Omukanda wo Tete wa Samuwele
6 Otyikasa+ tya Siovaa tyakalele kotyilongo tyova Filisitiya onohanyi epandu-vali. 2 Ova Filisitiya avaihana ovanakwa novitapi,+ avevepulu okuti: “Oityi tuna okulinga Otyikasa tya Siovaa? Tupopilei oñgeni tuna okutyituma opo tyikondoke komphangu yatyo.” 3 Ngwe avakumbulula ati: “Tyina mutuma Otyikasa tyomphango tya Siovaa, Huku yo Isilayeli, mwehetyitumei vala amwahatumikisa natyike tyotyilikutila.+ Onwe muna okutuma otyaawa tyonkhali yenyi. Okulinga ngootyo, opo vala mamuveluka amunoñgonoka omokonda yatyi okuvoko kwae kwehemuyekela.” 4 Ova Filisitiya avapulu okuti: “Otyiawa patyi tyonkhali yetu tuna okutuma?” Avakumbulula okuti: “Ovilolo vitano vioolu viouvela wondyange, novimphuku vitano vioolu, mombalulo yovatumini vova Filisitiya,+ mokonda onwe amuho novatumini venyi, mwavasiwa notyitateka tyike. 5 Onwe muna okulinga ovilolo viouvela wenyi wondyange novilolo viovimphuku+ vienyi vikahi nokunyona otyilongo, muna okunkhimaneka Huku yo Isilayeli. Hamwe upepukisa okuvoko kwae kukahi kwoonwe, no ku huku yenyi, no motyilongo tyenyi.+ 6 Omokonda yatyi mwatenesila omitima vienyi, ngeetyi tyalingile ova Isitu na Falaoo?+ Etyi Huku evemonesa ononkhumbi+ avayeke ova Isilayeli avaende.+ 7 Pahe ovolei okatemba okape, nonongombe onombali onoina mbuna ononkhembe, mbokuhenepakwe okanga. Amumbupandeka kokatemba, mahi ononkhembe mbatyo, mbutwalei kotyunda, kokule nambo. 8 Pakei Otyikasa tya Siovaa kokatemba, amupake motyikasa tyimwe ovipuka vyo olu mamumutumu viotyiawa tyonkhali.+ Konyima amuvitumu viende 9 amutale: ine mbuketwala no ko Mbete-Seme,+ kotyilongo oku Otyikasa tyina okukala, opo naina oe waeta ononkhumbi ombu. Mahi, ine kambaile ko Mbete-Seme, opo haeko wetweetela ononkhumbi ombu; etyi mwene tyetweendela vala.”
10 Ovalume ovo avalingi ngootyo. Avaeta onongombe onombali onoina mbuna ononkhembe, avembupandeka kokatemba, ononkhembe mbatyo avembukutila motyunda. 11 Konyima avapake Otyikasa tya Siovaa kokatemba, tupu avapake-ko otyikasa tyina ovimphuku vioolu, novilolo viouvela wavo wondyange.* 12 Onongombe ombo ambwende netapalo lyo ko Mbete-Seme.+ Ambwende umwe netapalo olio, otyo mbuvandala; ambuhayapukila kokulio nii kokumbili. Tyina mbweenda ovatumini vova Filisitiya otyo vembulandula, avembulandula atee apa paoyela o Mbete-Seme. 13 Ovanthu vo ko Mbete-Seme veli nokuteya otiliku melola. Tyina vakatala ñgaa, Otyikasa tyomphango, avahambukwa unene. 14 Okatemba akeya atee mepia lya Susuwee, omu Mbete-Seme ngamo katalama, ponthele pemanya limwe enene. Avatyoko evai liokatemba avaave onongombe onoina ngotyilikutila+ tyayokwa tya Siovaa.
15 Vomuhoko wa Levii,+ avatululako Otyikasa tya Siovaa notyikasa tyili ponthele yatyo, muna ovipuka vioolu, avevipake kemanya enene. Ovalume vo ko Mbete-Seme+ avalingila Siovaa oviawa viayokwa novilikutila monthiki oyo.
16 Etyi ovatumini vetano vova Filisitiya vetyimona, avakondoka no ko Ekoloo monthiki yatyo oyo. 17 Ovilolo vioolu viouvela wondyange ova Filisitiya vatumine ku Siovaa mokonda yonkhali yavo ovievi:+ tyimwe tyatumwa nova Asindonde,+ otyikwavo tyatumwa nova Ngasa, otyikwavo tyatumwa nova Asikeloo, otyikwavo tyatumwa nova Ngate,+ otyikwavo o nova Ekoloo.+ 18 Ombalulo yovimphuku vioolu, ilifwe pombalulo yomapunda-umbo aeho ovatumini vetano ova Filisitiya momapunda-umbo omanene no komaumbo okondye yomapunda-umbo.
Emanya enene kwapakwa Otyikasa tya Siovaa tyili mepia lya Susuwee omu Mbete-Seme, liakala ngombangi atee onthiki yo hono. 19 Mahi, Huku aipaa ovanthu vo ko Mbete-Seme mokonda vatalele Otyikasa tya Siovaa. Waipaele ovanthu 50.070* ovanthu avalili mokonda Siovaa waipaele ovanthu ovanyingi.+ 20 Ovanthu vo ko Mbete-Seme avapulu okuti: “Olie utyivila okutwalako lutai ku Siovaa, Huku ukola?+ Ha mai vali no kulie, tyina amatundu kwoonthwe?”+ 21 Avatumu ovatumwa-ndaka kovanthu vokukala ko Kiliyate-Seyalii+ okukapopia okuti: “Ova Filisitiya vakondola Otyikasa tya Siovaa. Endywei mutyipole.”+