalali. Ngootyo Sowambe nononkhalamutwe mbomafwalali avatundu pohamba opo vakavalule ovanthu vo Isilayeli.+ 5 Avayauka o Solondau avaongo onthanda ko Alowele+ kombwelo* mepunda-umbo ankho likala pokati komulola* avaviuku okwenda no kova Ngande no ko Sasele.+ 6 Konyima avaende ko Sileyande+ no kotyilongo tyo Tatii-Ondisi; pahe avatundu opo okwenda no ko Ndaa-Saa avaende ko Sindone.+ 7 Avaende no kepunda-umbo lyo Tilu+ no momapunda-umbo aeho ova Heveu+ nova Kanaa, avaende atee ko Mbelesemba,+ ikala ko Nengembe+ yo Sundaa. 8 Ngootyo avaende otyilongo atyiho avakondoka ko Selusalei, etyi pakala onohanyi etyive nononthiki 20. 9 Sowambe aavela ohamba otyifwe tyovanthu aveho vavalulwa. Omafwalali ova Isilayeli vokumaneneka omitunga ena 800.000, ovalume vomo Sundaa vena 500.000.+
10 Mahi omutima wa Ndaviti auhimbika okuveta+ mokonda yetyi avalula ovanthu. Ndaviti apopila Siovaa okuti: “Otyipuka otyo nalinga onkhali onene.+ Pahe Siovaa, mbambavo evela-vo onkhali yomuumbili wove,+ etyi nalinga owova.”+ 11 Etyi Ndaviti apinduka-po komuhuka, omuuli Ngande,+ omutalii wa Ndaviti atambula ondaka ei ku Siovaa yati: 12 “Enda, okapopila Ndaviti okuti: ‘Siovaa wati: “Povipuka vitatu nahanda okukwetela, koya-po tyike.”’”+ 13 Ngande aende ku Ndaviti, emupopila okuti: “Okuti hahe otyilongo tyikale nondyala omanima epandu-vali?+ Ine hahe tatekulu ukale onohanyi ononthatu nokutaatwa nonondyale mbove?+ Okuti hahe motyilongo tyove ovanthu vankhie nomukihi mononthiki ononthatu?+ Pahe soka nawa opopi etyi mandyikapopila Una wanthuma.” 14 Ndaviti apopila Ngande okuti: “Otyo pahe tyandyihama unene ngatyi! Mbambavo, ndyitokele vala pomavoko a Siovaa,+ mokonda okankhenda kae okanene,+ tyipona okutokela pomavoko ovanthu.”+
15 Siovaa atahela ova Isilayeli omukihi,+ okuhimbikila komuhuka atee moola yanakwa, ovanthu 70.000 avankhi,+ okuhimbikila ko Ndaa atee ko Mbelesemba.+ 16 Etyi oandyu yatandaveka okuvoko okuhanya-po o Selusalei, otyitateka otyo Siovaa atyimwiihama unene,+ apopila oandyu ikahi nokuhanya-ko ovanthu okuti: “Pahe tyapwa! Voveka okuvoko kwove.” Oandyu ya Siovaa ihungi kotyipale tya Alauna+ omu Sembusi.+
17 Etyi Ndaviti amona oandyu ikahi nokwipaa ovanthu, apopila Siovaa okuti: “Ame nalinga onkhali, ame nalinga etyi tyapenga. Mahi oityi onongi+ ombu mbalinga? Mbambavo, okuvoko kwove kuye no kwaame no ko veumbo lya tate.”+
18 Pahe Ngande aende ku Ndaviti monthiki oyo emupopila okuti: “Enda kotyipale tya Alauna omu Sembusi, ngako utungila Siovaa omutala wovilikutila.”+ 19 Ndaviti aende ngeetyi Ngande apopia, tyatumwa na Siovaa. 20 Alauna wati vala monee ohamba novaundapi vayo vekahi nokuya, alupuka aikila konongolo elipetamena kohamba. 21 Alauna apulu okuti: “Omokonda yatyi tatekulu yange hamba weila kuno komuundapi wove?” Ndaviti akumbulula okuti: “Neya okulanda-po otyipale tyove, ndyitungile-po Siovaa omutala wovilikutila, opo ovanthu vayovoke kovihuna.”+ 22 Alauna apopila Ndaviti okuti: “Tyilinge-po tyove tatekulu hamba, linga oviawa wahanda okulinga.* Uma onongombe ulinge otyilikutila tyokuyokwa, nosola yatyo yokutyopa,* nokanga yokupandeka opo ulinge ononkhwii. 23 Ndyikwavela* atyiho tatekulu hamba.” Alauna apopila vali ohamba okuti: “Siovaa Huku yove, ekuyambe.”
24 Mahi ohamba aipopila Alauna okuti: “Au katyitavela! Ndyina umwe okuvilanda-po. Hipondola okwavela Siovaa Huku yange, ovilikutila viokuyokwa nahafetelele natyike.” Ngootyo, Ndaviti afete onosikulu*+ 50 mbo palata opo alande-po otyipale nonongombe mbatyo. 25 Ndaviti atungila-po Siovaa omutala wovilikutila+ aave ovilikutila viokuyokwa novilikutila viombembwa. Siovaa akumbulula omalikwambelo valingila otyilongo,+ ovihuna mo Isilayeli avitalama.