Etyi Tyahonekwa na Luka
17 Pahe atolela ovalongwa vae eveti: “Evi vipundukisa tyili, katyitavela-le viahakale-ko. Mahi mu ou viamatundu ngongo yae! 2 Omunthu ngo oo hahe vali akutililwe emanya liokukunkha momunyino, ayumbwa melunga, tyipona apundukise umwe povatutu ava.+ 3 Lungukei. Mukwenyi okulinga onkhali, muviyula,+ ine ulivela mweevela.+ 4 Ngapalaika-po ñgoo atyikavasa pepandu-vali monthiki ike vala, onovesi ombo epandu-vali, otyo eya ati: ‘Otyiponyo,’ ove mweevela.”+
5 Pahe ava ovatumwa avaiti ku Tatekulu avati: “Tuyawisile-vo konthumbi yetu.”+ 6 Tatekulu ati: “Ine onthumbi yenyi yelifwile vala pokañgima okatutu,* ñgeno nomuti* ngoo okuuti, ‘Tukuka-po okelitwika melunga!’ umutavela umwe.+
7 “Olie uti tyina omupika wae akalimisile, hamwe wakalisile, tyina eya umuti, ‘Endyu na apa, pumphama ulie’? 8 Hatyoko otyo mulinga, kati vala hikee amumuti: ‘Linga unthelekele-po okulia mandyili kongulohi, haa olikutu otyinyanga otyo undyavela ndyilia atee ndyimana, andyinu, pahe noove oli, onu’? 9 Nokupandula omupika oo kumapandula-le, mokonda walinga vala etyi wemutuma, ine hatyo? 10 Noonwe tyina mwamalingi ovilinga aviho mwatumwa, tiei: ‘Onthwe tuvapika vala. Twalinga vala etyi ankho tuna-le okulinga.’”+
11 Etyi pahe aya no ko Selusalei, akwate pokati okuti, nthele o Samaliya nthele o Ngalileya. 12 Etyi anyingila mosandyala imwe, ahonyena-mo novalume vamwe vena 10, vavela otyilunda, avatalamena vala kokule.+ 13 Avalaveleya, avati: “Sesusi, Mulongesi, tulinge-vo okankhenda!” 14 Etyi evemona, eveti: “Endei, endei kovanakwa vekemutale.”+ Tyina pahe vaya, avaveluka.+ 15 Umwe puvo etyi akati ñgaa waveluka, akondoka, ankhimaneka Huku nondaka yakaluluka. 16 Eya ponomphai mba Sesusi aikila konongolo, emupandula. Mahi oo yatyo ankho omu Samaliya.+ 17 Sesusi ati: “Ya aveho 10 kavavelukile vakwe? Ovakwavo etyive veli-pi? 18 Petupu vali ou ukondoka ankhimaneka Huku, omulume ou vala, ngwe o wotyilongo otyikwavo?” 19 Pahe emuti: “Katuka, enda; eyumba-nthumbi liove liekuhakula.”+
20 Hono pokwapulwa nova Faliseu onalupi Ouhamba wa Huku mauya,+ eveti: “Ouhamba wa Huku pokuya, kamauya otyo weetuwe umwe nawa; 21 ovanthu kamavati-ale: ‘Talei oyou!’ ‘Oyo una!’ Tala! Ouhamba wa Huku uli-ale pokati kenyi.”*+
22 Pahe apopila ovalongwa ati: “Makuya ononthiki mamuhande mumone onthiki ike pononthiki Mbomona womulume, mahi kamamwiimono. 23 Ovanthu mavekemuti: ‘Talei oyo una!’ ‘Talei oyou!’ Mwahayei-ko nii mwehevelandulei.+ 24 Mokonda ngomuliakulo uliaimina nthele imwe meulu aumoneka nthele imwe, otyo matyeende ngootyo monthiki+ Yomona womulume.+ 25 Mahi nkhele mamoneswa ononkhumbi, maanywa novanthu ava vo hono.+ 26 Otyipuka tyaendele-ale pononthiki mba Nowee,+ otyo matyeende pononthiki Mbomona womulume:+ 27 ovanthu ankho valia, vanwa, ovalume vanepa, ovakai vanepwa, atee onthiki Nowee anyingila mowato,+ Ombila Onene aiya aivehanye-ko aveho.+ 28 Tupu otyo tyali-ale ngootyo pononthiki mba Lote:+ ovanthu ankho valia, vanwa, valanda, valandesa, vatwika, vatunga. 29 Mahi monthiki Lote atunda mo Sondoma, keulu akutoko otupia no isofele aveho avahanywa-ko.+ 30 No monthiki Omona womulune mahololoka, otyo matyikaenda ngootyo.+
31 “Monthiki yatyo oyo, ou wamavahiwa kombanda yondywo, mbili ovipuka viae vili mokati kondywo, ahatuluke ekevipola-mo, ou wamavahiwa kepia ahakondoke kovipuka asapo. 32 Hinangelei komukai wa Lote.+ 33 Ou wahanda okuhupisa omwenyo wae* meuvombesa, mahi ou uuvombesa ukeuhupisa.+ 34 Ame ndyimutolela umwe, monthiki yatyo oyo kounthiki, vamwe mavakavahiwa umwe velangi vevali poula wike; umwe apolwa-po, omukwavo asiwa opo.+ 35 Ovakai vevali mavakavasiwa umwe vakunkha kemanya like, umwe apolwa-po, omukwavo asiwa-po.” 36* —— 37 Pahe avemupulu okuti: “Opi Tatekulu?” Ngwe eveti: “Apa otyivimbi tyili, opo ononkhombe mbukelikongololela.”+