Omukanda wa Vali Onohamba

14 Menima lya vali Seowasi+ omona wa Seowakasi ohamba yo Isilayeli atumina, Amasiya omona wa Seowasi ohamba yo Sundaa akala ohamba. 2 Wali nomanima 25 etyi akala ohamba, atumina omanima 29 mo Selusalei. Ina o Seoandii, omu Selusalei.+ 3 Walingile etyi tyaviuka komaiho a Siovaa, mahi ha nga Ndaviti+ ombwale yavo. Ovipuka aviho alingile vielifwa nevi tate yae Seowasi alingile.+ 4 Mahi onomphangu mbukola mbaya peulu nkhele kambahanyenwe-po,+ ovanthu opo nkhele vaavela ovilikutila ponomphangu mbukola mbaya peulu,+ tupu valingila-po ovilikutila viokutunda omwihi. 5 Wati vala pamekee ouhamba wae, atokesa ovaundapi vae vokwaipaele ohamba,+ tate yae. 6 Mahi ovana vatyo eheveipaa, mokonda walingile etyi tyipopia otyitumino tya Siovaa tyahonekwa momukanda Wotyitumino tya Mwisesi tyati: “Ovohe kavapondola okunkhia mokonda yovana vavo, ovana kavapondola okunkhia mokonda yovohe. Mahi munthu na munthu unkhila onkhali yae mwene.”+ 7 Aipaela ova Endoo+ melola Liomongwa,+ ovalume vena 10.000, mokwevelwisa evepolo epunda-umbo lyo Sela;+ enyina liepunda-umbo olio alipilululwa, alilukwa okuti o Sokitiyeli ngeetyi litumbulwa atee hono.

8 Amasiya atumu ovatumwa-ndaka ku Seowasi ohamba yo Isilayeli omona wa Seowakasi, Seowakasi omona wa Seuu vemupopile ati: “Endyu! Tuhonyene tulwe.”*+ 9 Seowasi ohamba yo Isilayeli atumu okukapopila Amasiya ohamba yo Sundaa okuti: “Otyinkhondo tyimwe tyomakete mo Limbanu tyatuma okukapopila omusendulu wo mo Limbanu okuti: ‘Mphevo omona wove anepwe nomona wange.’ Mahi otyinyama tyimwe tyo mohika mo Limbanu tyakwata apa pena otyinkhondo tyomakete atyityiliata-liata. 10 Otyili, ove watokesa ova Endoo+ otyo omutima wove welitumbilikila. Hambukilwa omunkhima wove, mahi okala meumbo liove.* Omokonda yatyi ulitaindyilila onondaka otoko, noove no Sundaa?” 11 Mahi Amasiya ehetavela.+

Seowasi ohamba yo Isilayeli elipake mondyila; nae, na Amasiya ohamba yo Sundaa avahonyenena ko Mbete-Seme+ epunda-umbo limwe lyo Sundaa+ ngako valwila. 12 Ova Sundaa avatili-ko kova Isilayeli avakahateka no komaumbo* avo. 13 Seowasi ohamba yo Isilayeli akwate-la Amasiya ko Mbete-Seme ohamba yo Sundaa, omona wa Seowasi, Seowasi omona wa Akasiya. Pahe Seowasi avaende nae ko Selusalei, atiula emphana limwe motyimato tyo Selusalei okupolelela Kombundi ya Efalaii+ atee Kombundi yo Pevindi,*+ lina onokovandu 400.* 14 Atyindi-po oolu aiho, nopalata, novityuma aviho viali mondywo ya Siovaa, no momalumono o meumbo* liohamba, nononkhwatwa. Pahe akondoka ko Samaliya.

15 Ovipuka ovikwavo viehipululo lya Seowasi, ovipuka alingile, novipuka ovinene alingile, neetyi alwisile Amasiya ohamba yo Sundaa, kaviahonekelwe momukanda womahipululo o pononthiki mbonohamba mbo Isilayeli? 16 Seowasi akapululukwa-po novakwaukulu vae, akapakwa ko Samaliya,+ komaendo onohamba mbo Isilayeli; Selombowau*+ omona wae emupingi kovipundi.

17 Etyi Seowasi+ omona wa Seowakasi ohamba yo Isilayeli+ anyima, Amasiya+ omona wa Seowasi ohamba yo Sundaa, nkhele akala-ko vali omanima 15. 18 Ovipuka ovikwavo viehipululo lya Amasiya, kaviahonekelwe momukanda womahipululo o pononthiki mbonohamba mbo Sundaa? 19 Pahe avemutyitukila-po+ etyi eli ko Selusalei, ataulila ko Lakisi, mahi avatumu ovalume avemulandula atee ko Lakisi, ngako vemwipaela. 20 Avemupolo-ko avemutyindi kononkhambe, avemutwala no keumbo liae, akapakwa ko Selusalei komaendo ovakwaukulu vae, Mepunda-umbo lya Ndaviti.+ 21 Ovanthu aveho mo Sundaa, avapolo Asaliya*+ etyi ena omanima 16,+ avemuvialeka kouhamba, apingi pu Amasiya,+ tate yae. 22 Apindula-po o Elate+ eikondola ko Sundaa etyi ohamba* yakapululukwa-po novakwaukulu vayo.+

23 Menima 15 Amasiya omona wa Seowasi ohamba yo Sundaa atumina, Selombowau+ omona wa Seowasi ohamba yo Isilayeli akala ohamba ko Samaliya, atumina omanima 41. 24 Walingile etyi tyapenga komaiho a Siovaa. Ahatundu mononkhali mba Selombowau omona wa Nembate, mbuna alingisisile+ ova Isilayeli. 25 Apindula-po onondimbu mbotyilongo tyo Isilayeli, okuhimbikila ko Lembo-Hamate*+ atee kelunga lyo Alambaa,*+ ngeetyi tyapopia ondaka ya Siovaa, Huku yo Isilayeli atumine omuundapi wae Sona,+ omona wa Amitai, omuuli woko Ngate-Efele.+ 26 Mokonda Siovaa wetyimona okuti ova Isilayeli+ vamona ononkhumbi, vaihamenwa. Mutupu nawike upondola okulwilako ova Isilayeli aveho, na ava vokwahulilwa, no vokwasoya. 27 Mahi Siovaa wapangele okuti kamahanyauna enyina lyo Isilayeli mombwelo yeulu.+ Eveyovola nokuvoko kwa Selombowau omona wa Seowasi.+

28 Ovipuka ovikwavo viehipululo lya Selombowau, ovipuka aviho alinga, novilinga viae ovinene, oñgeni alwisa onondyale, ayovola o Ndamasiku,+ no Hamate+ avikala vyo Sundaa no Isilayeli, kaviahonekelwe momukanda womahipululo o pononthiki mbonohamba mbo Isilayeli? 29 Pahe Selombowau akapululukwa-po nonombwale mbae, onohamba mbo Isilayeli; Sakaliya+ omona wae emupingi kovipundi.