Isekiyele
11 Andyityindwa-po nomphepo, ainthwala kombundi yo koutundilo yondywo ya Siovaa, yokwapilukila koutundilo.+ Pombundi opo, andyimono-po ovalume 25, pokati kavo pena Saasaniya omona wa Asuli na Pelatiya omona wa Mbenaya, ovakulu votyilongo.+ 2 Ngwe amphopila ati: “Mona womulume, ava, ovalume vokupanga ovivi, vokuhindila ovanthu etyi tyehetyo mepunda-umbo* omu. 3 Veli nokuti: ‘Mwene pahe hayouno omuvo wokutunga omaumbo?+ Epunda-umbo,* ombiya* yokuteleka,+ onthwe tuhitu.’
4 “Pahe, popia etyi mavakalingwa. Mona womulume+ popia.”
5 “Omphepo ya Siovaa aindyendela,+ ngwe anthi: “Vepopila uti: ‘Etyi o Siovaa wetyitola, wati: “Etyi onwe muli nokupopia tyaviuka, onwe umbo lya Isilayeli, ame ndyityii nawa etyi onwe muli nokusoka.* 6 Onwe mwaipaesa ovanthu ovanyingi mepunda-umbo eli, momatapalo atyo mweyulisa-mo ovivimbi.”’”+ 7 “Otyo Tatekulu Ohamba Onene Siovaa atila: ‘Ovivimbi onwe mwatyandyanesa mepunda-umbo, ovio ohitu, eli epunda-umbo, olio ombiya.+ Mahi onwe mamupolwa-mo.’”
8 “‘Onwe mwatila owoma omutunga,+ ngwe omutunga oo umwe mandyimukatulila,’ o Tatekulu Ohamba Onene Siovaa watola. 9 ‘Ame mepunda-umbo mandyimupolo-mo, andyimupakula pomavoko ononthunda-vilongo, andyimwoongela omphela.+ 10 Onwe mamukatoka komutunga.+ Mandyikatetela omphela yenyi apa pehikila otyilongo tya Isilayeli,+ onwe mamukankhola umwe okuti ame Siovaa.+ 11 Epunda-umbo kamalikalinga ombiya yenyi, onwe kamamulingi ohitu ili-mo; ame mandyikatetela omphela yenyi apa pehikila otyilongo tya Isilayeli, 12 onwe mamukankhola umwe okuti ame Siovaa. Mokonda onwe kamwetavelele ovitumino viange, nii kamwaendelele movitumino viange vionomphela,+ mahi mwaendela movitumino vionomphela viovilongo vieliseta noonwe.’”+
13 Nati vala manee okupopia, Pelatiya omona wa Mbenaya, ankhi, ame andyilipupika-po, andyiliyavela, andyiti: “Tatiei! Tatekulu Hamba Onene Siovaa! Pahe mohanye-ko aveho vahupa vesala mo Isilayeli?”+
14 Ondaka ya Siovaa aindyendela vali, ati: 15 “Mona womulume, ovakulu vove, ovakulu vove vapondola okuyovola otyilongo tyenyi neumbo aliho lya Isilayeli, vatolelwa no vokukala mo Selusalei vatiwa: ‘Kalei kokule na Siovaa. Otyilongo otyetu; otyetu, onthwe twetyipewa.’ 16 Pahe ove, popia uti: ‘Etyi otyo tyatola Tatekulu Ohamba Onene Siovaa, wati: “Nahula okuti nevetwala kokule, pokati kovanthu vovilongo,+ nevetyandyanesa movilongo, mahi mapakala vala katutu ame andyilingi omphangu yavo ikola movilongo omo vakaya namo.”’+
17 “Popia, uti: ‘Otyo tyapopia Tatekulu Ohamba Onene Siovaa, wati: “Mandyikemukongolola pokati kovanthu, mandyikemupola movilongo mwakapita-pita namo pokwatyandyaneswa, andyimupe otyilongo tya Isilayeli.+ 18 Mavakondoka-mo avakapola-mo ovipuka aviho vitoyesa, noviso aviho vitoyesa.+ 19 Ame mandyikevepa omutima wike,*+ mandyikapaka muvo omphepo omphe;+ momalutu avo mankhapola-mo omutima wemanya,+ andyivepe omutima wohitu,*+ 20 opo vaendele movitumino viange, avalandula ovitumino vange vionomphela, ngavio vetavela. Opo pahe, mavakalinga ovanthu vange, ame ankhalinga Huku yavo.”’
21 “‘“Mahi ava vetyipaka umwe komitima viavo tyokukala vala mwene movipuka viavo vitoyesa, no moviso viavo vitoyesa, ovo, ovivi viata monondyila mbavo mandyiviuuyulila komutwe wavo.” Otyo tyapopia Tatekulu Ohamba Onene Siovaa.’”
22 Pahe, ono kelumbii ambukatula omapapatelo ambo, aa omalola otyo eli ponthele yambo,+ peulu liambo+ pena omunkhima wa Huku ya Isilayeli. 23 Omunkhima wa Siovaa+ mepunda-umbo autundu-mo, aukatalama komphunda yahula epunda-umbo koutundilo.+ 24 Andyityindwa-po nomphepo — memonekelo napewa nomphepo ya Huku — ainthwala kovikonde vili mo Kalindeya. Pahe, emonekelo nali nalio alinthundu. 25 Ame andyihimbika okupopila ovanthu ovo ovikonde ovipuka aviho Siovaa andekesa.