Selemiya
36 Menima lya kwana Seoyakii+ eli kovipundi, Seoyakii omona wa Sosiya, ohamba yo Sundaa, ondaka ya Siovaa ayeendela Selemiya aiti: 2 “Kwata ombwingwa,* honeka-mo onondaka ambuho nekupopila mbupopia etyi mandyilingi o Isilayeli, no Sundaa,+ novanthu aveho vovilongo,+ okutuka monthiki yo tete napopia noove pononthiki mba Sosiya, atee hono.+ 3 Hamwe tyina veumbo lya Sundaa vameivi ovihuna nahanda okuveetela, vayeka-po ondyila yavo yapenga, ame andyivepolela-po otyivi valinga, nonkhali yavo.”+
4 Selemiya pahe aihana Mbaluke+ omona wa Neliya, emupopila onondaka ambuho atolelwa na Siovaa, ou Mbaluke embuhoneka mombwingwa.*+ 5 Selemiya apopila Mbaluke ati: “Ame naikwa, hipondola okunyingila mondywo ya Siovaa. 6 Ove, ove monyingila-mo, otangela peulu onondaka mba Siovaa ombu nati otyo ndyikupopila, otyo ove uhoneka. Mbutangela ovanthu mondywo ya Siovaa, monthiki yokukala tyahali; opo vala motyivili okumbutangela ovanthu aveho vomo Sundaa, veli nokuya vatunda momapunda-umbo avo. 7 Hamwe etyi vaita evelinge onkhenda tyihika ku Siovaa, hamwe velikondoka, munthu na munthu ayeke-po ondyila yae yapenga, mokonda onyengo Siovaa apopia mayeendela ovanthu vae onene, olunuma lwatyo olunene.”
8 Mbaluke omona wa Neliya alingi umwe atyiho omuuli Selemiya emutuma; atangela peulu mondywo ya Siovaa, onondaka mba Siovaa mbahonekwa mombwingwa.*+
9 Menima lya tano Seoyakii+ eli kovipundi, Seoyakii omona wa Sosiya ohamba yo Sundaa, mohanyi ya tyive, ovanthu aveho vomo Selusalei novanthu aveho veile mo Selusalei vatundile momapunda-umbo o Sundaa avakala ononthiki tyahali kotyipala tya Siovaa.+ 10 Pahe Mbaluke atangela peulu onondaka mba Selemiya, mbahonekwa mombwingwa.* Wembutangela mondywo ya Siovaa, mondywo mulila Semaliya+ omona womuhoneki* Safaa,+ kepata lyo keulu, kombundi omphe yondywo ya Siovaa,+ weitanga otyo ovanthu aveho vatehela.
11 Etyi Mikaiya omona wa Semaliya, Semaliya omona wa Safaa, eiva onondaka ambuho mba Siovaa mbuli mombwingwa,* 12 alauka no kondywo* yohamba aende mondywo yomuhoneki. Ovanene vatyo aveho* omo vepumphi: ovo Elisama+ omuhoneki, na Ndelaiya omona wa Semaiya, na Elenataa+ omona wa Akimbole,+ na Semaliya omona wa Safaa, na Sendekiya omona wa Hananiya, novanene vatyo ovakwavo aveho. 13 Mikaiya evetolela onondaka ambuho eiva etyi Mbaluke atangela ovanthu ombwingwa.*
14 Pahe ovanene vatyo aveho avatumu Seundi, omona wa Netaniya, Netaniya omona wa Silemia, Silemia omona wa Kusi, akapopile Mbaluke okuti: “Endyu kuno, etelela ombwingwa watanga yeivala kovanthu aveho.” Mbaluke omona wa Neliya akwata ombwingwa peke, aende-ko. 15 Avemuti: “Nkhele pumphama, tutangele-yo-vo nondaka yakaluluka.” Mbaluke evetangela-yo.
