Okutunda
1 Aa omanyina ovana va Isilayeli, vokwaile na Sakoo ko Isitu, vaile novakai vavo novana vavo:+ 2 o Lumbe, o Simiyau, o Levii, o Sundaa;+ 3 o Isakale, o Sembulau, o Mbesamii; 4 o Ndaa, o Nafitalii, o Ngande, o Asele.+ 5 Okuvevalula aveho vokwatukile mu Sakoo vali 70.* Ou Susee, ankho uli-ae ko Isitu.+ 6 Susee, novakulu vae, novanthu aveho vo pononthiki mbae, avanyimi.+ 7 Ova Isilayeli* avelityiti, aveliyawisa unene, avalingi ovanyingi-nyingi aveyula motyilongo, ova Isitu avevetili owoma.+
8 Etyi pakala, mo Isitu amutumina ohamba onkhwavo yehei Susee. 9 Apopila ovanthu okuti: “Talei! Ova Isilayeli vekahi nokukala vali ovanyingi kwoonthwe, vapama vali.+ 10 Tuna okwovola etyi matulingi opo veheliyawise. Ine katulingi ngootyo, maveliyawisa, tyina pamakala ovilwa, avahulu konondyale mbetu avetulwisa, otyilongo avetyisipo.”
11 Avevepe ononkhalamutwe mbuvekuluminya okulinga* ovilinga vialema+ opo mbuvemonese ononkhumbi, ova Isilayeli avatungila Falaoo omapunda-umbo ovilimba* oko Pitoo no oko Lamisesi.+ 12 Mahi tyina vevemonesa onkhumbi, ngwe otyo velityita vali unene; ova Isitu avankhi owoma okutala ova Isilayeli.+ 13 Kombanda yotyo, avalingi ova Isilayeli ovapika.+ 14 Avevemonesa emone okulinga onthata yeema, nokulinga onondopio, aveveavela ovilinga viovapika momapia. Veveundapesa unene ovilinga viahapepukile, ovilinga aviho vilingwa novapika.+
15 Konyima ohamba yo Isitu aipopila Sifilaa na Puwaa, vokukutulisa ova Hembeleu, 16 eveti: “Tyina muti pokukutulisa ovakai ova Hembeleu, amumono umwe puvo waikila konongolo akutula+ omona omukwendye omona oo mwipaei; ine omukainthu muhemwipaei.” 17 Mahi ovakai vokukutulisa avatili Huku yotyotyili, avahalingi etyi ohamba yo Isitu yevetuma, avasi nomwenyo+ ovana ovakwendye. 18 Ohamba yo Isitu aiihana ovakai vokukutulisa evepulu okuti: “Oityi mwayekela ovana ovakwendye nomwenyo?” 19 Ovakai ovo avakumbulula Falaoo okuti: “Ova Hembeleu ovakai vamwe vehekahi ngova Isitu. Vakola omutima vakutula vala kavakevela vali omukutulisi.”
20 Huku akwatesako ovakai vokukutulisa, ovanthu aveliyawisa unene, avapame. 21 Mokonda ovakai vokukutulisa vatila Huku yotyotyili, navo evepe ovana. 22 Konyima, Falaoo atumu ovanthu aveho okuti: “Ine omu Hembeleu umwe ukutula omona omukwendye muyumbei mondongi Nilu, okuti omukainthu, muyekei nomwenyo.”+