Omukanda wo Tete wa Samuwele
28 Pononthiki opo ova Filisitiya avaongiya ovakwa-vita vavo opo vakalwise ova Isilayeli.+ Akisi apopila Ndaviti okuti: “Ove utyii nawa okuti noove novakwa-vita vove matwende atuho kovilwa.”+ 2 Ndaviti apopila Akisi okuti: “Ove etyi omuundapi wove malingi utyii.” Pahe Akisi apopila Ndaviti okuti: “Otyo mandyikwavelela otyilinga tyokukala omuyungi wange apeho.”*+
3 Samuwele ankho wanyima-le, ova Isilayeli aveho valinga-le omutambo, avekemupaka ko Lamaa, kotyilongo atyitilwa.+ Saulu wataatele motyilongo ovatali novitapi.+
4 Ova Filisitiya aveliongiya avaongo onthanda mo Sunei.+ Saulu aongiya ova Isilayeli aveho avakaonga onthanda mo Silimbowa.+ 5 Etyi Saulu amona omafwalali ova Filisitiya monthanda, atili unene owoma ahimbika okuteketa.+ 6 Namphila Saulu aitile ku Siovaa,+ Siovaa ehemukumbulula, nii mondyoi, nii no Ulii,+ nii novauli. 7 Pahe Saulu apopila ovaundapi vae okuti: “Ovolei omukai umwe otyitapi,+ ame ndyende-ko ndyikatalese.” Ovaundapi vae avemupopila okuti: “Ko Ene-Ndole kuna omukai umwe otyitapi.”+
8 Ngootyo Saulu elilingisa, avale ovikutu vielikalela aende novalume vamwe vevali, akapopia nomukai oo kounthiki. Emupopila okuti: “Mbambavo, mphopile etyi matyimoneka komutwe, tapesa+ ondyihanena omunthu mandyikwiti.” 9 Omukai emupopila okuti: “Ove utyii okuti Saulu wataata motyilongo aveho vokutala, no vokutapesa.+ Omokonda yatyi umphakela meliva* opo ndyinkhie?”+ 10 Saulu aane menyina lya Siovaa, okuti: “Na Siovaa umwe una omwenyo, kumavelwa onombei mokonda yotyipuka otyo!” 11 Omukai emupulu okuti: “Olie wahanda ame ndyikwihanena?” Akumbulula okuti: “Ndyihanene Samuwele.” 12 Etyi omukai amona “Samuwele”*+ auulula onkhu nondaka yae aiho, apopila Saulu okuti: “Omokonda yatyi wankhembela? Nanyo ove Saulu!” 13 Ohamba aimupopila okuti: “Wahatile owoma. Olie weete?” Omukai akumbulula Saulu okuti: “Ndyiete omunthu ulinga ngoti otyika-huku utunda pohi.” 14 Liwa-liwa emupulu okuti: “Ukahi ñgeni?” Omukai ati: “Ombwale imwe ikahi nokuya, yavala ekapote lihena omankhanya.”+ Etyi Saulu etyinoñgonoka okuti o “Samuwele,” aikila konongolo elipetamena pohi.
15 “Samuwele” apulu Saulu okuti: “Omokonda yatyi umphwilisila ondyihana ndyiye?” Saulu akumbulula okuti: “Ndyikahi motyitateka tyimwe otyinene. Ova Filisitiya veli nokundwisa, Huku wandyeka-po. Okumwita kankhumbulula vali, nii novauli,+ nii mo nondyoi; otyo nekwihanena tatekulu, opo umphopile etyi ndyina okulinga.”+
16 “Samuwele” emupulu okuti: “Nanyo wandyihanena-tyi ine Siovaa wekuyeka-po,+ walinga ondyale yove? 17 Siovaa malingi etyi anthumine ndyipopie okuti: Siovaa matukula ouhamba pomavoko ove, ewavela Ndaviti.+ 18 Mokonda ove kwetavelele ondaka ya Siovaa, okuhahanye-ko ova Amaleke, vokwankhindula onyengo yae onene, otyo Siovaa ekahi nokulingila ngootyo.+ 19 Tyihe-otyo vala, ove nova Isilayeli aveho Siovaa memupakula pomavoko ova Filisitiya,+ muhuka ove+ novana vove+ mamukakala na ame. Tupu Siovaa makapakula omafwalali ova Isilayeli pomavoko ova Filisitiya.”+
20 Saulu atokela pohi akakangavala, mokonda ankho watila unene owoma onondaka mba “Samuwele.” Ononkhono ankho utupu mokonda komutenya kalile natyike nii kongulohi. 21 Omukai afwene pu Saulu, etyi emumona watila unene owoma, emupopila okuti: “Omuundapi wove walinga etyi wapopia; nayumbahi omwenyo wange,*+ andyilingi etyi tatekulu aita. 22 Mbambavo tehelela etyi omuundapi wove mekupopila. Eta ndyikwetele otyimbembu tyombolo, na ulie opo ukale nononkhono, otyivili okwenda.” 23 Ngwe aanye ati: “Himali.” Mahi ovaundapi vae nomukai oo, avatwalako okumukuluminya. Konyima etavela, akatuka akapumphama koula. 24 Omukai akuluminya liwa-liwa akaipaa* onthane yokwavondoka ena-yo meumbo. Akaeta ohinde, alingi enthapi ayoko onombolo mbuhena onkhiso. 25 Aavela okulia ovo Saulu novaundapi vae, avali. Etyi vamana, avakatuka, avaende kounthiki.+