16 Etyi veiva onondaka ombo ambuho avapaalala pahe otyo velitala-tala vala, avapopila Mbaluke avati: “Onthwe tyotyili matukapopila onondaka ombo ambuho ohamba.” 17 Avapulu Mbaluke avati: “Nkhele tutolele-vo vala onondaka ombo ambuho wembuhoneka ñgeni. Oe wekupopila otyo uhoneka? 18 Mbaluke akumbulula ati: “Ngwe wamphopila onondaka ombo ambuho, ame andyimbuhoneka notinda mombwingwa.”* 19 Ovanene vatyo avapopila Mbaluke avati: “Endei, kaholamei, noove na Selemiya, pahamone ou unoñgonoka apa muli.”+
20 Ngwe avaende kohamba ili kepata, avaholeka ombwingwa mondywo ya Elisama omuhoneki, avapopila ohamba ovipuka aviho veiva.
21 Pahe ohamba aitumu Seundi+ akapole ombwingwa, ekeipola mondywo ya Elisama omuhoneki. Seundi ahimbika okwiitangela ohamba novanene vatyo aveho vetai pohamba. 22 Ohamba ankho ipumphi mondywo yo pongandyi mohanyi ya tyive,* uli kotupia twanthiakanwa. 23 Etyi Seundi atanga-ko vala omitete vikehika pu vitatu hamwe o pu vikwana, ohamba otyo iteta-ko nonkhiki yomuhoneki, otyo iyumba potupia, atee ombwingwa aiho yapwa-po okupia. 24 Vana avahatili-ale owoma; nii ohamba nii novaundapi vayo veiva onondaka ombo ambuho, nii avahatandula ovikutu viavo. 25 Namphila ovo Elenataa,+ na Ndelaiya,+ na Semaliya+ velihekele umwe kohamba yahapake ombwingwa motupia, mahi kayevetehelele. 26 Nkhele ohamba aitumu Selameeli omona wohamba, na Selaya omona wa Asiliyele, na Silemia omona wa Ambendeyeli vakakwate Mbaluke omuhoneki na Selemiya omuuli, mahi Siovaa eveholeka.+
27 Etyi ohamba yapaka motupia ombwingwa ina onondaka Selemiya apopilile Mbaluke, ondaka ya Siovaa ayeendela vali Selemiya+ aiti: 28 “Kwata ombwingwa onkhwavo ohoneka-mo onondaka ambuho mbali mombwingwa yo tete, ei Seoyakii ohamba yo Sundaa apaka motupia.+ 29 Ove popila ohamba yo Sundaa Seoyakii uti: ‘Etyi otyo tyapopia Siovaa wati: “Ove wapaka motupia ombwingwa, oti: ‘Oityi ove wahonekela-mo okuti: “Ohamba yo Mbambilonia maiya umwe, aihanye-po otyilongo etyi, ainyimi-ko ovanthu vatyo novinyama?”’+ 30 Pahe, etyi otyo Siovaa apopila Seoyakii ohamba yo Sundaa wati: ‘Mwe kamukatuka nawike upumphama kotyipundi tyounene tya Ndaviti,+ apa ankhia kamakapakwa, komutenya makaliwa nomutenya, kounthiki akaliwa nongandyi.+ 31 Mandyimwoongela omphela, nae naava vatuka mwe,* novaundapi vae, mokonda yovivi viavo. Mandyiveetela ovihuna, navo no vokukala mo Selusalei novalume vomo Sundaa, ovihuna aviho nevepopila,+ mahi ngwe avehendyivi.’”’”+
32 Pahe Selemiya akwata ombwingwa onkhwavo eipe Mbaluke omuhoneki,+ omona wa Neliya, Selemiya ai mokupopia otyo ngwe ahoneka onondaka ambuho mbali mombwingwa* Seoyakii ohamba yo Sundaa apakele motupia.+ Akuyawiswa vali onondaka ononyingi mbulii na mbuna.