Omukanda wo Tete wa Samuwele
10 Samuwele apolo okatenda komulela atili pomutwe wa Saulu.+ Emupe ombesu, ati: “Siovaa wekulembula ukale onkhalamutwe+ yepingo liae.+ 2 Hono tyina moende, movasi ovalume vevali popepi nelangalo lya Lakele,+ motyilongo tyo Mbesamii ko Selesa. Mavekupopila okuti: ‘Ovimbulu ove uli nokwovola viavasiwa, mahi pahe tate yove ovimbulu wevilimbwa-le,+ pahe onwe aovola, walinga otyiho. Ukahi nokupopia okuti: “Oityi pahe mandyilingi, omona wange wahamoneka?”’ 3 Oende no komutwe atee uhika komuti omunene wo ko Tambole. Oko movasi-ko ovalume vetatu vekahi nokwenda no ko Mbetele opo vakafende Huku yotyotyili,+ umwe wataha ovikombo vitatu, omukwavo watyinda onombolo ononthatu omukwavo watyinda omulindi omunene wovinyu. 4 Ovo mavekukukunya, avekwavela onombolo onombali; tambula onombolo mavekwavela. 5 Konyima yotyo, movasi otyipunda tya Huku yotyotyili, pena omaswalali ova Filisitiya. Nga wehika mepunda-umbo, movasi-mo ovauli ovanyingi vatuluka komphangu ikola yokwaya peulu, otyo vaula; komutwe wavo movasi-ko ovanthu vahika ovihumba, nono pandelu, nonongayeta,* novisandyi. 6 Omphepo ya Siovaa maikupe ononkhono,+ mokaula kumwe navo, okala omunthu welikalela.+ 7 Tyina omanyingilikilo oo amamoneka, linga atyiho uvila mokonda Huku yotyotyili ukahi noove. 8 Tyina utunda opo, enda no ko Silingale;+ ame ha mandyikuvasi ndyiye okwava ovilikutila viokuyokwa, novilikutila viombembwa. Ove una okukevelela ononthiki epandu-vali atee ame ndyihika. Mandyikupopila etyi una okulinga.”
9 Tyina Saulu atunda vala pu Samuwele, Huku ahimbika okupilulula omutima wa Saulu akala ngomunthu omukwavo; monthiki oyo, omanyingilikilo atyo aeho afwiswapo. 10 Etyi vatunda-ko, avaende no kotyipunda akutundilila otyikundyi tyovauli veya no kwe. Liwa-liwa, ononkhono mba Huku ambumukwatesako,+ ahimbika okuula+ kumwe novauli. 11 Ovanthu aveho vemwii etyi vemumona ukahi nokuula novauli vakwavo, avahimbika okulipula okuti: “Omona wa Kisi, Saulu, walinga-tyi? Okuti nae omuuli?” 12 Omulume umwe wo oko, ati: “Mahi olie he yavo?” Oko kwatuka ovanthu okupopia okuti:* “Vati Saulu nae omuuli!”+
13 Etyi amana okuula, aende komphangu ikola yaya peulu. 14 Konyima, umwe ankho velilandula na tate ya Saulu evepulu kumwe nomukwatesiko wae, ati: “Opi mwaile?” Saulu akumbulula okuti: “Twakaovolele ovimbulu+ mahi katwevivasile. Pahe atwende ku Samuwele.” 15 Una ankho velilandula na tate ya Saulu emupulu vali okuti: “Oityi Samuwele emupopila? Tyimphopilei mbambavo.” 16 Saulu emukumbulula okuti: “Wetupopila okuti ovimbulu viokwavomba viavasiwa-le.” Mahi ehemupopila etyi Samuwele apopia konthele youtumini.
17 Pahe Samuwele aongiya ovanthu ko Misipaa kotyipala tya Siovaa,+ 18 apopila ova Isilayeli okuti: “Siovaa, Huku yo Isilayeli wati: ‘Ame napola Isilayeli ko Isitu, nemuyovola pomavoko ova Isitu+ no pomavoko omauhamba aeho ankho vemumonesa ononkhumbi. 19 Mahi hono mwaanya Huku yenyi+ wemuyovola kovitateka no kononkhumbi mbenyi ambuho, mwapopia okuti: “Au! Holovona ohamba maitutumina.” Pahe kalei kotyipala tya Siovaa, ongiyei ovanthu vomihoko vienyi, no vomaanda enyi.’”*
20 Ngootyo, Samuwele aihana ovanthu aveho vomihoko vyo Isilayeli,+ vomuhoko wa Mbesamii ngavo vaholovonwa-po.+ 21 Konyima, aihana vomuhoko wa Mbesamii komutwe, okutalela monombunga mbavo, apaholovonwa ombunga yova Matilite. Pahe Saulu, omona wa Kisi, ngae uholovonwa-po.+ Mahi etyi vekemwovola, avehemuvasi komphangu naike. 22 Avapulu Siovaa okuti:+ “Omulume oo pano nkhele kepo?” Siovaa akumbulula okuti: “Ukahi umwe opo, waholama pokati kovityuma.” 23 Avahateka, avekemupola-po. Etyi atalama pokati kovanthu, amoneka okuti omule vali ku aveho; vakwavo ankho vemuti vala pomapepe.+ 24 Samuwele apopila ovanthu aveho okuti: “Talei omunthu Siovaa aholovona!+ Povanthu aveho petupu omunthu ukahi ngae.” Ovanthu aveho avahimbika okukwilila, avati: “Kala nomwenyo omule hamba!”
25 Samuwele apopila ovanthu etyi onohamba ankho mbuna okulingwa,+ etyihoneka momukanda, eupake mekaka lya Siovaa liefendelo. Konyima, Samuwele apopila aveho vakondoke komaumbo avo. 26 Saulu nae akondoka keumbo liae ko Simbeaa, alandulwa nomafwalali ovilwa ana Siovaa alunda omitima viao. 27 Mahi ovalume vamwe vokuhasilivila avati: “Oñgeni omulume ou apondola okutuyovola?”+ Ngootyo, avemupopi omapita, avehemwavela otyiawa.+ Mahi ngwe ahapopi natyike.*